అక్షరటుడే, వెబ్డెస్క్: Fusion CX IPO | కస్టమర్ ఎక్స్‌పీరియన్స్ సేవలను అందించే ప్రముఖ సంస్థలలో ఫ్యూజన్ సీఎక్స్ కంపెనీ ఒకటి. వాయిస్, ఈమెయిల్, చాట్, సోషల్ మీడియా, మెసేజింగ్ వంటి వివిధ మాధ్యమాల ద్వారా అత్యున్నత స్థాయి, సంక్లిష్టమైన, సమగ్రమైన సీఎక్స్ సేవలను అందించడంలో ప్రసిద్ధి చెందింది.
టెలికాం మరియు యుటిలిటీస్, ఆరోగ్య సంరక్షణ మరియు లైఫ్ సైన్సెస్, హైటెక్ మరియు టెక్నాలజీ, బ్యాంకింగ్ మరియు ఫైనాన్స్ మరియు రిటైల్ వంటి వివిధ పరిశ్రమల అవసరాలకు అనుగుణంగా ఈ కంపెనీ కస్టమర్లను ఆకర్షించడం, కస్టమర్ సేవ, ఆర్డర్ పూర్తి చేయడంలో సహాయం, చెల్లింపులు, వసూళ్ల సేవలు, కస్టమర్లను నిలుపుకోవడం, సాంకేతిక మద్దతు మరియు డిజిటల్ పరిష్కారాలతో సహా అనేక రకాల సేవలను అందిస్తోంది.
Fusion CX IPO | 28 భాషల్లో కస్టమర్ సేవలు
ఫ్యూజన్ సీఎక్స్ మొత్తం 28 భాషల్లో సేవలను అందిస్తోంది. ఇంగ్లిష్, ఫ్రెంచ్, స్పానిష్, పోర్చుగీస్, జర్మన్, అరబిక్, మాండరిన్, ఇటాలియన్, హిందీ వంటి ప్రధాన భాషల్లో సేవలు అందుబాటులో ఉన్నాయి. 2026 జూన్ 30 నాటికి ఈ కంపెనీలో 13,735 మంది ఉద్యోగులున్నారు. 13 దేశాల్లోని 40 డెలివరీ సెంటర్ల ద్వారా కార్యకలాపాలు సాగుతున్నాయి. ఈ కంపెనీకి మొత్తం 208 మంది క్లయింట్లున్నారు.
Fusion CX IPO | రూ.702 కోట్ల ఐపీవో..
మార్కెట్ నుంచి రూ.702 కోట్లు సమీకరించాలన్న లక్ష్యంతో కంపెనీ ఐపీవో (IPO)కు వచ్చింది. ఇందులో తాజా షేర్లను జారీ చేయడం ద్వారా రూ.500 కోట్లు సమీకరించనుంది. మిగిలినది ఆఫర్ ఫర్ సేల్. ఐపీవో ద్వారా వచ్చిన ఆదాయంలో రూ.275 కోట్లను కంపెనీ, దాని అనుబంధ సంస్థలు తీసుకున్న కొన్ని అప్పులను తిరిగి చెల్లించడానికి లేదా ముందుగానే తీర్చడానికి ఉపయోగించనుంది. రూ.61 కోట్లను అనుబంధ సంస్థలైన ఓమైండ్ టెక్నాలజీస్ ఇంక్, ఓమైండ్ టెక్నాలజీస్ ప్రైవేట్ లిమిటెడ్‌లో పెట్టుబడిగా పెట్టనుంది. ఏఐ ఆధారంగా పనిచేసే ఆర్య, మైండ్‌వాయిస్ సహా ఐటీ టూల్స్‌ను మరింత మెరుగుపరచడానికి ఈ నిధులను వినియోగించనుంది. మిగిలిన మొత్తాన్ని ఇతర కంపెనీల కొనుగోళ్లు, వ్యాపార విస్తరణకు సంబంధించిన వ్యూహాత్మక కార్యక్రమాలు, సాధారణ కార్పొరేట్ అవసరాల కోసం ఉపయోగిస్తారు.
Fusion CX IPO | ధరల శ్రేణి..
కంపెనీ ఒక్కో షేరు ధరను రూ. 275 నుంచి రూ. 289గా నిర్ణయించింది. ఒక లాట్‌లో 51 షేర్లున్నాయి. రిటైల్ ఇన్వెస్టర్లు కనీసం ఒక లాట్ కోసం గరిష్ట ప్రైస్ బ్యాండ్ వద్ద రూ. 14,739 పెట్టుబడి పెట్టాల్సి ఉంటుంది.
కోటా : కంపెనీ ఐపీవోలో 75 శాతం క్యూఐబీలకు, 15 శాతం ఎన్ ఐఐలకు, మిగిలిన 10 శాతం రిటైల్ ఇన్వెస్టర్లకు కేటాయించారు.
జీఎంపీ : కంపెనీ షేర్లకు గ్రే మార్కెట్‌లో స్వల్ప డిమాండ్ ఉంది. ఒక్కో షేరు రూ. 34 ప్రీమియంతో ట్రేడవుతోంది. అంటే ఐపీవో అలాట్ అయినవారికి లిస్టింగ్ డే సమయంలో 11 శాతం లాభాలు వచ్చే అవకాశాలున్నాయి.
ముఖ్యమైన తేదీలు : ఈ ఐపీవో సబ్‌స్క్రిప్షన్ అక్టోబర్ 14న ప్రారంభం కానుంది. అక్టోబర్ 16న ముగుస్తుంది. యాంకర్ ఇన్వెస్టర్ల కోసం అక్టోబర్ 13న బిడ్డింగ్ నిర్వహించనున్నారు. అక్టోబర్ 19న రాత్రి షేర్స్ సంబంధించిన అలాట్‌మెంట్ స్టేటస్ వెల్లడి అయ్యే అవకాశాలున్నాయి. కంపెనీ షేర్లు అక్టోబర్ 22న బీఎస్ ఈ, ఎన్ ఎస్ ఈ లలో లిస్టవుతాయి.
ఇది కూడా చదవండి..: Oct 14 Market Analysis | మిక్స్‌డ్‌గా గ్లోబల్ మార్కెట్లు..నష్టాలతో ప్రారంభంకానున్న సెన్సెక్స్, నిఫ్టీ
