అక్షరటుడే, వెబ్డెస్క్: VinFast Car Issue | లక్షల రూపాయలు వెచ్చించి కొత్త కారు కొనుగోలు చేసిన వినియోగదారుడికి చేదు అనుభవం ఎదురైంది. హైదరాబాద్ రాయదుర్గంలోని విన్ఫాస్ట్ కార్ల షోరూం నుంచి డెలివరీ తీసుకున్న కొద్ది సేపటికే రూ.25 లక్షల విలువైన కారు షోరూం బయటే ఆగిపోవడంతో కస్టమర్ తీవ్ర ఆందోళనకు గురయ్యారు.
VinFast Car Issue | సాంకేతిక సమస్యతో..
బాధితుడి కథనం ప్రకారం, కొత్త వాహనాన్ని కొనుగోలు చేసిన అనంతరం షోరూం నుంచి బయటకు తీసుకువచ్చిన వెంటనే కారు సాంకేతిక సమస్యతో నిలిచిపోయింది. దీంతో వెంటనే షోరూం సిబ్బందిని సంప్రదించి సమస్యను వివరించినట్లు తెలిపారు.
VinFast Car Issue | సంస్థ ప్రతినిధుల నిర్లక్ష్య ధోరణి
అయితే సమస్య పరిష్కారంపై స్పందించాల్సిన షోరూం సిబ్బంది నిర్లక్ష్యంగా వ్యవహరించారని బాధితుడు ఆరోపిస్తున్నారు. “కారు ఆగిపోవడంతో మాకు సంబంధం లేదు” అంటూ తనను షోరూం నుంచి బయటకు పంపించారని వాపోయారు.
లక్షల రూపాయలు వెచ్చించి కొనుగోలు చేసిన కొత్త వాహనం డెలివరీ రోజునే పనిచేయకపోవడం, పైగా బాధ్యతాయుతంగా స్పందించాల్సిన సంస్థ ప్రతినిధులు నిర్లక్ష్య ధోరణి ప్రదర్శించడం పట్ల వినియోగదారులు ఆగ్రహం వ్యక్తం చేస్తున్నారు.
VinFast Car Issue | తనిఖీలపై ప్రశ్నలు
ఈ ఘటన కొత్త వాహనాల నాణ్యత ప్రమాణాలు, డెలివరీకి ముందు నిర్వహించే తనిఖీలపై ప్రశ్నలు లేవనెత్తుతోంది. వినియోగదారుల సమస్యల పరిష్కారంలో షోరూం యాజమాన్యాలు మరింత బాధ్యతాయుతంగా వ్యవహరించాల్సిన అవసరం ఉందనే అభిప్రాయాలు వ్యక్తమవుతున్నాయి.
కాగా, ఈ ఘటనపై షోరూం యాజమాన్యం నుంచి అధికారిక స్పందన వెలువడాల్సి ఉంది.
