అక్షరటుడే వెబ్డెస్క్: India UK FTA | భారత్, బ్రిటన్ దేశాల మధ్య ఎంతోకాలంగా ఎదురుచూస్తున్న చారిత్రాత్మక స్వేచ్ఛా వాణిజ్య ఒప్పందం (FTA) ఎట్టకేలకు నేటి నుండి అమల్లోకి వచ్చింది. జీ7 సదస్సులో భారత ప్రధాని నరేంద్ర మోడీ ( Narendra Modi ), బ్రిటన్ ప్రధాని కీర్ స్టార్మర్ మధ్య జరిగిన చర్చల ఫలితంగా, 2030 నాటికి ఇరు దేశాల మధ్య వాణిజ్యాన్ని 100 బిలియన్ డాలర్లకు పెంచే లక్ష్యంతో ఈ ఒప్పందం రూపుదిద్దుకుంది. ఈ ఒప్పందం ప్రకారం, భారత్ నుండి బ్రిటన్కు ఎగుమతి అయ్యే 99% పైగా వస్తువులపై యూకే ప్రభుత్వం పూర్తి సుంకం రాయితీ (Zero Duty) కల్పించింది. దీనివల్ల వస్త్రాలు, చేనేత ఉత్పత్తులు, తోలు వస్తువులు, రత్నాలు, ఆభరణాలు , ప్యాక్డ్ ఫుడ్స్ వంటి భారతీయ ఉత్పత్తులు బ్రిటన్ మార్కెట్లో తక్కువ ధరకు లభిస్తాయి. తద్వారా చైనా వంటి దేశాల ఉత్పత్తులతో భారతీయ వస్తువులు ధీటుగా పోటీపడనున్నాయి.
India UK FTA | ఉద్యోగులకు ‘సోషల్ సెక్యూరిటీ’ వెసులుబాటు..
సేవల రంగంలో (Services Sector) ఈ ఒప్పందం భారతీయులకు పెద్ద ఊరటనిచ్చింది. బ్రిటన్లో పనిచేసే ఐటీ నిపుణులు, ఇంజనీర్లు, డాక్టర్లకు ఉపాధి అవకాశాలు సులభతరం అవుతాయి. ముఖ్యంగా, ‘సోషల్ సెక్యూరిటీ అగ్రిమెంట్’ ప్రకారం, యూకేలో తాత్కాలిక ప్రాజెక్టుల కోసం పనిచేసే భారతీయ ఉద్యోగులు, రెండు దేశాల్లో సామాజిక భద్రతా పన్నులు (Double Contribution) చెల్లించాల్సిన అవసరం ఇకపై ఉండదు. ఇది భారతీయ కంపెనీలకు , ఉద్యోగులకు భారీగా ఖర్చును ఆదా చేస్తుంది.
India UK FTA | భారత మార్కెట్లో తగ్గనున్న ధరలు..
బ్రిటన్ నుండి భారతదేశానికి దిగుమతి అయ్యే ఉత్పత్తులపై పన్నులు తగ్గడంతో, మన దేశంలో కొన్ని వస్తువుల ధరలు గణనీయంగా దిగిరానున్నాయి. ముఖ్యంగా బ్రిటీష్ తయారీ యంత్రాలు, విడిభాగాలు, లగ్జరీ కార్లు , బ్రిటన్ బ్రాండెడ్ ఆహార పదార్థాలు, చాక్లెట్లు, పండ్ల ధరలు భారతీయ వినియోగదారులకు మరింత అందుబాటులోకి రానున్నాయి. ఈ ఒప్పందం ఇరు దేశాల వాణిజ్య సంబంధాలను కొత్త శిఖరాలకు తీసుకెళ్లడమే కాకుండా, భారతీయ ఎగుమతిదారులకు , పారిశ్రామిక రంగానికి గొప్ప ప్రోత్సాహకాన్ని అందించనుంది.
ఇది కూడా చదవండి: Madhapur Murder Case | ప్రేమ వ్యవహారం.. మాదాపూర్లో యువకుడి దారుణ హత్య
