అక్షరటుడే వెబ్‌డెస్క్: Shankar Rao World Powerlifting Bronze | వయసు అనేది కేవలం ఒక సంఖ్య మాత్రమేనని, ఆత్మవిశ్వాసం, పట్టుదల ఉంటే ఏ వయసులోనైనా అసాధారణ విజయాలు సాధించవచ్చని తెలంగాణ రాష్ట్రానికి చెందిన 74 ఏళ్ల సీనియర్ అథ్లెట్ డివి శంకర్ రావు నిరూపించారు. గతంలో తనకు గుండె శస్త్రచికిత్స (బైపాస్ సర్జరీ) జరిగినప్పటికీ, ఆ ఆరోగ్య సవాలును సైతం లెక్కచేయకుండా తన సంకల్ప బలంతో ముందుకు సాగారు. జాతీయ స్థాయిలో ఇప్పటికే సత్తా చాటిన ఆయన, తాజాగా అంతర్జాతీయ వేదికపై దేశ కీర్తిపతాకాన్ని ఎగురవేశారు. అమెరికాలో జరిగిన ప్రతిష్టాత్మక వరల్డ్ పవర్ లిఫ్టింగ్ ఛాంపియన్‌షిప్ పోటీల్లో అద్భుత ప్రతిభ కనబరిచి కాంస్య పతకాన్ని సాధించారు.
Shankar Rao World Powerlifting Bronze | కఠోర శ్రమ..
వృద్ధాప్యంలోనూ శారీరక, ఆరోగ్య సవాళ్లను దాటుకుని శంకర్ రావు సాధించిన ఈ చారిత్రాత్మక విజయం పట్ల భద్రాచలం పట్టణంతో పాటు ఉమ్మడి ఖమ్మం జిల్లా వ్యాప్తంగా సంతోషం వ్యక్తం చేస్తున్నారు. భద్రాచలానికి చెందిన ప్రముఖ ‘సిటీ స్టైల్ జిమ్’ కోచ్ జి.వి. రామిరెడ్డి పర్యవేక్షణలో శంకర్ రావు ఈ ప్రపంచ పోటీల కోసం ఎంతో కఠినమైన శిక్షణ తీసుకున్నారు. కోచ్ రామిరెడ్డి అందించిన మార్గదర్శకత్వం, శంకర్ రావు కఠోర శ్రమ కలగలిసి దేశానికే గర్వకారణమైన ఈ పతకాన్ని అందించాయి.
Shankar Rao World Powerlifting Bronze | ప్రశంసల వర్షం..
అంతర్జాతీయ స్థాయిలో దేశానికి, తెలంగాణకు ( Telangana ) మంచి పేరు తెచ్చిన శంకర్ రావును, ఆయనకు శిక్షణ ఇచ్చిన కోచ్ జి.వి. రామిరెడ్డిని పలువురు రాజకీయ నాయకులు, పట్టణ ప్రముఖులు, రాష్ట్ర పవర్ లిఫ్టింగ్ జనరల్ సెక్రటరీ జోసెఫ్, రాష్ట్ర ఉపాధ్యక్షులు వి. మల్లేష్, భద్రాద్రి జిల్లా పవర్ లిఫ్టింగ్ అసోసియేషన్ అధ్యక్షులు భోగాల శ్రీనివాస్ రెడ్డి, పాకాల దుర్గా ప్రసాద్ అభినందించారు. వీరితో పాటు గ్రీన్ భద్రాద్రి సభ్యులు, లైన్స్ క్లబ్, రోటరీ క్లబ్ ప్రతినిధులు, వివిధ స్వచ్ఛంద సంస్థల సభ్యులు , భద్రాచలం నివాసులు వారిద్దరినీ ఘనంగా ప్రశంసించారు.
ఇది కూడా చదవండి: Telangana Activists Welfare Website | ఉద్యమకారుల కోసం వెబ్‌సైట్ ఏర్పాటు అభినందనీయం
