అక్షరటుడే వెబ్‌డెస్క్: Ai+ Smartphone Price | ప్రముఖ స్మార్ట్‌ఫోన్ తయారీ సంస్థ ‘Ai+’ తమ వినియోగదారులకు చేదు వార్త అందించింది. తమ స్మార్ట్‌ఫోన్ పోర్ట్‌ఫోలియోలోని ఎంపిక చేసిన పలు ప్రాచుర్యం పొందిన మోడళ్ల ధరలను పెంచుతున్నట్లు కంపెనీ అధికారికంగా ప్రకటించింది. ఈ సవరించిన నూతన ధరలు 2026 నవంబర్ 15 నుండి అమలులోకి రానున్నాయి. పెరిగిన విడిభాగాల ఖర్చులు, సవరించిన సవాళ్ల దృష్ట్యా కంపెనీ ఈ నిర్ణయం తీసుకున్నట్లు తెలిపింది.
Ai+ Smartphone Price | నవంబర్ 14 వరకే పాత ధరలు..
స్మార్ట్‌ఫోన్ తయారీకి ఉపయోగించే విడిభాగాల (ఇన్‌పుట్) ఖర్చులు పెరగడం, మార్కెట్‌లో ఉన్న తీవ్రమైన వ్యయ ఒత్తిళ్ల కారణంగానే ఈ నిర్ణయం తీసుకోక తప్పలేదని కంపెనీ స్పష్టం చేసింది. నాణ్యమైన ఉత్పత్తి అనుభవాన్ని అందించడంతో పాటు సంస్థ స్థిరత్వాన్ని కాపాడుకోవడానికి ఈ మితమైన ధర సర్దుబాటు అనివార్యమైందని పేర్కొంది. మోడల్‌ను బట్టి ఫోన్ల ధరలు రూ. 1,000 నుండి రూ. 3,000 వరకు పెరగనున్నాయి. ప్రస్తుత పాత ధరలకే స్మార్ట్‌ఫోన్ కొనుగోలు చేయడానికి నవంబర్ 14 వరకు మాత్రమే అవకాశం ఉందని వెల్లడించింది.
Ai+ Smartphone Price | పల్స్ , నోవా సిరీస్ ..
కంపెనీ తెలిపిన వివరాల ప్రకారం Ai+ పల్స్ (Pulse) , నోవా (Nova) సిరీస్‌లలోని పలు వేరియంట్ల ధరలు పెరిగాయి. Ai+ Pulse 2 FE (4GB + 64GB) ధర రూ. 8,999 నుండి రూ. 10,999 కి చేరింది. Ai+ Pulse 2 సిరీస్ ఫోన్ల ధరలు రూ. 10,999 నుండి రూ. 12,999 వరకు పెరిగాయి. అలాగే Ai+ Nova 2 5G , Nova 2 Neo 5G మోడళ్లపై రూ. 2,000 నుండి రూ. 3,000 వరకు పెరిగి నూతన ధరలు రూ. 13,999 నుండి రూ. 16,999 మధ్య నమోదు కానున్నాయి.
Ai+ Smartphone Price | ప్రీమియం 5G మోడళ్లు ..
హై-ఎండ్ విభాగంలోని Ai+ Nova 2 Power 5G, Pro 5G , Ultra 5G మోడళ్ల ధరలు కూడా రూ. 1,000 నుండి రూ. 3,000 వరకు పెరిగి నూతనంగా రూ. 17,999 నుండి రూ. 22,999 మధ్య లభించనున్నాయి. కాగా వినియోగదారులకు ఊరట కలిగించే విషయమేమిటంటే.. కంపెనీకి చెందిన అత్యంత ప్రీమియం ఫోన్ Ai+ NovaFlip 5G (8GB + 256GB) ధరలో ఎలాంటి మార్పు చేయలేదు. దీని ధరను యథాతథంగా రూ. 49,999 వద్దే కొనసాగిస్తున్నట్లు కంపెనీ వెల్లడించింది.
ఇది కూడా చదవండి: Bodhan Market Committee | బోధన్ మార్కెట్ కమిటీ ఛైర్మన్గా నాగేశ్వర రావు ప్రమాణస్వీకారం
