అక్షరటుడే వెబ్డెస్క్: World Heart Day 2026 | ప్రపంచ గుండె దినోత్సవం (World Heart Day 2026) పురస్కరించుకుని న్యూఢిల్లీలో ( Delhi ) ‘ఇల్నెస్ టు వెల్నెస్ ఫౌండేషన్’ ఆధ్వర్యంలో ‘హెల్తీ హార్ట్ ఫర్ ఎ హెల్తీ లైఫ్’ అనే థీమ్తో ప్రత్యేక సదస్సు నిర్వహించారు. మారుతున్న జీవనశైలి, ఒత్తిడి, కాలుష్యం కారణంగా పెరుగుతున్న గుండె జబ్బులను అరికట్టడంలో ముందస్తు పరీక్షలు, ఆరోగ్యకరమైన అలవాట్ల ప్రాముఖ్యతను ఈ సదస్సులో ప్రముఖ వైద్య నిపుణులు వివరించారు.
World Heart Day 2026 | నిపుణుల సూచనలు..
వాయు కాలుష్యం, శబ్ద కాలుష్యం, పెరుగుతున్న మానసిక ఒత్తిడి, మారుతున్న పని వేళలు గుండె ఆరోగ్యంపై తీవ్ర ప్రభావం చూపుతున్నాయని ప్రముఖ కార్డియాలజిస్ట్ డాక్టర్ టి.ఎస్. క్లెర్ పేర్కొన్నారు. గుండె సంబంధిత వ్యాధులను నివారించేందుకు దేశవ్యాప్తంగా ప్రత్యేక కార్యక్రమాలు మరింత బలపడాలని సూచించారు. గుండెపోటు వంటి అత్యవసర సమయాల్లో ప్రతి నిమిషం విలువైనదేనని పీఎస్ఆర్ఐ హార్ట్ ఇన్స్టిట్యూట్ చైర్మన్ డాక్టర్ కేకే తల్వార్ అన్నారు. వైద్య సహాయం అందేలోపు ప్రాణాలు కాపాడేందుకు ప్రజలందరికీ ‘సీపీఆర్’ (CPR) పై అవగాహన, శిక్షణ ఉండాలని కోరారు. కేవలం గుండె జబ్బు వచ్చిన తర్వాత చికిత్స తీసుకోవడం కాకుండా, రాకుండా ముందస్తు జాగ్రత్తలు తీసుకోవడంపై దృష్టి పెట్టాలని డాక్టర్ గణేష్ కుమార్ మణి తెలిపారు. రోజువారీ జీవితంలో చిన్న చిన్న ఆరోగ్యకరమైన మార్పులు దీర్ఘకాలంలో గుండెకు రక్షణ కల్పిస్తాయని పేర్కొన్నారు.
World Heart Day 2026 | ఆచరణ ముఖ్యం..
రోజువారీ ఆహారపు అలవాట్లు, శారీరక శ్రమ, ఒత్తిడి నిర్వహణ, తగినంత విశ్రాంతి మన గుండె ఆరోగ్యాన్ని నిర్ణయిస్తాయని ఇల్నెస్ టు వెల్నెస్ ఫౌండేషన్ అడ్వైజరీ కౌన్సిల్ చైర్మన్ అనిల్ రాజ్పుత్ తెలిపారు. కేవలం సమాచారం ఉండటం సరిపోదని, వాటిని ఆచరణలో పెట్టడమే అసలైన సవాల్ అని అమృత ఇన్స్టిట్యూట్ నిపుణులు డాక్టర్ గౌతమ్ సింగల్ అభిప్రాయపడ్డారు.
World Heart Day 2026 | సదస్సులో చర్చలు..
ఈ సదస్సులో భాగంగా రెండు ప్రత్యేక సెషన్లు నిర్వహించారు. రక్తపోటు (BP), బ్లడ్ షుగర్, కొలెస్ట్రాల్, లిపిడ్ ప్రొఫైల్ వంటి అంశాలను క్రమం తప్పకుండా పరీక్షించుకోవడం ద్వారా ముప్పును తొలి దశలోనే గుర్తించవచ్చని నిపుణులు సూచించారు. సమతుల్య ఆహారం, ఫిట్నెస్, ఆయుర్వేదం, ధ్యానం (Meditation), తగినంత నిద్ర గుండె ఆరోగ్యానికి ఎంతగానో దోహదపడతాయని వైద్యులు వివరించారు.
ఇది కూడా చదవండి: BIS Screen Protectors | స్మార్ట్ఫోన్ యూజర్లకు అలర్ట్.. స్క్రీన్ ప్రొటెక్టర్లపై కేంద్రం కీలక నిబంధన
