అక్షరటుడే వెబ్డెస్క్: Tata Curvv Series X | భారతీయ ఆటోమొబైల్ మార్కెట్లో సరికొత్త సంచలనానికి తెరలేపుతూ ప్రముఖ వాహన తయారీ సంస్థ టాటా మోటార్స్ ( Tata Motors )తన మొట్టమొదటి ఎస్యూవీ కూపే ‘కర్వ్’ లైనప్ను మరింత విస్తరించింది. ఇందులో భాగంగా వినియోగదారులకు అత్యుత్తమ విలువను అందించే లక్ష్యంతో సరికొత్త ‘కర్వ్ సిరీస్ ఎక్స్’ (Curvv Series X) వేరియంట్లను మార్కెట్లోకి తీసుకువచ్చినట్లు ప్రకటించింది. ఆకర్షణీయమైన డిజైన్, శక్తివంతమైన పనితీరు, లగ్జరీ ఫీచర్లతో కూడిన ఈ సిరీస్ రూ.9.99 లక్షల ప్రారంభ ధరతో అందుబాటులోకి రానుంది.
Tata Curvv Series X | ఆకట్టుకునే ధరలు..
కొత్తగా విడుదలైన ఈ సిరీస్లో కస్టమర్ల అవసరాలకు తగినట్లుగా పలు వేరియంట్లను అందుబాటులో ఉంచారు. బేస్ మోడల్ రూ.9.99 లక్షల ప్రారంభ ధరతో లభిస్తుండగా, ప్యూర్ ఎక్స్ (Pure X) వేరియంట్ ధర రూ.10.99 లక్షలుగా ఉంది. దీనికి అదనంగా రూ.80,000 చెల్లించి ప్యూర్ ఎక్స్+ (Pure X+ రూ.11.79 లక్షలు) వేరియంట్ను పొందవచ్చు. ఇక మరింత విలాసవంతమైన ఫీచర్లు కోరుకునే వారి కోసం క్రియేటివ్ ఎక్స్+ (Creative X+ రూ.12.90 లక్షలు) వేరియంట్ను తీర్చిదిద్దారు. అలాగే అత్యంత ఆదరణ పొందిన #డార్క్ ఎడిషన్ (Dark Edition) కేవలం ప్యూర్ వేరియంట్ నుంచే రూ.11.99 లక్షల ప్రారంభ ధరతో లభించనుంది.
Tata Curvv Series X | ప్రీమియం ఫీచర్లు..
ఈ సిరీస్లోని ప్యూర్ ఎక్స్ వేరియంట్లో హర్మన్ (HARMAN) అల్ట్రా వ్యూ 10.25 అంగుళాల ఇన్ఫోటైన్మెంట్ సిస్టమ్, వైర్లెస్ ఆండ్రాయిడ్ ఆటో, ఆపిల్ కార్ప్లే, క్రూయిజ్ కంట్రోల్, స్మార్ట్ కీ, ఆటోమేటిక్ టెంపరేచర్ కంట్రోల్, ఎల్ఈడీ హెడ్ల్యాంప్లు వంటి అనేక అధునాతన హంగులను పొందుపరిచారు. ప్యూర్ ఎక్స్+ వేరియంట్లో అదనంగా ఆర్17 డైమండ్-కట్ అలాయ్ వీల్స్ జోడించారు. ఇక హైఎండ్ వేరియంట్ అయిన క్రియేటివ్ ఎక్స్+ లో ఏరోవ్యూ పనోరమిక్ సన్రూఫ్, 360 డిగ్రీల సరౌండ్ వ్యూ కెమెరా, ఆర్18 డైమండ్-కట్ అలాయ్ వీల్స్, 10.25 అంగుళాల డిజిటల్ కాక్పిట్తో కూడిన ట్విన్-స్క్రీన్ సెటప్, రిక్లైనింగ్ రియర్ సీట్లతో కూడిన ప్రీమియం లెదరెట్ క్యాబిన్ను అందించారు.
Tata Curvv Series X | రాజీలేని భద్రత..
టాటా కార్ల ప్రధాన బలమైన ‘సేఫ్టీ డోమ్’ రక్షణను ఈ కర్వ్ సిరీస్ ఎక్స్లోనూ పక్కాగా అమలు చేశారు. ఆధునిక డిజైన్, సెగ్మెంట్లో అగ్రగామిగా నిలిచే ఫీచర్లు, విశాలమైన సౌకర్యం, ఉత్కంఠభరితమైన పనితీరును అత్యంత ఆకర్షణీయమైన ధరలో అందించేలా దీన్ని డిజైన్ చేశారు. భారతదేశంలో ఎస్యూవీ డిజైన్ పై ఉన్న ఆలోచనా సరళిని కర్వ్ ఇప్పటికే పూర్తిగా మార్చివేసిందని, ఈ కొత్త సిరీస్ ద్వారా ఆ అనుభవాన్ని మరింత ఎక్కువ మందికి చేరువ చేస్తున్నామని టాటా ప్యాసింజర్ ఎలక్ట్రిక్ మొబిలిటీ చీఫ్ కమర్షియల్ ఆఫీసర్ వివేక్ శ్రీవత్స తెలిపారు. ఎలాంటి రాజీ లేకుండా అత్యుత్తమ విలువను కోరుకునే ఆటోమొబైల్ ప్రియులకు ఈ కొత్త వేరియంట్లు ఉత్తమ ఎంపికగా నిలవనున్నాయి.
ఇది కూడా చదవండి: Forest Beat Officer Bribe | రూ.30 వేల లంచం తీసుకుంటూ దొరికిన ఫారెస్ట్ బీట్ ఆఫీసర్
