అక్షరటుడే వెబ్‌డెస్క్: EPFO Auto Settlement | ప్రైవేట్ ఉద్యోగుల పీఎఫ్ (EPF) ఖాతాలకు సంబంధించి ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) ఒక కీలకమైన నిర్ణయం తీసుకుంది. ఉద్యోగాలు మారినప్పుడు లేదా పాత పీఎఫ్ ఖాతాలను పట్టించుకోకుండా వదిలేసినప్పుడు అవి కాలక్రమేణా ఇనాక్టివ్ అయిపోతాయి. ఇలాంటి ఖాతాల్లో చిక్కుకుపోయిన సొమ్మును విత్‌డ్రా చేసుకోవడానికి ఇకపై వినియోగదారులు ప్రత్యేకంగా ఎలాంటి క్లెయిమ్ సమర్పించాల్సిన అవసరం లేదని, నేరుగా వారి బ్యాంక్ ఖాతాల్లోనే ఆటోమేటిక్‌గా జమ చేసే ప్రక్రియను ప్రారంభించినట్లు ఈపీఎఫ్ఓ వెల్లడించింది.
EPFO Auto Settlement | ఎవరికి వర్తిస్తుంది?
ఈ ఆటో సెటిల్మెంట్ సౌకర్యం కొన్ని నిర్దిష్ట నిబంధనలకు లోబడి అందుబాటులోకి రానుంది. ముఖ్యంగా ఇనాక్టివ్ పీఎఫ్ ఖాతాలో రూ. 1,000 లేదా అంతకంటే తక్కువ మొత్తం ఉన్న ఖాతాదారులకు మాత్రమే ఇది నేరుగా వర్తిస్తుంది. ఒకవేళ ఖాతాలో వేయి రూపాయల కంటే ఎక్కువ నిధులు ఉంటే మాత్రం ఈ ఆటో విధానం వర్తించదు. అలాంటి వారు పాత పద్ధతిలోనే సాధారణ క్లెయిమ్ దరఖాస్తు చేసుకొని డబ్బులు పొందాల్సి ఉంటుంది. ఈ ప్రక్రియలో భాగంగా పీఎఫ్ రికార్డులలో నమోదైన కేవైసీ (KYC) వివరాలు , బ్యాంక్ ఖాతా వివరాలను అధికారులు క్షుణ్ణంగా పరిశీలిస్తారు. ఆ వెరిఫికేషన్ పూర్తయిన తర్వాత, ఆ సొమ్మును నేరుగా సదరు లబ్ధిదారుడి బ్యాంక్ అకౌంట్‌కే బదిలీ చేస్తారు.
EPFO Auto Settlement | సుమారు లక్ష మందికి లబ్ధి..
ఈపీఎఫ్ఓ తీసుకున్న ఈ నిర్ణయం వల్ల దేశవ్యాప్తంగా సుమారు 1,000,000 (లక్ష) మంది పీఎఫ్ ఖాతాదారులకు నేరుగా ప్రయోజనం చేకూరనుండగా, దాదాపు రూ. 5 కోట్ల వరకు జమ కానున్నాయి. చిన్న మొత్తాలు కావడంతో చాలామంది ఉద్యోగులు వీటిని విత్‌డ్రా చేసుకోకుండా వదిలేస్తుంటారు. అలాంటి నిధులను వేగంగా క్లియర్ చేసే లక్ష్యంతో ఈ ఆటో సెటిల్మెంట్ విధానాన్ని తీసుకొచ్చారు.
EPFO Auto Settlement | ఎప్పుడు ఇనాక్టివ్ అవుతుంది?
1952 ఈపీఎఫ్ నిబంధనల ప్రకారం, ఒక పీఎఫ్ ఖాతాలో వరుసగా మూడేళ్ల (36 నెలల) పాటు ఎలాంటి లావాదేవీలు జరగకపోయినా లేదా కంపెనీ నుంచి చందా జమ కాకపోయినా ఆ ఖాతా ఇనాక్టివ్ అవుతుంది. సాధారణంగా ఉద్యోగి రిటైర్మెంట్ పొందిన తర్వాత లేదా ఉద్యోగం మానేసిన తర్వాత సుదీర్ఘకాలం డిపాజిట్లు లేకపోతే దానిని నిష్క్రియ ఖాతాగా పరిగణిస్తారు. అటువంటి ఖాతాల నుంచి సాధారణ పద్ధతిలో డబ్బులు తీయడం కుదరదు కాబట్టి, చిన్న మొత్తాల కోసం ఈపీఎఫ్ఓ ఈ సులువైన మార్గాన్ని తీసుకొచ్చింది.
ఇది కూడా చదవండి: Indian Stock Market | ఏడో రోజూ పైపైకి.. భారీ లాభాలతో ముగిసిన మార్కెట్లు
