అక్షరటుడే వెబ్డెస్క్: Asif Malbari GCPL | ప్రముఖ కన్స్యూమర్ గుడ్ల సంస్థ ‘గొద్రేజ్ కన్స్యూమర్ ప్రొడక్ట్స్ లిమిటెడ్’ (GCPL) కొత్త మేనేజింగ్ డైరెక్టర్ (ఎండీ) , చీఫ్ ఎగ్జిక్యూటివ్ ఆఫీసర్ (సీఈఓ)గా ఆసిఫ్ మల్బరిని నియమించినట్లు ఆ సంస్థ బోర్డు ఆఫ్ డైరెక్టర్స్ ప్రకటించింది. ఈ నియామకం తక్షణమే అమల్లోకి రానుంది. ఇప్పటివరకు ఈ బాధ్యతలు నిర్వర్తించిన సుధీర్ సీతపతి ఆ పదవి నుంచి వైదొలగనుండగా, ఆయన స్థానంలో ఆసిఫ్ మల్బరి బాధ్యతలు చేపట్టనున్నారు.
Asif Malbari GCPL | ఆసిఫ్ మల్బరి అనుభవం..
ఎఫ్ఎంసీజీ (FMCG), ఆటోమొబైల్ రంగాలలో జీసీపీఎల్ (GCPL), టాటా మోటార్స్, హిందుస్థాన్ యునిలీవర్ సంస్థలలో ఆసిఫ్ మల్బరికి మూడు దశాబ్దాల సుదీర్ఘ అనుభవం ఉంది. జీసీపీఎల్ గ్లోబల్ సీఎఫ్ఓగా ఆయన వ్యాపార వ్యూహాలను ప్రత్యక్షంగా పర్యవేక్షించడంతో పాటు, వృద్ధిని వేగవంతం చేయడంలో కీలక పాత్ర పోషించారు. ముఖ్యంగా ఆఫ్రికా వ్యాపారంలో ఆయన అద్భుతమైన మార్పులు తీసుకువచ్చారు. ఎయిర్ కేర్ కేటగిరీని విజయవంతంగా ప్రారంభించడం ద్వారా ఆఫ్రికాలో ఎఫ్ఎంసీజీ పోర్ట్ఫోలియోను విస్తరించారు. ఫలితంగా జీసీపీఎల్ ఆఫ్రికా ఈబిటా (EBITDA) మార్జిన్లు 2024 ఆర్థిక సంవత్సరంలో సుమారు 9 శాతంగా ఉండగా, 2026 నాటికి అది 15 శాతానికి గణనీయంగా పెరిగాయి.
జీసీపీఎల్లో చేరడానికి ముందు ఆసిఫ్.. ‘టాటా ప్యాసింజర్ ఎలక్ట్రిక్ మొబిలిటీ’ సీఎఫ్ఓగా, ‘టాటా మోటార్స్ ప్యాసింజర్ వెహికల్స్’ డైరెక్టర్గా సేవలందించారు. ఈవీ (EV) వ్యాపార పునర్వ్యవస్థీకరణ, 1 బిలియన్ డాలర్ల నిధుల సేకరణలో ఆయన కీలక భూమిక పోషించారు. అంతకుముందు హిందుస్థాన్ యునిలీవర్లో వివిధ ఫైనాన్స్, బిజినెస్ హోదాల్లో పనిచేశారు. చార్టర్డ్ అకౌంటెంట్ (CA), కంపెనీ సెక్రటరీ (CS) అయిన ఆసిఫ్.. సీఏ ఇంటర్మీడియట్ , ఫైనల్ పరీక్షల్లో ఆలిండియా ఫస్ట్ ర్యాంక్ సాధించడం విశేషం.
Asif Malbari GCPL | నిసా గొద్రేజ్ స్పందన..
“జీసీపీఎల్ వ్యూహాత్మక, కార్యాచరణ శైలిపై ఆసిఫ్ మల్బరికి అద్భుతమైన పట్టు ఉంది. ఆయన మా ఆఫ్రికా వ్యాపారాన్ని అద్భుతంగా తీర్చిదిద్దారు. మా తదుపరి వృద్ధికి ఇలాంటి క్రమశిక్షణతో కూడిన విధానమే ఎంతో అవసరం. ఆసిఫ్ ఎంతో నిజాయితీ, వినయంతో నాయకత్వం వహిస్తారు. మా బలమైన బృందంతో కలిసి ఆయన జీసీపీఎల్ వృద్ధిని మరింత వేగవంతం చేస్తారన్న పూర్తి విశ్వాసం బోర్డుకు ఉంది. అలాగే గత ఐదు సంవత్సరాలుగా జీసీపీఎల్కు విశేష సేవలందించిన సుధీర్ చేసిన సాహసోపేతమైన ఆలోచనలకు కృతజ్ఞతలు తెలుపుతూ, ఆయన భవిష్యత్తు ప్రయత్నాలు విజయవంతం కావాలని కోరుకుంటున్నాం” అని నిసా గొద్రేజ్ పేర్కొన్నారు.
Asif Malbari GCPL | కొత్త బాధ్యతలపై ఆసిఫ్ మల్బరి మాటలు..
“గొద్రేజ్ కన్స్యూమర్ ప్రొడక్ట్స్ ఎప్పుడూ నమ్మకం, నూతన ఆవిష్కరణలకు మారుపేరుగా నిలిచింది. ఈ బాధ్యతలను తనకు అప్పగించిన నిసా గారికి, బోర్డుకు ధన్యవాదాలు. మా అద్భుతమైన బృందంతో కలిసి కంపెనీ అంచనాలను అందుకోవడానికి, కొత్త కేటగిరీల వృద్ధిని వేగవంతం చేయడానికి కట్టుబడి ఉన్నాము. మా వద్ద అద్భుతమైన బ్రాండ్లు, విస్తృతమైన అవకాశాలు ఉన్నాయి. ఈ కొత్త ప్రయాణాన్ని ప్రారంభించడానికి ఎంతో ఉత్సాహంగా ఉన్నాను” అని ఆసిఫ్ మల్బరి తెలిపారు.
ఇది కూడా చదవండి: Prohibited Lands | నిషేధిత భూములపై ఆందోళన వద్దు.. మంత్రి పొంగులేటి భరోసా
