అక్షరటుడే, వెబ్డెస్క్: Tamil Nadu Prison Break |తమిళనాడులోని తేని జిల్లాలో జైలు గోడలను బద్దలు కొట్టి ఖైదీలు పరారు అయిన విషయం తెలిసిందే. ఈ ఘటన నేపథ్యంలో సీఎం విజయ్ ప్రభుత్వంపై డీఎంకే అధినేత, మాజీ సీఎం స్టాలిన్ తీవ్ర విమర్శలు చేశారు.
రాష్ట్రంలో శాంతిభద్రతల పరిస్థితి గురించి ఆయన మాట్లాడుతూ.. “బ్రేకింగ్ బ్యాడ్” తర్వాత, ఇప్పుడు తమిళనాడులో “ప్రిజన్ బ్రేక్” మొదలైందని ఎద్దేవా చేశారు. డ్రగ్స్ కేసులో టీవీకే నాయకుడు అరెస్ట్ కావడంతో స్టాలిన్ (Stalin) ఆ పార్టీని “బ్రేకింగ్ బ్యాడ్ పార్టీ” అని విమర్శించారు. సోమవారం తెక్కంపట్టి సబ్-జైలు నుంచి 17 మంది ఖైదీలు తప్పించుకోవడంతో, మంగళవారం స్టాలిన్ రాష్ట్ర ప్రభుత్వంపై మరోసారి ఎక్స్ వేదికగా విమర్శలు చేశారు.
Tamil Nadu Prison Break | అసమర్థ ప్రభుత్వం
టీవీకే ప్రభుత్వంలో బెయిల్పై విడుదలైన నిందితులపై పర్యవేక్షణ లేదని, జైళ్లలో ఉన్న ఖైదీలను కూడా పట్టుకోలేక తప్పించుకునేలా చేస్తోందన్నారు. అసమర్థ ప్రభుత్వ పాలనలో ప్రజలు ఇబ్బందులు పడుతున్నారని విమర్శించారు. విజయ్ ప్రభుత్వాన్ని పనికిరాని ప్రభుత్వం అని అభివర్ణించారు. 1995 తర్వాత రాష్ట్రంలో ఇంత పెద్ద సంఖ్యలో ఖైదీలు తప్పించుకోవడం ఇదే మొదటి సారిఅన్నారు. భద్రతా ఏర్పాట్లు, నిఘా వ్యవస్థలు అత్యంత ఆధునికంగా ఉండాల్సిన ఈ కాలంలో ఇలాంటి ఘటన జరగడం ఏమాత్రం ఆమోదయోగ్యం కాదన్నారు. విజయ్ పాలనలో బయట ఉన్న నేరస్థులు స్వేచ్ఛగా నేరాలు చేస్తుంటే, జైలులో ఉన్నవారు తప్పించుకుంటున్నారని చురకలు అంటించారు.
Tamil Nadu Prison Break | తీవ్ర విమర్శలు
జైలు నుంచి ఖైదీలు పారిపోవడంతో విజయ్ ప్రభుత్వంపై రాష్ట్రవ్యాప్తంగా తీవ్ర విమర్శలు వస్తున్నాయి. పోలీసులను కొట్టి ఖైదీలు పారిపోతే.. బయట ప్రజల పరిస్థితి ఏమిటని పలువురు ప్రశ్నిస్తున్నారు. కాగా పారిపోయిన వారిలో నలుగురిని పోలీసులు అరెస్ట్ చేశారు. మిగతా వారి కోసం గాలిస్తున్నారు.
ఇది కూడా చదవండి..: Microsoft Voluntary Exit Offer | మైక్రోసాఫ్ట్‌లో 60 వేల మందికి ఎగ్జిట్ ఆఫర్ .. భారత్‌లోనూ ఉద్యోగాలకు గండం!
