అక్షరటుడే వెబ్‌డెస్క్: Breast Cancer Awareness | రొమ్ము క్యాన్సర్ అవగాహన మాసం (Breast Cancer Awareness Month) సందర్భాన్ని పురస్కరించుకుని విశాఖపట్నంలోని ( Visakhapatnam )హెల్త్‌కేర్ గ్లోబల్ స్పెషాలిటీ హాస్పిటల్ (హెచ్‌సీజీ విశాఖ), స్థానిక ఎన్‌ఎస్‌ఆర్‌ఐటీ (NSRIT) కళాశాల విద్యార్థులతో కలిసి ఒక ప్రత్యేక ప్రజారోగ్య చైతన్య కార్యక్రమాన్ని నిర్వహించింది. రొమ్ము క్యాన్సర్‌పై సమాజంలో ఇప్పటికీ నెలకొన్న రకరకాల అపోహలు, నామోషి , సంకోచాలను తొలగించడమే ధ్యేయంగా విద్యార్థులు ప్రదర్శించిన ‘ఫ్లాష్‌మాబ్’ (Flashmob) పబ్లిక్ ప్రదర్శన స్థానికుల దృష్టిని విశేషంగా ఆకర్షించింది.
Breast Cancer Awareness | యువత భాగస్వామ్యం ..
సమాజంలో సానుకూల మార్పు తీసుకురావడానికి యువత శక్తిని వినియోగిస్తూ చేపట్టిన ఈ ప్రదర్శనలో సుమారు 40 మంది కళాశాల విద్యార్థులు ఉత్సాహంగా పాల్గొన్నారు. రొమ్ము క్యాన్సర్‌ను ప్రారంభ దశలోనే గుర్తిస్తే చికిత్స ఫలితాలు అత్యంత మెరుగ్గా ఉంటాయని, ప్రాణాపాయం నుంచి సులభంగా బయటపడవచ్చని విద్యార్థులు వివరించారు. మహిళలు క్రమం తప్పకుండా మామోగ్రఫీ (Mammography) పరీక్షలతో పాటు గర్భాశయ ముఖద్వార క్యాన్సర్ నివారణకు పాప్‌ స్మియర్ స్క్రీనింగ్ పరీక్షలు చేయించుకోవాల్సిన ఆవశ్యకతను ఈ సందర్భంగా తెలియజేశారు.
భయాలు వీడి ముందస్తు పరీక్షలకు రావాలన్న డాక్టర్ ప్రసాద్ ఐ.పీ…
ఈ వినూత్న కార్యక్రమం గురించి హెచ్‌సీజీ ఆంకాలజీ విశాఖపట్నం చీఫ్ ఆపరేటింగ్ ఆఫీసర్ డాక్టర్ ప్రసాద్ ఐ.పీ. వివరాలు పంచుకున్నారు. “క్యాన్సర్ వైద్యంలో సాంకేతిక పురోగతి ఎంత సాధించినప్పటికీ, వ్యాధిని తొలిదశలోనే గుర్తించాల్సిన అవసరంపై సమాజంలో సరైన అవగాహన పెరగాలి. అవగాహన అంటే కేవలం సమాచారం ఇవ్వడం మాత్రమే కాదు; మహిళలు తమ ఆరోగ్యంపై శ్రద్ధ చూపుతూ, ఎలాంటి భయం లేక ముందస్తు స్క్రీనింగ్ పరీక్షలు చేయించుకునేలా ప్రోత్సహించాలి. ఆసుపత్రులు, విద్యాసంస్థలు కలిసి పనిచేసినప్పుడే ఫ్లాష్‌మాబ్‌ల వంటి ప్రదర్శనల ద్వారా పాతకాలపు సంకోచాలు తొలిగి సమాజంలో మార్పు సాధ్యమవుతుంది” అని ఆయన పేర్కొన్నారు.
అవగాహన లోపమే ప్రధాన సవాల్ అని హెచ్చరించిన డాక్టర్ గుంటూరు ఇందిర..
ప్రముఖ రేడియేషన్ ఆంకాలజిస్ట్ డాక్టర్ గుంటూరు ఇందిర మాట్లాడుతూ క్యాన్సర్ నివారణలో ఎదురవుతున్న సమస్యలను ప్రస్తావించారు. “ప్రస్తుతం సరైన సమాచారం లేకపోవడం, సామాజిక అపోహల వల్ల చాలామంది క్రమం తప్పకుండా పరీక్షలు చేయించుకోవడానికి వెనుకాడుతున్నారు. ఫలితంగా వ్యాధి ముదిరిన తర్వాతే ఆస్పత్రులకు వస్తున్నారు. యువత ముందుండి నిర్వహించే ఇలాంటి అవగాహన కార్యక్రమాలు కుటుంబాల్లో మహిళల ఆరోగ్యంపై బహిరంగ చర్చలకు దారితీస్తాయి. రొమ్ము, గర్భాశయ ముఖద్వార క్యాన్సర్‌లను తొలిదశలోనే పసిగడితే సమర్థంగా నయం చేయవచ్చు” అని ఆమె స్పష్టం చేశారు.
Breast Cancer Awareness | ఉచిత పరీక్షల నిర్వహణ ..
కేవలం అవగాహన కల్పించడంతోనే ఆగకుండా, హెచ్‌సీజీ విశాఖ సంస్థ తన సామాజిక బాధ్యతలో భాగంగా ప్రాంగణంలోనే ఉచిత ప్రాథమిక ఆరోగ్య పరీక్షా శిబిరాన్ని ఏర్పాటు చేసింది. ఇందులో భాగంగా ప్రజలకు ఉచితంగా రక్త పరీక్షలు, బ్లడ్ షుగర్ స్థాయిల తనిఖీలను నిర్వహించింది. ఆ తర్వాత, సమాజ శ్రేయస్సు కోరి చురుగ్గా పాల్గొని ప్రజల్లో అవగాహన పెంచిన ఎన్‌ఎస్‌ఆర్‌ఐటీ విద్యార్థులందరికీ హెచ్‌సీజీ యాజమాన్యం మెమోంటోలు, ప్రశంసాపత్రాలను అందజేసి అభినందించింది.
ఇది కూడా చదవండి: Seethakka Development Works | ప్రజా సంక్షేమమే ధ్యేయంగా ముందుకు సాగుతున్న ప్రభుత్వం
