అక్షరటుడే వెబ్‌డెస్క్: Smartphone Price Hike | కొత్త స్మార్ట్‌ఫోన్ కొనాలని భావిస్తున్నారా? అయితే ఎక్కువ కాలం వేచి చూడకుండా ఇప్పుడే కొనుగోలు చేయడం మంచిదని ప్రముఖ అంతర్జాతీయ రీసెర్చ్ సంస్థ జెఫరీస్ (Jefferies) హెచ్చరిస్తోంది. ఆర్టిఫిషియల్ ఇంటెలిజెన్స్ (AI) రంగంలోకి భారీగా పెరిగిన పెట్టుబడుల ప్రభావం ప్రత్యక్షంగా మొబైల్ ఫోన్ల ధరలపై పడనుంది. ముఖ్యంగా ఎంట్రీ-లెవల్, బడ్జెట్ స్మార్ట్‌ఫోన్ల ధరలు 30 శాతం వరకు పెరిగే అవకాశం ఉందని నివేదిక స్పష్టం చేస్తోంది.
Smartphone Price Hike | చిప్‌ల కొరత..
ప్రపంచవ్యాప్తంగా ఏఐ కంపెనీలు భారీ పరిమాణంలో మెమరీ చిప్‌లను కొనుగోలు చేస్తుండటంతో, స్మార్ట్‌ఫోన్ తయారీ సంస్థలకు వాటి సరఫరా గణనీయంగా తగ్గింది.
పెరిగిన నిధుల వెల్లువ: 2027 నాటికి ఏఐ రంగంలో మెమరీ చిప్‌ల డిమాండ్ వాటా 60 శాతానికి చేరనుండగా, ఆయా కంపెనీలు సుమారు 1.5 లక్షల కోట్ల డాలర్ల పెట్టుబడులు పెట్టాలని యోచిస్తున్నాయి.
మెమరీ వ్యయం పెరగడం: 2025లో ఒక్కో ఫోన్ మెమరీ యూనిట్ వ్యయం 20 డాలర్లు కాగా, అది ప్రస్తుతం ఏకంగా 65 డాలర్లకు (దాదాపు మూడింతలు) పెరిగింది.
బడ్జెట్ ఫోన్లపై భారం: 200 డాలర్ల లోపు లభించే ఆండ్రాయిడ్ ఫోన్ల తయారీ వ్యయంలో ఒక్క మెమరీ చిప్‌ల వాటాయే 60 శాతం ఉంటుంది. దాంతో ఈ బడ్జెట్ సెగ్మెంట్‌పై ధరల పెంపు ప్రభావం తీవ్రంగా ఉండనుంది.
Smartphone Price Hike | ఫోన్ల విక్రయాలు..
ఈ మెమరీ సంక్షోభం కారణంగా ప్రపంచ స్మార్ట్‌ఫోన్ మార్కెట్‌లో తక్కువ ధర కలిగిన ఫోన్ల విక్రయాల వాటా 2025లో 42 శాతంగా ఉండగా, 2026 నాటికి అది 24 శాతానికి పడిపోవచ్చని అంచనా వేస్తున్నారు. అదే సమయంలో 600 డాలర్ల కంటే ఎక్కువ ధర ఉండే ప్రీమియం ఫోన్ల వాటా 29 శాతం నుంచి 38 శాతానికి పెరుగుతుందని విశ్లేషిస్తున్నారు. నాణ్యమైన బడ్జెట్ ఫోన్ల లభ్యత తగ్గడంతో కొనుగోలుదారులు కొత్త ఫోన్ల కొనుగోలును వాయిదా వేయడం లేదా సెకండ్ హ్యాండ్ (Refurbished) ఫోన్ల వైపు మొగ్గు చూపే అవకాశాలు స్పష్టంగా కనిపిస్తున్నాయి.
ఇది కూడా చదవండి: Motorola Signature 27 | అద్భుతమైన ఫీచర్స్‌తో మోటోరోలా నుంచి ప్రీమియం ఫోన్.. భారత్‌లో లాంచింగ్ ఎప్పుడంటే?
