అక్షరటుడే, వెబ్డెస్క్: Supreme Court Sex Workers | దేశంలోని సెక్స్ వర్కర్ల హక్కులు, వారి గౌరవప్రదమైన జీవితం, రక్షణపై భారత అత్యున్నత న్యాయస్థానం సుప్రీంకోర్టు చారిత్రాత్మక వ్యాఖ్యలు చేసింది.
స్వచ్ఛందంగా లైంగిక వృత్తిని ఎంచుకున్న వ్యక్తులకు, మానవ అక్రమ రవాణా (హ్యూమన్ ట్రాఫికింగ్) ద్వారా బలవంతంగా ఈ వృత్తిలోకి నెట్టబడిన బాధితులకు మధ్య చాలా వ్యత్యాసం ఉందని న్యాయస్థానం స్పష్టం చేసింది.
ఈ రెండు వర్గాల మధ్య ఉన్న తేడాను గుర్తించి యంత్రాంగాలు వ్యవహరించాలని స్పష్టమైన మార్గదర్శకాలను జారీ చేసింది.
రాజ్యాంగంలోని ఆర్టికల్ 21 ప్రకారం దేశంలోని ప్రతి పౌరుడిలాగే సెక్స్ వర్కర్లకు సైతం గౌరవంగా జీవించే హక్కు ఉంటుందని సర్వోన్నత న్యాయస్థానం ఈ సందర్భంగా స్పష్టం చేసింది.
Supreme Court Sex Workers | పోలీసుల దాడులు చట్టవిరుద్ధం
సుప్రీంకోర్టు ఆదేశాల ప్రకారం.. స్వచ్ఛందంగా లైంగిక వృత్తిని నిర్వహిస్తున్న మేజర్లు (వయోజనులు) అయిన సెక్స్ వర్కర్లపై పోలీసులు దాడులు చేయడం, వారిపై క్రిమినల్ కేసులు నమోదు చేయడం చట్ట విరుద్ధం.
కేవలం లైంగిక వృత్తిలో ఉన్నారనే ఒకే ఒక్క కారణంతో వారిని వేధించడం, అవమానించడం, పోలీస్ స్టేషన్లకు తరలించడం సరికాదని ధర్మాసనం స్పష్టం చేసింది.
అయితే, బలవంతంగా మహిళలను, మైనర్లను ఈ వృత్తిలోకి నెట్టే అక్రమ రవాణా ముఠాలు, బ్రోతల్స్ (వ్యభిచార గృహాలు) నిర్వహించే వారిపై మాత్రం కఠిన చర్యలు తీసుకోవాలని పోలీసు శాఖను ఆదేశించింది.
Supreme Court Sex Workers | మీడియాకు హెచ్చరిక
రెస్క్యూ ఆపరేషన్లు, దాడుల సమయంలో సెక్స్ వర్కర్ల గుర్తింపును బహిర్గతం చేయడంపై సుప్రీంకోర్టు తీవ్రంగా అభ్యంతరం వ్యక్తం చేసింది.
సెక్స్ వర్కర్ల ఫొటోలు, వీడియోలను ప్రసారం చేయడం, వారి వ్యక్తిగత వివరాలను వెల్లడించడం నేరమని మీడియాకు గట్టి హెచ్చరికలు జారీ చేసింది.
ఇతర పౌరుల తరహాలోనే వారి వ్యక్తిగత గోప్యతను (ప్రైవసీ) కాపాడాల్సిన బాధ్యత అందరిపై ఉందని ఈ సందర్భంగా స్పష్టం చేసింది.
Supreme Court Sex Workers | ఆధార్ సంఖ్య జారీ చేయాలి
సరైన నివాస ధ్రువీకరణ పత్రాలు లేకపోయినా సెక్స్ వర్కర్లందరికీ ఆధార్ సంఖ్యను జారీ చేయాలని యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI)ని సుప్రీంకోర్టు ఆదేశించింది.
గుర్తింపు పత్రాలు లేని కారణంగా వారు ఎలాంటి ప్రభుత్వ సంక్షేమ పథకాలకు దూరం కావొద్దని, వారికి అన్ని చట్టపరమైన రక్షణలు, పౌర సదుపాయాలు కల్పించాల్సిన అవసరం ఎంతైనా ఉందని స్పష్టం చేసింది.
లైంగిక వృత్తిని కేవలం ఒక సామాజిక కోణంలోనే కాకుండా పౌర, మానవ హక్కుల కోణంలో చూడాలని సుప్రీంకోర్టు ఇచ్చిన ఈ తాజా తీర్పుతో దేశవ్యాప్తంగా పౌర హక్కుల వర్గాలు హర్షం వ్యక్తం చేస్తున్నాయి.
