Hong Kong Housing Crisis : వరల్డ్ రిచెస్ట్ సిటీలో గృహ సంక్షోభం.. అట్ట పెట్టెల్లో జీవనం.. భారత్‌లోనూ ఇదే పరిస్థితి వస్తుందా?

అక్షరటుడే, వెబ్‌డెస్క్: Hong Kong Housing Crisis : ప్రపంచంలో అత్యంత సంపన్న నగరాల్లో ఒకటిగా గుర్తింపు పొందిన Hong Kongలో తీవ్ర గృహ సంక్షోభం బయటపడుతోంది. ఆకాశాన్నంటుతున్న ఇళ్ల ధరల కారణంగా వేలాది మంది సామాన్య ఉద్యోగులు, వలస కార్మికులు “కాఫిన్ హోమ్స్”గా పిలిచే అట్టపెట్టెల్లాంటి చిన్న గదుల్లో జీవనం సాగిస్తున్నారు.

Hong Kong Housing Crisis : “కాఫిన్ హోమ్స్”

ఈ “కాఫిన్ హోమ్స్” పరిమాణం సాధారణంగా 15 నుంచి 25 చదరపు అడుగుల మధ్యే ఉంటుంది. ఒక్క బెడ్ పెట్టుకునేంత స్థలం మాత్రమే ఉండే ఈ గదుల్లో గాలి ప్రసరణ, గోప్యత వంటి ప్రాథమిక సౌకర్యాలు కూడా లేకపోవడం గమనార్హం.

అయినప్పటికీ నెలకు వందల డాలర్లు అద్దెగా చెల్లించాల్సి వస్తోంది. ప్రస్తుతం నగరంలో సుమారు 2 లక్షలకు పైగా ప్రజలు ఇలాంటి చిన్న గదుల్లో నివసిస్తున్నారని నివేదికలు చెబుతున్నాయి.

నగరంలో గృహ ధరలు గత రెండు దశాబ్దాల్లో భారీగా పెరిగాయి. తక్కువ వేతనాలతో జీవించే కార్మికులు ఇళ్లను కొనడం లేదా అద్దెకు తీసుకోవడం సాధ్యంకాకపోవడంతో ఇలాంటి చిన్న గదులే చివరి ఆశ్రయంగా మారాయి. కొన్నిచోట్ల పాత భవనాల్లో పెద్ద గదులను విభజించి 10–12 చిన్న గదులుగా మార్చి అద్దెకు ఇస్తున్నారు.

Hong Kong Housing Crisis : అండర్‌పాస్‌లు, వంతెనల కింద..

ఇంకా దారుణమైన విషయం ఏమిటంటే.. సెలవు రోజుల్లో విదేశీ గృహ కార్మికులు అండర్‌పాస్‌లు, వంతెనల కింద అట్టపెట్టెల్లోనే గుంపులుగా గడపాల్సిన పరిస్థితి కూడా కనిపిస్తోంది. ముఖ్యంగా ఫిలిప్పీన్స్, ఇండోనేషియా నుంచి వచ్చిన కార్మికులు విశ్రాంతి కోసం ఇలాంటి ప్రదేశాల్లో తలదాచుకుంటున్న దృశ్యాలు సోషల్ మీడియాలో వైరల్ అవుతున్నాయి.

అసలు కారణాలు ఏమిటి?

నిపుణుల ప్రకారం హాంకాంగ్‌లో గృహ సంక్షోభానికి ప్రధాన కారణాలు ఇవి:

• నగరంలో భూమి పరిమితంగా ఉండటం
• జనసాంద్రత ఎక్కువగా ఉండటం
• రియల్ ఎస్టేట్ ధరలు వేగంగా పెరగడం
• ప్రభుత్వ గృహ నిర్మాణం తక్కువగా ఉండటం

ఈ కారణాల వల్ల మధ్యతరగతి, తక్కువ ఆదాయ వర్గాల ప్రజలు తీవ్రమైన ఇబ్బందులు ఎదుర్కొంటున్నారు.

Hong Kong Housing Crisis : భారత్‌లోనూ ఇదే పరిస్థితి వస్తుందా?

నగరాల విస్తరణ వేగంగా కొనసాగుతున్న నేపథ్యంలో భారత్‌లో కూడా ఇలాంటి సమస్యలు వచ్చే అవకాశాన్ని నిపుణులు పూర్తిగా కొట్టిపారేయడం లేదు. ఇప్పటికే Mumbai, Delhi, Bengaluru, Hyderabad వంటి మెట్రో నగరాల్లో ఇళ్ల ధరలు భారీగా పెరిగాయి. మరింత పెరుగుతున్నాయి.

ప్రత్యేకంగా ముంబైలో చిన్న “చాల్” గదులు, అద్దె గదులు ఎక్కువగా ఉండటం ఈ సమస్యకు ఉదాహరణగా నిపుణులు చెబుతున్నారు. నగరాల జనాభా పెరుగుతూ ఉండటం, ఉద్యోగ–ఉపాధి కోసం గ్రామాల నుంచి పెద్ద సంఖ్యలో వలసలు రావడం, అందుబాటులో గృహాలు తక్కువగా ఉండటం వంటి అంశాలు భవిష్యత్తులో భారత నగరాల్లోనూ గృహ సంక్షోభాన్ని పెంచే ప్రమాదం ఉందని హెచ్చరిస్తున్నారు.

పరిష్కారం ఏమిటి?

నగరాల్లో ఇలాంటి పరిస్థితులు రాకుండా ఉండాలంటే ప్రభుత్వాలు పెద్ద ఎత్తున చౌక గృహ నిర్మాణ ప్రాజెక్టులు చేపట్టాలని నిపుణులు సూచిస్తున్నారు. అలాగే పట్టణ ప్రణాళికను సక్రమంగా అమలు చేయడం, అద్దె నియంత్రణ విధానాలను బలోపేతం చేయడం, మౌలిక సదుపాయాలను విస్తరించడం అవసరమని చెబుతున్నారు.

Virat Kohli 9000 IPL Runs : 9 వేల మైలురాయిని దాటిన కింగ్​.. ఐపీఎల్ చరిత్రలో కోహ్లీ సరికొత్త రికార్డు!