Wisconsin Plane Crash | అమెరికాలో ఘోర విమాన ప్రమాదం.. చిన్నారి సహా ఆరుగురి దుర్మరణం

అక్షరటుడే, వెబ్​డెస్క్: Wisconsin Plane Crash | అమెరికా America లో మరో విషాదకర విమాన ప్రమాదం చోటుచేసుకుంది. విస్కాన్సిన్ రాష్ట్రంలో మంగళవారం రాత్రి ఓ చిన్న విమానం కూలిపోవడంతో చిన్నారి సహా ఆరుగురు ప్రాణాలు కోల్పోయారు.

విస్కాన్సిన్ డెల్స్ సమీపంలోని అటవీ ప్రాంతంలో ఈ దుర్ఘటన జరిగినట్లు అధికారులు వెల్లడించారు. ప్రమాద సమయంలో విమానంలో ఉన్న వారంతా మృతి చెందగా, నేలపై ఉన్న ఇతరులకు ఎలాంటి గాయాలు కాలేదని సమాచారం.

Wisconsin Plane Crash | రాత్రి వేళ అడవిలో కూలిన విమానం

అధికారుల ప్రాథమిక సమాచారం ప్రకారం.. ఆరు సీట్లు, ఒక ఇంజిన్ కలిగిన పైపర్ PA-46 రకం చిన్న విమానం కెనోషా నుంచి మెనోమోనీకి ప్రయాణిస్తోంది. స్థానిక కాలమానం ప్రకారం రాత్రి సుమారు 9:30 గంటల సమయంలో డెల్లోనా పట్టణ పరిధిలోని అటవీ ప్రాంతంలో విమానం కూలిపోయింది. ఈ ప్రాంతం విస్కాన్సిన్ డెల్స్‌కు సుమారు 10 మైళ్ల దూరంలో ఉంది.

ప్రమాద సమాచారం అందుకున్న వెంటనే స్థానిక అధికారులు, అత్యవసర సహాయక బృందాలు ఘటనా స్థలానికి చేరుకున్నాయి. అయితే, విమానంలో ప్రయాణిస్తున్న ఆరుగురినీ ప్రాణాలతో రక్షించలేకపోయారు. మృతుల్లో ఓ చిన్నారి కూడా ఉన్నట్లు సమాచారం.

Wisconsin Plane Crash | విమానం కూలడానికి ముందు ఏం జరిగింది?

తాజా సమాచారం ప్రకారం.. ప్రమాదానికి ముందు విమానం సుమారు 24,000 అడుగుల ఎత్తులో ప్రయాణిస్తుండగా, రెక్కలపై మంచు పేరుకుపోతున్నట్లు పైలట్ ఎయిర్ ట్రాఫిక్ కంట్రోల్‌కు సమాచారం ఇచ్చారు. దీంతో విమానం ఎత్తును తగ్గించేందుకు అనుమతి కోరగా, అధికారులు అంగీకరించారు.

CJP Leaders | సీజేపీ నాయకులకు 5 రోజుల జైలు శిక్ష

ఆ తర్వాత విమానం కుడివైపునకు తిరుగుతూ వేగంగా కిందికి దిగడం ప్రారంభించిందని అమెరికా నేషనల్ ట్రాన్స్‌పోర్టేషన్ సేఫ్టీ బోర్డ్ (NTSB) ప్రాథమిక వివరాల్లో పేర్కొన్నట్లు వార్తా సంస్థలు వెల్లడించాయి. కొద్దిసేపటికే విమానంతో సంబంధాలు, ట్రాకింగ్ సమాచారం నిలిచిపోయాయి.

Wisconsin Plane Crash | వాతావరణమే కారణమా?

ప్రమాదం జరిగిన సమయంలో ఆ ప్రాంతంలో వర్షం, ఉరుములతో కూడిన వాతావరణం ఉన్నట్లు అధికారులు తెలిపారు. విమానం రెక్కలపై మంచు పేరుకుపోవడం కూడా ప్రమాదానికి దారితీసి ఉండవచ్చనే కోణంలో దర్యాప్తు కొనసాగుతోంది.

అయితే, ప్రమాదానికి ఖచ్చితమైన కారణం ఇంకా నిర్ధారణ కాలేదు. వాతావరణ పరిస్థితులు, విమానానికి సంబంధించిన వివరాలు, ఎయిర్ ట్రాఫిక్ కంట్రోల్‌తో జరిగిన సంభాషణలను అధికారులు పరిశీలిస్తున్నారు.

Wisconsin Plane Crash | FAA, NTSB దర్యాప్తు

ఈ ఘటనపై ఫెడరల్ ఏవియేషన్ అడ్మినిస్ట్రేషన్ (FAA), నేషనల్ ట్రాన్స్‌పోర్టేషన్ సేఫ్టీ బోర్డ్ (NTSB) దర్యాప్తు చేపట్టాయి. ఈ ప్రమాదంలో ఐదుగురు పెద్దలు, ఒక చిన్నారి మృతి చెందినట్లు అధికారులు ధ్రువీకరించారు.

మృతుల పేర్లను కుటుంబ సభ్యులకు సమాచారం అందించిన అనంతరం వెల్లడించనున్నట్లు తెలిపారు. ప్రమాదానికి దారితీసిన పరిస్థితులపై దర్యాప్తు పూర్తయిన తర్వాత మరిన్ని వివరాలు వెలుగులోకి వచ్చే అవకాశం ఉంది.