అక్షరటుడే వెబ్డెస్క్:Patancheru Cylinder Blast | సంగారెడ్డి జిల్లా పటాన్చెరు పట్టణ కేంద్రంలో ఆదివారం మధ్యాహ్నం భారీ ప్రమాదం సంభవించింది. స్థానిక ఖానావళి హోటల్లో గ్యాస్ సిలిండర్ ఒక్కసారిగా పేలడంతో ఆ ప్రాంతం దద్దరిల్లిపోయింది. ఈ ఘటనతో భయాందోళనకు గురైన స్థానికులు ప్రాణభయంతో పరుగులు తీశారు.
Patancheru Cylinder Blast| భారీగా ఆస్తినష్టం
సిలిండర్ పేలిన తీవ్రత ఎంతలా ఉందంటే, ఆ శబ్దం దాదాపు కిలోమీటరు దూరం వరకు వినిపించినట్లు ప్రత్యక్ష సాక్షులు తెలిపారు. పేలుడు ధాటికి హోటల్లోని వంట సామాగ్రి, ఫర్నిచర్ చెల్లాచెదురుగా పడిపోయాయి. హోటల్ గోడలు బీటలు వారగా, కిటికీ అద్దాలు పగిలి రోడ్డుపై పడ్డాయి. ప్రమాద సమయంలో హోటల్లో కస్టమర్లు తక్కువగా ఉండటంతో పెను ప్రాణనష్టం తప్పింది. అయితే, యజమానికి భారీగా ఆస్తి నష్టం వాటిల్లింది.
Patancheru Cylinder Blast | మంటలను అదుపు చేసిన అగ్నిమాపక సిబ్బంది..
సమాచారం అందిన వెంటనే అగ్నిమాపక దళం ఒక ఫైర్ ఇంజన్తో ఘటనా స్థలానికి చేరుకుంది. మంటలు పక్కనే ఉన్న ఇతర దుకాణాలకు వ్యాపించకుండా సిబ్బంది దాదాపు గంటన్నర పాటు శ్రమించి అదుపులోకి తెచ్చారు. పోలీసులు ఘటన స్థలాన్ని పరిశీలించి, ట్రాఫిక్ను క్రమబద్ధీకరించారు. అగ్నిమాపక సిబ్బంది సమయస్ఫూర్తితో స్పందించడంపై స్థానికులు హర్షం వ్యక్తం చేశారు.
Patancheru Cylinder Blast | పోలీసుల దర్యాప్తు
ఈ ప్రమాదంపై పోలీసులు కేసు నమోదు చేసి విచారణ చేపట్టారు. గ్యాస్ లీకేజీ కారణమా లేక సిలిండర్ నాణ్యత లోపమా అనే కోణంలో దర్యాప్తు చేస్తున్నారు. హోటల్లో భద్రతా ప్రమాణాలు పాటించలేదన్న ఆరోపణల నేపథ్యంలో క్లూస్ టీమ్ నమూనాలను సేకరించింది. పూర్తి నివేదిక అనంతరం ప్రమాదానికి గల ఖచ్చితమైన కారణాలు వెల్లడిస్తామని అధికారులు తెలిపారు.
హోటల్ లో పేలిన గ్యాస్ సిలిండర్.. భారీ అగ్నిప్రమాదం
పేలుడు ధాటికి హోటల్ సామాగ్రి ధ్వంసం.. తీవ్ర భయాందోళనకు గురైన స్థానికులు
సంగారెడ్డి జిల్లా పటాన్చెరు లోని ఖానావళి హోటల్ లో చేలరేగిన మంటలు
మంటలను అదుపు చేసిన అగ్నిమాపక సిబ్బంది
A gas cylinder exploded inside a hotel in… pic.twitter.com/q35zX7poT6
— BIG TV Breaking News (@bigtvtelugu) May 10, 2026
ఇది కూడా చదవండి: BC Caste Census | జాతీయ జనగణనలో బీసీ కులగణన సైతం చేపట్టాలి
