అక్షరటుడే వెబ్డెస్క్: TCS InQuizitive 2026 | యువ విద్యార్థుల్లోని ఆలోచనా శక్తిని, సృజనాత్మకతను వెలికితీసేందుకు ప్రముఖ ఐటీ దిగ్గజం టాటా కన్సల్టెన్సీ సర్వీసెస్ (TCS) ప్రతిష్టాత్మకంగా నిర్వహిస్తున్న క్విజ్ పోటీల్లో భాగంగా హైదరాబాద్ ఎడిషన్ ఘనంగా ముగిసింది. హోరాహోరీగా సాగిన ఈ క్విజ్ పోటీలో ఆర్మీ పబ్లిక్ స్కూల్ (బొల్లారం) విద్యార్థులు కలేపు యశ్వర్ధన్, అనిరుధ్ రంగరాజన్ విజేతలుగా నిలిచారు. ఈ విజయంతో వారు జాతీయ స్థాయి సెమీఫైనల్స్కు అర్హత సాధించారు.
TCS InQuizitive 2026 | భారీ స్పందన..
హైదరాబాద్లో నిర్వహించిన ఈ పోటీలకు నగరంలోని 28 పాఠశాలల నుంచి మొత్తం 249 జట్లు ఉత్సాహంగా పాల్గొన్నాయి. సాంకేతికత, నూతన ఆవిష్కరణలకు కేంద్రమైన హైదరాబాద్ వేదికగా విద్యార్థులు తమ ప్రతిభను, టీమ్వర్క్ను ప్రదర్శించారు. ఈ కార్యక్రమానికి టీసీఎస్ కమ్యూనికేషన్స్, మీడియా, టెక్నాలజీ అండ్ సర్వీసెస్ ప్రెసిడెంట్ వి. రాజన్న , టీసీఎస్ హైదరాబాద్ డెలివరీ సెంటర్ హెడ్ చల్లా నాగ్ ముఖ్య అతిథులుగా హాజరయ్యారు.
TCS InQuizitive 2026 | ప్రత్యేక ఆకర్షణగా ఏఐ అనలిటిక్స్..
ఈ ఏడాది నిర్వహించిన టీసీఎస్ ఇన్క్విజిటివ్ (TCS InQuizitive) పోటీల్లో ఆర్టిఫిషియల్ ఇంటెలిజెన్స్ (AI) టెక్నాలజీని జోడించారు. నిజ-సమయ (real-time) ఏఐ ఆధారిత అనలిటిక్స్ ద్వారా ప్రతి రౌండ్ ముగిసిన తర్వాత విద్యార్థులు తమ పనితీరును విశ్లేషించుకోవడానికి, తప్పులను సరిదిద్దుకోవడానికి ఈ వేదిక సరికొత్త అనుభూతిని అందించింది. ఈ సందర్భంగా వి. రాజన్న మాట్లాడుతూ.. గత 28 ఏళ్లుగా ఈ వేదిక విద్యార్థుల్లోని జిజ్ఞాసను పెంపొందించడంలో, తరగతి గదికి మించి జ్ఞానాన్ని ఆర్జించడంలో కీలక పాత్ర పోషిస్తోందని ప్రశంసించారు. అలాగే చల్లా నాగ్ మాట్లాడుతూ.. విద్యార్థులు ప్రదర్శించిన ఆత్మవిశ్వాసం, నిరంతరం నేర్చుకోవాలనే తపన ఎంతో స్ఫూర్తిదాయకంగా ఉందని కొనియాడారు.
TCS InQuizitive 2026 | వివిధ రంగాలపై పట్టు..
8 నుండి 12 వ తరగతి చదువుతున్న విద్యార్థుల కోసం నిర్వహించే ఈ పోటీల్లో విద్య, వినోదం, క్రీడలు, బిజినెస్ ట్రెండ్స్, సోషల్ మీడియా వంటి అనేక అంశాలపై ప్రశ్నలు అడగడం జరిగింది. ముఖ్యంగా STEM (సైన్స్, టెక్నాలజీ, ఇంజనీరింగ్, మ్యాథ్స్) రంగాలకు ప్రాధాన్యతనిస్తూ.. కృత్రిమ మేధస్సు (AI), క్లౌడ్ కంప్యూటింగ్, ఆటోమేషన్, రోబోటిక్స్ వంటి అధునాతన టెక్నాలజీ అంశాలపై ప్రత్యేక దృష్టి పెట్టారు. దేశవ్యాప్తంగా పుణే, ఇండోర్, బెంగళూరు, హైదరాబాద్, చెన్నై, ముంబై సహా పలు ప్రధాన నగరాల్లో ఈ పోటీలు జరుగుతుండగా.. చివరిగా జరిగే నేషనల్ ఫైనల్స్లో దేశంలోని ప్రతిభావంతులైన విద్యార్థులు ‘టీసీఎస్ ఇన్క్విజిటివ్ నేషనల్ ఛాంపియన్స్ 2026’ టైటిల్ కోసం పోటీపడనున్నారు.
ఇది కూడా చదవండి: Panduga Sayanna | అధికారికంగా పండుగ సాయన్న జయంతి
