Moscow Drone Attack| రష్యాపై ఉక్రెయిన్ ప్రతీకార దాడి.. ఒక భారతీయుడు మృతి, మరో ముగ్గురికి గాయాలు

అక్షరటుడే వెబ్‌డెస్క్:Moscow Drone Attack|రష్యా రాజధాని మాస్కోతో పాటు దాని పరిసర ప్రాంతాలపై ఉక్రెయిన్ ఆదివారం రాత్రి ఒక్కసారిగా భారీ డ్రోన్ దాడికి పాల్పడింది. ఇటీవలి కాలంలో జరిగిన అతిపెద్ద దాడుల్లో ఇది ఒకటిగా నిలిచింది. ఈ దాడి కారణంగా మాస్కో నగరంలో సైరన్లు మోగడంతో పాటు పలుచోట్ల పేలుళ్లు సంభవించాయి. డ్రోన్ల శిథిలాలు నివాస ప్రాంతాలపై పడటంతో తీవ్ర నష్టం వాటిల్లింది.

Moscow Drone Attack|భారతీయుడి మృతి..

ఈ దాడిలో రష్యాలోని మాస్కో ప్రాంతంలో పనిచేస్తున్న ఒక భారతీయ కార్మికుడు దుర్మరణం పాలయ్యాడు. మరో ముగ్గురు భారతీయులు తీవ్రంగా గాయపడ్డారు. ఈ విషయాన్ని రష్యాలోని భారత రాయబార కార్యాలయం (Embassy of India) ధృవీకరించింది. రాయబార కార్యాలయ అధికారులు వెంటనే ఘటనా స్థలానికి చేరుకుని, ఆసుపత్రిలో చికిత్స పొందుతున్న బాధితులను పరామర్శించారు. మరణించిన భారతీయుడి కుటుంబానికి సంతాపం ప్రకటించిన ఎంబసీ, బాధిత కార్మికులకు అవసరమైన అన్ని రకాల సహాయాన్ని అందిస్తామని తెలిపింది.

Moscow Drone Attack|వందలాది డ్రోన్లను కూల్చేసిన రష్యా..

గడిచిన 24 గంటల్లో దేశవ్యాప్తంగా ఉక్రెయిన్‌కు చెందిన దాదాపు 1,000 కి పైగా డ్రోన్లను తమ రక్షణ వ్యవస్థలు అడ్డుకున్నట్లు రష్యా రక్షణ మంత్రిత్వ శాఖ వెల్లడించింది. కేవలం మాస్కో నగరాన్ని లక్ష్యంగా చేసుకుని వచ్చిన 81 డ్రోన్లను కూల్చివేసినట్లు ఆ నగర మేయర్ తెలిపారు.

Moscow Drone Attack|నివాసాలపై పడ్డ శిథిలాలు..

ఈ దాడుల వల్ల జరిగిన ప్రమాదాల్లో మొత్తం నలుగురు ప్రాణాలు కోల్పోయారు. మాస్కో ఉత్తర ప్రాంతంలోని ఖిమ్కిలో డ్రోన్ శిథిలాలు ఒక ఇ ఇంటిపై పడటంతో ఒక మహిళ మరణించింది. మైతిష్చి జిల్లాలోని పోగోరెల్కి గ్రామంలో ఇద్దరు పురుషులు ప్రాణాలు కోల్పోయారు. ఉక్రెయిన్ సరిహద్దుల్లోని బెల్గోరోడ్ ప్రాంతంలో మరొకరు మరణించారు. మాస్కో చమురు శుద్ధి కర్మాగారం (ఆయిల్ రిఫైనరీ) సమీపంలో కూడా కొందరు గాయపడినట్లు సమాచారం. అయితే, ఈ కర్మాగారానికి ఎటువంటి పెద్ద నష్టం జరగలేదని, అది యథావిధిగా పనిచేస్తోందని అధికారులు స్పష్టం చేశారు.

Moscow Drone Attack|ఉక్రెయిన్ ప్రతీకార చర్య..

కొద్దిరోజుల క్రితం ఉక్రెయిన్ రాజధాని కీవ్‌పై రష్యా అత్యంత ఘోరమైన వైమానిక దాడులు జరిపింది. ఆ దాడులకు ప్రతీకారం తీర్చుకుంటామని ఉక్రెయిన్ అధ్యక్షుడు వోలోడిమిర్ జెలెన్స్కీ గతంలోనే హెచ్చరించారు. ఆ హెచ్చరికలకు అనుగుణంగానే ఉక్రెయిన్ ఈ భారీ ప్రతీకార దాడికి పాల్పడినట్లు తెలుస్తోంది. ఈ రెండు దేశాల మధ్య యుద్ధం ప్రారంభమై ఇప్పటికే నాలుగేళ్లు దాటిపోవడం గమనార్హం.

ఇది కూడా చదవండి: Bandi Sanjay Dismissal|కేంద్రమంత్రి బండి సంజయ్‌ను వెంటనే బర్తరఫ్‌ చేయాలి: కేటీఆర్‌