అక్షరటుడే, వెబ్డెస్క్: Pakistan Suicide Bombing | పాకిస్తాన్లోని వాయవ్య ప్రాంతమైన ఖైబర్ పఖ్తున్ఖ్వా ప్రావిన్స్లో భారీ బాంబు పేలుడు సంభవించింది. డెరా ఇస్మాయిల్ ఖాన్ జిల్లాలోని దారాజిందా ప్రాంతంలోగల అమన్ మేలా వద్ద ఉన్న ఒక పోలీసు చెక్పోస్టును లక్ష్యంగా చేసుకుని శనివారం ఈ ఆత్మాహుతి దాడి జరిగింది. ఈ ప్రమాదంలో కనీసం 12 మంది ప్రాణాలు కోల్పోగా, మరో 30 మంది తీవ్రంగా గాయపడ్డారు.
Pakistan Suicide Bombing | చెక్పోస్టును బలంగా ఢీ కొట్టి..
స్థానిక పోలీసుల సమాచారం ప్రకారం.. పేలుడు పదార్థాలతో నిండిన ఒక వాహనాన్ని దుండగులు వేగంగా వచ్చి చెక్పోస్టును బలంగా ఢీకొట్టారు. ఈ పేలుడుకు ముందు అక్కడ కాల్పుల శబ్దాలు కూడా వినిపించినట్లు సమాచారం.
ఈ ఘటనలో మరణించిన, గాయపడిన వారిలో ఎక్కువ మంది పోలీసు అధికారులు, కస్టమ్స్ సిబ్బంది, అటవీ శాఖ ఉద్యోగులతో పాటు రహదారిపై వెళ్తున్న సాధారణ పౌరులు కూడా ఉన్నారని స్థానిక పోలీసు చీఫ్ సఫ్దర్ బలోచ్ వెల్లడించారు.
సమాచారం అందుకున్న వెంటనే ‘రెస్క్యూ 1122’ బృందాలు సంఘటనా స్థలానికి చేరుకుని సహాయక చర్యలు చేపట్టాయి. గాయపడిన వారిని ప్రాథమిక చికిత్స అనంతరం హుటాహుటిన సమీపంలోని ఆసుపత్రులకు తరలించారు.
Pakistan Suicide Bombing | తెహ్రీక్-యే-తాలిబాన్ పాకిస్తాన్పై అనుమానాలు
ఈ దాడికి సంబంధించి ఇప్పటివరకు ఏ సాయుధ ముఠా అధికారికంగా బాధ్యత వహించలేదు. అయితే, ఈ ప్రాంతంలో క్రియాశీలంగా ఉన్న ‘తెహ్రీక్-యే-తాలిబాన్ పాకిస్తాన్’ (TTP) గ్రూప్పైనే అనుమానాలు వ్యక్తమవుతున్నాయి. సంఘటనా స్థలం దక్షిణ వజీరిస్తాన్కు దగ్గరగా ఉండటం, నిరంతరం భద్రతా బలగాలు ఉండే ప్రాముఖ్యత కలిగిన చెక్పోస్ట్ కావడం వల్లనే దీనిని లక్ష్యంగా చేసుకున్నట్లు భావిస్తున్నారు.
గత కొంతకాలంగా పాకిస్తాన్లో సాయుధ దాడులు పెరుగుతుండగా, ఆఫ్ఘనిస్తాన్ సరిహద్దుల కేంద్రంగా టిటిపి తన కార్యకలాపాలను సాగిస్తోందని పాక్ ప్రభుత్వం ఆరోపిస్తోంది. ఈ పేలుడు ఘటన అనంతరం భద్రతా దళాలు ఆ ప్రాంతాన్ని తమ అదుపులోకి తీసుకుని గాలింపు చర్యలు ముమ్మరం చేశాయి.
