అక్షరటుడే వెబ్‌డెస్క్: Temple Hundi Donation | దైవ దర్శనం చేసుకున్న తర్వాత హుండీలో కానుకలు సమర్పించడం మన సంప్రదాయంలో అనాదిగా వస్తున్న ఆచారం. అయితే, హుండీలో ఎంత మొత్తం వేయాలి? ఎక్కువ డబ్బులు వేస్తేనే దైవానుగ్రహం దక్కుతుందా? అనే సందేహం చాలా మందిలో ఉంటుంది. నిజానికి భగవంతుడికి మనం సమర్పించే ధనం పరిమాణం ముఖ్యం కాదని, దాని వెనుక ఉన్న మనసు, ఆ సంపాదన పవిత్రత మాత్రమే ముఖ్యమని వేద పండితులు స్పష్టం చేస్తున్నారు.
Temple Hundi Donation | కోటి రూపాయలతో సమానం..
దేవునికి కానుకలు సమర్పించే విషయంలో మొత్తానికి కాకుండా, ఆ డబ్బును ఏ మార్గంలో సంపాదించారనేదే ముఖ్యం. కష్టపడి, న్యాయమైన పద్ధతిలో ఆర్జించిన సొమ్ము నుంచి కేవలం ఒక్క రూపాయి వేసినా అది కోటి రూపాయలతో సమానమైన ఫలాన్ని ఇస్తుంది. ఇతరులను మోసం చేసి, అక్రమ మార్గాల్లో సంపాదించిన లక్షల రూపాయలను హుండీలో వేసినా దైవ ప్రసన్నత లభించదు. భగవంతుడికి కావాల్సింది అంతరంగ పరిశుద్ధతే తప్ప అక్రమ సంపాదన కాదని గుర్తించాలి.
Temple Hundi Donation | అహంకారం లేని గుప్తదానం..
హుండీలో కానుకలు వేయడం అనేది భగవంతుడికి చేసే గుప్తదానం లాంటిది. నలుగురు చూస్తున్నారని గొప్పల కోసం, హోదా ప్రదర్శించుకోవడానికి కానుకలు వేయకూడదు. “నువ్వు ప్రసాదించిన సంపద నుంచే కొద్దిగా సమర్పిస్తున్నాను” అనే వినమ్రత, శరణాగతి భావంతో హుండీలో ధనాన్ని వేయాలి.
Temple Hundi Donation | శక్తికి తగినట్లుగా సమర్పణ..
శాస్త్రాల ప్రకారం ప్రతి ఒక్కరూ తమ సంపాదనలో కొంత భాగాన్ని దైవ సేవలకు కేటాయించాలి. అంతమాత్రాన ఆర్థిక స్థోమతకు మించి అప్పులు చేసి హుండీలో వేయాల్సిన అవసరం లేదు. అలా అని బాగా సంపాదన ఉండి హుండీలో వేసేటప్పుడు పిసినారితనం చూపడం కూడా సరికాదు. మన సామర్థ్యానికి తగినట్లుగా ఆలయ నిర్వహణ, నిత్యాన్నదానాల కోసం కానుకలు సమర్పిస్తే ఇంట్లో సిరిసంపదలు వర్ధిల్లుతాయి.
Temple Hundi Donation | ఈ పొరపాట్లు వద్దు..
చెల్లని, చిరిగిన నోట్లు: చాలామంది చెల్లని నాణేలు, చిరిగిన లేదా రంగులు అంటిన పనికిరాని నోట్లను హుండీలో వేస్తుంటారు. ఇది శాస్త్రరీత్యా అపచారంగా భావిస్తారు. ఎప్పుడూ శుభ్రమైన, చెలామణిలో ఉన్న నోట్లను మాత్రమే గౌరవంగా సమర్పించాలి. “నా కోరిక తీరితే అంత ఇస్తాను” అని దేవుడితో బేరసారాలు ఆడకూడదు. మనకు ఆయురారోగ్యాలు ఇస్తున్న ఆ దేవుడికి కృతజ్ఞతగా భక్తితో కానుక వేయాలి. భగవంతుడు ధనప్రియుడు కాదు, భావప్రియుడు. కుచేలుడు ప్రేమతో ఇచ్చిన గుప్పెడు అటుకులకే కృష్ణుడు ( Krishna ) సంతోషించినట్లుగా.. మనం సమర్పించే ధనం ఎంత అన్నది కాకుండా, దాని వెనుక ఉన్న స్వచ్ఛమైన భక్తి మాత్రమే దైవానికి ముఖ్యం.
ఇది కూడా చదవండి: ACB case | మెడికల్ లీవ్ల కోసం లంచం.. సీనియర్ అకౌంటెంట్పై ఏసీబీ కేసు
