అక్షరటుడే వెబ్డెస్క్: Chidambaram Secret | మన దైనందిన జీవితంలో ఏదైనా విషయం అంతుచిక్కనప్పుడు లేదా తీవ్రమైన రహస్యంగా ఉన్నప్పుడు “అదొక చిదంబర రహస్యం” అని అనడం సర్వసాధారణం. కాలక్రమేణా ఇది ఒక జాతీయంగా మారిపోయినప్పటికీ, ఈ మాట వెనుక వైదిక సంప్రదాయం, లోతైన ఆధ్యాత్మిక తత్త్వం దాగి ఉన్నాయి. తమిళనాడులోని ప్రసిద్ధ చిదంబరం నటరాజ స్వామి దేవాలయం ( Nataraja Temple ) నుంచి ఈ పదం ఉద్భవించింది. ఇంతకీ ఆ గర్భగుడి తెర వెనుక ఏముంది? ఆ రహస్యం వెనుక ఉన్న అసలు సత్యం ఏమిటో తెలుసుకుందాం.
Chidambaram Secret | పంచభూతాల్లో ఆకాశ క్షేత్రం..
హిందూ తత్వశాస్త్రంలో పంచభూతాలైన పృథ్వి, నీరు, అగ్ని, వాయువు, ఆకాశాలకు అత్యంత ప్రాధాన్యత ఉంది. చిదంబరం క్షేత్రం పంచభూతాలలో ఆకాశ క్షేత్రంగా పూజలందుకుంటోంది. మిగిలిన క్షేత్రాల్లో శివుడు లింగ రూపంలో కనిపిస్తే, చిదంబరంలో మాత్రం స్వామివారు నిరాకారుడిగా, అంటే ఆకాశ స్వరూపంలో (శూన్యంలో) కొలువై ఉంటారు. ఈ ఆలయ గర్భగుడిలో నటరాజ స్వామికి కుడి వైపున ఎల్లప్పుడూ ఒక తెర వేసి ఉంటుంది. అర్చకులు ఆ తెరను తొలగించి హారతి ఇచ్చినప్పుడు అక్కడ భౌతికంగా ఎలాంటి విగ్రహం గానీ, శివలింగం గానీ కనిపించవు. కేవలం ఖాళీ స్థలంలో వేలాడుతున్న బంగారు బిల్వపత్రాల మాల మాత్రమే దర్శనమిస్తుంది. కంటికి ఏ విగ్రహమూ కనిపించకుండా శూన్యమే పరమాత్మ స్వరూపమని చాటిచెప్పడమే ఇక్కడి అసలైన రహస్యం.
ఆధ్యాత్మిక పరిభాషలో ‘చిత్’ అంటే చైతన్యం లేదా జ్ఞానం అని, ‘అంబరం’ అంటే ఆకాశం అని అర్థం. అంటే జ్ఞానమే ఆకాశ రూపంలో ఉందనే నిజాన్ని ఇది తెలియజేస్తుంది. గర్భగుడిలోని తెర మనుషుల్లో ఉండే అజ్ఞానం లేదా మాయకు సంకేతం. మనలోని అజ్ఞానమనే తెర తొలగిపోయినప్పుడే ఆ పరమాత్మ చైతన్యాన్ని దర్శించగలమనే గొప్ప సందేశాన్ని ఈ క్షేత్రం ఇస్తుంది.
Chidambaram Secret | పౌరాణిక నేపథ్యం..
తారకావనంలో రుషులకు తపోబలంపై అహంకారం పెరిగినప్పుడు, వారి గర్వం అణచడానికి శివుడు భిక్షాటన మూర్తిగా, విష్ణువు మోహినిగా వెళ్లారు. రుషులు శివుడిపైకి పాములు, పులి, అపస్మారక రాక్షసుడిని ప్రయోగించగా.. శివుడు ఆ పాములను ఆభరణాలుగా ధరించి, రాక్షసుడిని తన కుడికాలితో తొక్కి పెట్టి ఆనంద తాండవం చేశాడు. ఆ తర్వాత రుషులకు జ్ఞానోదయమై స్వామికి శరణాగతులయ్యారు. అనంతరం పతంజలి, వ్యాఘ్రపాద మహర్షుల కోరిక మేరకు శివుడు చిదంబరంలో ఆనంద తాండవ ముద్రలో ఆకాశ రూపంలో శాశ్వతంగా కొలువై ఉంటానని వరమిచ్చారు. ఆ శూన్యంలోనే దైవత్వం నిక్షిప్తమై ఉందనే సత్యాన్ని చాటడమే చిదంబర రహస్యంలోని పరమ సత్యం.
ఇది కూడా చదవండి: Philippines Migration Policy | ఫిలిప్పీన్స్ మైగ్రేషన్ పాలసీపై ఎన్నారై అడ్వైజరీ కమిటీ అధ్యయనం
