అక్షరటుడే వెబ్‌డెస్క్: Q2 Banking Results | దేశంలోని ప్రముఖ ప్రైవేట్ , స్మాల్ ఫైనాన్స్ బ్యాంకులు 2026-27 ఆర్థిక సంవత్సరం రెండవ త్రైమాసికానికి (Q2FY27) సంబంధించి తమ ఆర్థిక ఫలితాలను వెల్లడించారు. మెరుగైన క్రెడిట్ విస్తరణ, పెరిగిన డిపాజిట్లు , ఆస్తుల నాణ్యతలో స్పష్టమైన పురోగతి కారణంగా బ్యాంకుల నికర లాభాల్లో మైలురాయి లాంటి వృద్ధి నమోదైంది.
Q2 Banking Results | ఉజ్జీవన్ స్మాల్ ఫైనాన్స్ బ్యాంక్..
ఉజ్జీవన్ స్మాల్ ఫైనాన్స్ బ్యాంక్ ( Bank ) సెప్టెంబర్ త్రైమాసికంలో రూ.365 కోట్ల రికార్డు స్థాయి నికర లాభాన్ని (PAT) సాధించింది. ఇది గత ఏడాది ఇదే కాలంతో పోలిస్తే ఏకంగా 199.9% (సుమారు 200%) వృద్ధి. నిధుల మద్దతును మరింత బలోపేతం చేసుకునేందుకు ఐఎఫ్‌సీ (IFC), బజాజ్ లైఫ్, హెచ్‌డీఎఫ్‌సీ లైఫ్, ఆదిత్య బిర్లా సన్ లైఫ్‌ల నుంచి ప్రిఫరెన్షియల్ అలాట్‌మెంట్ ద్వారా రూ.409 కోట్ల నిధుల సేకరణకు బోర్డు ఆమోదం తెలపగా, అక్టోబర్‌లో సెక్యురిటైజేషన్ పూల్ ద్వారా మరో రూ.500 కోట్లు పొందింది.
బ్యాంక్ మొత్తం డిపాజిట్లు 29.2% పెరిగి రూ.50,643 కోట్లకు చేరి రూ.50,000 కోట్ల మైలురాయిని దాటగా, కాసా (CASA) నిష్పత్తి 26%గా నమోదు కాగా, కస్టమర్ల కోసం ఏఎస్‌బీఏ (ASBA) సౌకర్యాన్ని అందుబాటులోకి తెచ్చింది. గ్రోస్ లోన్ బుక్ 32.1% పెరిగి రూ.45,699 కోట్లకు చేరింది. త్రైమాసిక డిస్‌బర్స్‌మెంట్లు రూ.10,495 కోట్లకు పెరిగాయి. భద్రత కలిగిన లోన్ల వాటా 52.1% కి (రూ.23,803 కోట్లు) పెరగగా, అందులో అఫర్డబుల్ హౌసింగ్ లోన్లు 31.4% వృద్ధితో రూ.10,056 కోట్లకు చేరాయి. జీఎన్‌పీఏ (GNPA) 2.10% కి, ఎన్ఎన్పీఏ (NNPA) 0.31% కి తగ్గగా, పీసీఆర్ (PCR) 85%కి పెరిగింది. ప్రచారంలో భాగంగా ప్రముఖ నటుడు ఆర్. మాధవన్ బ్రాండ్ అంబాసిడర్‌గా ‘నథింగ్ స్మాల్ ఎబౌట్ అస్’ ప్రచారాన్ని ఆరంభించి, H1FY27లో 104 కొత్త బ్రాంచ్‌లు, 1,335 మంది ఉద్యోగులను చేర్చుకుంది. అలాగే, ఆరోగ్య కారణాల దృష్ట్యా ఎండి సజీవ్ నౌటియాల్ ముందస్తు విరమణ పొందినట్లు తెలిపింది.
Q2 Banking Results | ఐసీఐసీఐ బ్యాంక్..
దేశంలోనే రెండవ అతిపెద్ద ప్రైవేట్ రంగ బ్యాంక్ అయిన ఐసీఐసీఐ బ్యాంక్ (ICICI Bank) Q2FY27లో సంచలన ఫలితాలు సాధించింది. బ్యాంక్ నికర లాభం (PAT) గత ఏడాదితో పోలిస్తే 20.1% పెరిగి రూ.14,843 కోట్లకు చేరింది. వడ్డీ ఆదాయంలో స్థిరమైన వృద్ధి లభించడమే దీనికి ప్రధాన కారణం. మొత్తం వడ్డీ రాబడి 17.6% పెరిగి రూ.49,110 కోట్లకు చేరగా, నికర వడ్డీ రాబడి (NII) 17.7% వృద్ధితో రూ.25,339 కోట్లుగా నమోదైంది.
అయితే నికర వడ్డీ మార్జిన్ (NIM) మాత్రం గత ఏడాదితో పోలిస్తే 12 బేసిస్ పాయింట్లు తగ్గి 4.18% వద్దకు చేరింది. బ్యాంక్ ఆస్తుల నాణ్యత గణనీయంగా మెరుగుపడింది; గ్రాస్ ఎన్పీఏ (GNPA) 1.58% నుంచి 1.20% కి తగ్గింది. రూ.1,592 కోట్ల విలువైన రాని బాకీలను రైట్ ఆఫ్ చేయగా, బ్యాడ్ లోన్ల నిమిత్తం కేటాయించే ప్రావిజన్లు 7% తగ్గి రూ.850.69 కోట్లకు పరిమితమయ్యాయి. ఈ ఆరోగ్యకరమైన ఫలితాల నేపథ్యంలో ఐసీఐసీఐ బ్యాంక్ మార్కెట్ క్యాపిటలైజేషన్ రూ.10.03 లక్షల కోట్లను దాటింది.
Q2 Banking Results | యాక్సిస్ బ్యాంక్..
యాక్సిస్ బ్యాంక్ Q2FY27లో బలమైన వృద్ధిని కనబరిచి నికర లాభంలో 38% పెరుగుదలతో రూ.7,003 కోట్లను నమోదు చేసింది. బ్యాంక్ నికర వడ్డీ రాబడి (NII) 12% వృద్ధి సాధించి రూ.15,371 కోట్లకు చేరగా, బ్యాలెన్స్ షీట్ పరిమాణం 22% పెరిగి రూ.20,46,240 కోట్లకు చేరుకుంది. మొత్తం డిపాజిట్లు 21%, రుణాలు 23% పెరిగాయి. ముఖ్యంగా కార్పొరేట్ లోన్ బుక్ 34%, ఎస్ఎమ్ఈ (SME) పోర్ట్‌ఫోలియో 25% చొప్పున వృద్ధి చెందాయి. బ్యాంక్ జీఎన్‌పీఏ 1.46% నుంచి 1.16% కి తగ్గడం ఆస్తుల పటిష్టతకు అద్దం పడుతోంది.
డిజిటల్ చెల్లింపుల విభాగంలో యుపిఐ (UPI) పేయర్ ప్లాట్‌ఫామ్‌లో 38% మార్కెట్ వాటాతో యాక్సిస్ బ్యాంక్ అగ్రస్థానంలో కొనసాగుతోంది. మాస్టర్‌కార్డ్, వీసా నెట్‌వర్క్ మాధ్యమంగా తమ క్రెడిట్ కార్డ్ కస్టమర్లకు ‘ఆపిల్ పే’ (Apple Pay) సేవలను ప్రవేశపెట్టిన భారతదేశపు తొలి బ్యాంక్‌గా రికార్డు నెలకొల్పింది. హిటాచీ పేమెంట్స్‌తో కలిసి AI సౌండ్‌బాక్స్ , డిజిటల్ బ్యాంకింగ్ పాయింట్ 2.0 లను లాంచ్ చేసింది. కస్టమర్ సర్వీస్‌లో ‘స్పర్శ్ వీక్ 2026’, విదేశాల్లో చదివిన భారతీయుల కోసం ‘అరైజ్ హోమ్‌కమింగ్’ తదితర కార్యక్రమాలను చేపట్టింది. స్పోర్ట్స్ విభాగానికి మద్దతుగా గోస్పోర్ట్స్ ఫౌండేషన్ , ఆర్చరీ సెంటర్‌లకు సహకారం ప్రకటించడంతో పాటు ‘యూరోమనీ’లో ఇండియాస్ బెస్ట్ డిజిటల్ బ్యాంక్ అవార్డును గెలుచుకుంది.
Q2 Banking Results | ఐడీబీఐ బ్యాంక్..
ఐడీబీఐ బ్యాంక్ (IDBI Bank) సెప్టెంబర్ త్రైమాసికంలో రూ.2,893 కోట్ల ఆపరేటింగ్ లాభాన్ని సాధించింది. ఇది మునుపటి త్రైమాసికం (QoQ) కంటే 33% ఎక్కువ. బ్యాంక్ నికర లాభం (PAT) రూ.2,205 కోట్లుగా నమోదైంది. నికర వడ్డీ మార్జిన్ (NIM) 4.11% కి పెరగ్గా, ఎన్ఐఐ (NII) ఏటా 29% పెరిగి రూ.4,228 కోట్లకు చేరుకుంది.
మొత్తం బ్యాంక్ వ్యాపారం 18% వృద్ధితో రూ.6,27,216 కోట్లకు చేరింది. ఇందులో మొత్తం డిపాజిట్లు 17% పెరిగి రూ.3,55,684 కోట్లుగా, రుణాలు 18% పెరిగి రూ.2,71,533 కోట్లుగా నమోదయ్యాయి. బ్యాంక్ కాసా (CASA) డిపాజిట్లు 12% పెరిగి రూ.1,55,877 కోట్లకు చేరగా కాసా నిష్పత్తి 43.82% వద్ద పటిష్టంగా ఉంది. గ్రాస్ ఎన్పీఏ 2.12% కి, నెట్ ఎన్పీఏ 0.17% కి తగ్గగా, ప్రావిజన్ కవరేజ్ రేషియో (PCR) 99.24% వద్ద ఎంతో పటిష్టంగా నమోదైంది. కాస్ట్ టు ఇన్‌కమ్ రేషియో 48.17% కి తగ్గడం బ్యాంక్ సమర్థవంతమైన నిర్వహణకు నిదర్శనం.
ఇది కూడా చదవండి: Nizamabad RTA Home Guards | రవాణాశాఖ నుంచి ఇద్దరు హోంగార్డుల సరెండర్
