అక్షరటుడే, వెబ్డెస్క్: Philippines Huge Earthquake | దక్షిణ ఫిలిప్పీన్స్ ప్రాంతంలో సోమవారం తెల్లవారుజామున పెను భూకంపం సంభవించింది. అంతర్జాతీయ భూగర్భ పరిశోధనా సంస్థల (USGS, BMKG) తాజా నివేదికల ప్రకారం.. రిక్టర్ స్కేలుపై దీని తీవ్రత 7.8 (ప్రాథమిక అంచనాల్లో 7.7) గా నమోదైంది. ఆ వెంటనే 6.1, 6.0 తీవ్రతతో మరో రెండు భూకంపాలు సంభవించాయి.
ఈ భారీ భూకంపాల కారణంగా పసిఫిక్ మహాసముద్ర తీర ప్రాంత దేశాల్లో ఒక్కసారిగా అలజడి రేగింది. రాబోయే కొన్ని గంటల్లో తీరప్రాంతాలకు సునామీ ముప్పు పొంచి ఉందని పసిఫిక్ సునామీ హెచ్చరికల కేంద్రం (PTWC) హెచ్చరికలు జారీ చేసింది.
Philippines Huge Earthquake | సముద్రం అంతర్భాగంలో
భారత కాలమానం (IST) ప్రకారం జూన్ 08, 2026 తెల్లవారుజామున 05:07 గంటలకు (స్థానిక సమయం ఉదయం 07:37 గంటలకు) ఈ ప్రకంపనలు సంభవించాయి.
ఫిలిప్పీన్స్లోని మిండనావో (Mindanao) ద్వీపకల్పానికి సమీపంలో సెలెబెస్ సముద్రం (Celebes Sea) అంతర్భాగంలో ఈ భూకంప కేంద్రం కేంద్రీకృతమైంది.
ఇది ఇండోనేషియాలోని సులవేసి, కోటమొబాగు ప్రాంతానికి ఉత్తరంగా సుమారు 553 కిలోమీటర్ల దూరంలో ఉంది. (Lat: 5.635 N, Long: 125.147 E)
భూగర్భంలో దాదాపు 35 కిలోమీటర్ల నుంచి 93 కిలోమీటర్ల లోతులో ఈ భూకంప తీవ్రత కేంద్రీకృతమైనట్లు శాస్త్రవేత్తలు గుర్తించారు.
Philippines Huge Earthquake | మరో రెండు భూకంపాలు..
కాస్త సమయంలోనే మరో రెండు భూకంపాలు సంభవించాయి. రెండో దాని తీవ్రత రిక్టర్ స్కేలుపై 6.1 గా నమోదైంది. ఇది భారత కాలమాన ప్రకారం.. ఉదయం 5:18 గంటలకు సంభవించింది. దీని భూకంప కేంద్రం ఫిలిప్పీన్స్లోని సౌత్ కోటబాటోలో ఉన్న పోలోమోలోక్ (Polomolok) కు 93 కిలోమీటర్ల దూరంలో ఉంది.
మూడో భూకంపం తీవ్రత రిక్టర్ స్కేలుపై 6.0 గా నమోదైంది. ఇది భారత కాలమాన ప్రకారం.. ఉదయం 5:19 గంటలకు (రెండో భూకంపం వచ్చిన కేవలం ఒక నిమిషం తర్వాత) వచ్చింది. దీని భూకంప కేంద్రం ఫిలిప్పీన్స్లోని సౌత్ కోటబాటోలో ఉన్న పోలోమోలోక్ (Polomolok) కు 63 కిలోమీటర్ల దూరంలో ఉంది.
Philippines Huge Earthquake | సునామీ ముప్పు.. హై అలర్ట్
ఈ భూకంపాల తీవ్రత దృష్ట్యా ఫిలిప్పీన్స్, ఇండోనేషియా, తైవాన్, మలేషియా, పలావు, పపువా న్యూగినియా దేశాల తీర ప్రాంతాలకు సునామీ హెచ్చరికలు జారీ అయ్యాయి.
సముద్రంలో ఒకటి లేదా అంతకంటే ఎక్కువ మీటర్ల ఎత్తులో రాకాసి అలలు ఎగసిపడే అవకాశం ఉందని, తీరప్రాంత ప్రజలు తక్షణమే సురక్షిత ప్రాంతాలకు, ఎత్తైన ప్రదేశాలకు వెళ్లాలని అధికారులు ఆదేశించారు. జపాన్ వాతావరణ సంస్థ కూడా తమ పసిఫిక్ తీరప్రాంతానికి సునామీ అడ్వైజరీని జారీ చేసింది.
Philippines Huge Earthquake | భయాందోళనలో ప్రజలు
మిండనావో ప్రాంతంలోని అలాబెల్ (Alabel) వంటి పట్టణాల్లో ఉదయం పాఠశాలలు, ప్రభుత్వ కార్యాలయాల్లో జెండా ఆవిష్కరణ కార్యక్రమాలు జరుగుతున్న సమయంలో ఒక్కసారిగా భూమి తీవ్రంగా కంపించడంతో ప్రజలు ప్రాణభయంతో రోడ్లపైకి పరుగులు తీశారు.
భూకంపాల ధాటికి కొన్ని ప్రభుత్వ భవనాల గోడలు దెబ్బతిని బీటలు వారినట్లు స్థానిక పోలీసు అధికారులు తెలిపారు. ప్రకంపనల తీవ్రతకు కొందరు స్పృహతప్పి పడిపోయారు.
ఇండోనేషియాలోని ఉత్తర నగరమైన మనాడో (Manado) లోనూ ఈ భూకంపం అత్యంత శక్తివంతంగా అనిపించిందని ప్రత్యక్ష సాక్షులు పేర్కొన్నారు.
Philippines Huge Earthquake | రింగ్ ఆఫ్ ఫైర్ ప్రభావం
భూకంపాలు, అగ్నిపర్వత పేలుళ్లకు అత్యంత ప్రమాదకరమైన పసిఫిక్ “రింగ్ ఆఫ్ ఫైర్” (Ring of Fire) జోన్లో ఫిలిప్పీన్స్, ఇండోనేషియా దేశాలు ఉండటం వల్ల ఇక్కడ తరచూ ఇలాంటి ప్రకృతి వైపరీత్యాలు సంభవిస్తుంటాయి.
ప్రస్తుతానికి ఎటువంటి ప్రాణనష్టం జరగలేదని అధికారులు భావిస్తున్నప్పటికీ, అంతర్గత ప్రాంతాల నుంచి పూర్తి వివరాలు అందాల్సి ఉంది. విపత్తు నిర్వహణ బృందాలు క్షేత్రస్థాయిలో సహాయక చర్యల కోసం రంగంలోకి దిగాయి.
