అక్షరటుడే, వెబ్డెస్క్: Windfall Tax Cut | అంతర్జాతీయ మార్కెట్లలో ఇంధన ధరలు దేశీయ మార్కెట్ (Domestic Market)లో ధరల కంటే అధికంగా ఉన్న సమయంలో ఎగుమతిదారులు ఎగుమతులకు ప్రాధాన్యత ఇచ్చే అవకాశాలు ఉంటాయి.
ఈ నేపథ్యంలో ఎగుమతిదారులు పొందే అదనపు లాభాలను నియంత్రించేందుకు కేంద్ర ప్రభుత్వం విండ్ఫాల్ ట్యాక్స్ విధానాన్ని అమలు చేస్తోంది. మార్కెట్లో అసాధారణ పరిస్థితుల కారణంగా ఏర్పడే అనూహ్య లాభాల్లో కొంత భాగాన్ని ప్రభుత్వ ఆదాయంగా మళ్లించడం ఈ పన్ను ప్రధాన ఉద్దేశం. ఇంధన ఎగుమతులపై విండ్ఫాల్ ట్యాక్స్ను మొదటిసారిగా 2022లో విధించారు.
Windfall Tax Cut | పక్షం రోజులకోసారి సమీక్ష..
అంతర్జాతీయ ముడిచమురు, పెట్రోల్, డీజిల్, ఏటీఎఫ్ సగటు ధరల ఆధారంగా ప్రతి పక్షం రోజులకు ఒకసారి విండ్ఫాల్ ట్యాక్స్ రేట్లను సమీక్షిస్తారు. ఇటీవల మే 16న ఈ పన్నును పెంచారు. పెట్రోల్పై ఎగుమతి సుంకం లీటరుకు రూ. 3, డీజిల్పై రూ. 16.5, ఏటీఎఫ్పై రూ. 16గా ఖరారు చేశారు. తాజాగా ముడి చమురు ధరలు దిగిరావడంతో ఈ ట్యాక్స్ ను తగ్గిస్తూ కేంద్ర ప్రభుత్వం (Central Government) నిర్ణయం తీసుకుంది. పెట్రోల్పై విండ్ఫాల్ గెయిన్స్ ట్యాక్స్ను లీటరుకు రూ. 3 నుంచి రూ. 1.50కు, డీజిల్పై లీటరుకు రూ.16.50 నుంచి రూ.13.50కు తగ్గించారు. ఏవియేషన్ టర్బైన్ ఫ్యుయల్ (ఏటీఎఫ్ )పై విండ్ఫాల్ పన్నును లీటరుకు రూ. 16 నుంచి రూ .9.50కు తగ్గిస్తున్నట్లు నోటిఫికేషన్లో పేర్కొన్నారు.
Windfall Tax Cut | ఎవరికి లాభమంటే..
ఎగుమతులపై మాత్రమే విండ్ఫాల్ గెయిన్స్ ట్యాక్స్ ఉంటుంది. కాబట్టి ఈ ట్యాక్స్ పెంచినా, తగ్గించినా దేశీయ వినియోగదారులపై ఎలాంటి ప్రభావం ఉండదు. పన్ను తగ్గించడం వల్ల రిలయన్స్ ఇండస్ట్రీస్, నయారా ఎనర్జీ వంటి ప్రధాన ప్రైవేట్ చమురు శుద్ధి సంస్థలతో పాటు ఓఎన్జీసీ, ఆయిల్ ఇండియా వంటి ప్రభుత్వ రంగ ఉత్పత్తి సంస్థలకు అంతర్జాతీయ వ్యాపారంలో ఉపశమనం లభించనుంది. సోమవారంనాటి ట్రేడింగ్లో ఈ కంపెనీల షేర్లు యాక్టివ్ గా ఉండే అవకాశాలున్నాయి.
ఇది కూడా చదవండి..: NSE Trading Hours | ట్రేడింగ్ సమయం మారిందోచ్ !
