అక్షరటుడే, వెబ్డెస్క్: Hyderabad Heavy Rain 1| హైదరాబాద్ నగరంలోని పలు ప్రాంతాల్లో శుక్రవారం సాయంత్రం భారీ వర్షం కురిసింది. మియాపూర్, చందానగర్, శేరిలింగంపల్లి, బంజారాహిల్స్, జూబ్లీహిల్స్, ఫిల్మ్నగర్, బాల్నగర్, గండిమైసమ్మ సహా అనేక ప్రాంతాల్లో ఒక్కసారిగా వర్షం దంచికొట్టింది. దీంతో రహదారులపై వర్షపు నీరు నిలిచిపోగా, వాహనదారులు తీవ్ర ఇబ్బందులు ఎదుర్కొన్నారు.
భారీ వర్షం కారణంగా ప్రధాన రహదారులతో పాటు అంతర్గత వీధుల్లోనూ ట్రాఫిక్ స్తంభించింది. కార్యాలయాల నుంచి ఇళ్లకు బయలుదేరిన ఉద్యోగులు, ఇతర ప్రయాణికులు ట్రాఫిక్ జామ్లో చిక్కుకుని గంటల తరబడి ఇబ్బందులు పడ్డారు. ముఖ్యంగా మియాపూర్–చందానగర్ మార్గం, శేరిలింగంపల్లి పరిసరాలు, బంజారాహిల్స్–జూబ్లీహిల్స్ రహదారులపై వాహనాల రద్దీ పెరిగింది.
Hyderabad Heavy Rain 1| విద్యుత్ సరఫరాకు అంతరాయం
అలాగే పలు ప్రాంతాల్లో విద్యుత్ సరఫరాకు అంతరాయం ఏర్పడింది. భారీ గాలులు, వర్షం ప్రభావంతో కొన్ని కాలనీల్లో విద్యుత్ నిలిచిపోయినట్లు స్థానికులు తెలిపారు. పరిస్థితిని పర్యవేక్షిస్తున్న విద్యుత్ శాఖ సిబ్బంది, లోపాలను గుర్తించి విద్యుత్ సరఫరా పునరుద్ధరణకు చర్యలు చేపట్టారు.
మరోవైపు, వాతావరణం ఒక్కసారిగా మారడంతో నగరవాసులు ఎండ వేడి నుంచి ఉపశమనం పొందారు. అయితే లోతట్టు ప్రాంతాల ప్రజలు అప్రమత్తంగా ఉండాలని అధికారులు సూచించారు. వర్షపాతం కొనసాగితే నీటి నిల్వలు, ట్రాఫిక్ సమస్యలు మరింత పెరిగే అవకాశం ఉందని హెచ్చరించారు.
