Waaree Renewable Results | జూన్ 30తో ముగిసిన త్రైమాసికంలో వారి రెన్యూవబుల్ టెక్నాలజీస్ (Waaree Renewable Technologies) అద్భుతమైన ఆర్థిక ఫలితాలను సాధించింది. సోలార్ ఇంజనీరింగ్, ప్రొక్యూర్మెంట్, అండ్ కన్స్ట్రక్షన్ (EPC) పోర్ట్ఫోలియో దూకుడుతో కంపెనీ లాభాలు గణనీయంగా వృద్ధి చెందాయి.
కంపెనీ ఆర్థిక ఫలితాలు..
గత ఏడాది ఇదే త్రైమాసికంలో రూ. 86 కోట్లుగా ఉన్న ఏకీకృత నికర లాభం, ఈ ఏడాది 34 శాతం వృద్ధితో రూ. 116 కోట్లకు చేరుకుంది. సోలార్ ప్రాజెక్ట్ల బలమైన అమలు కారణంగా రాబడి ఏకంగా 53 శాతం ఎగబాకి రూ. 603 కోట్ల నుంచి రూ. 924 కోట్లకు పెరిగింది. ప్రస్తుతం కంపెనీ మొత్తం మార్కెట్ క్యాపిటలైజేషన్ రూ. 10,636.49 కోట్లుగా ఉంది. ఫలితాలు బాగున్నప్పటికీ, జులై 23న ప్రారంభ ట్రేడింగ్లో ఈ షేరు బాంబే స్టాక్ ఎక్స్ఛేంజ్ (BSE)లో దాదాపు 5 శాతం క్షీణించి రూ. 970.65 (4.78 శాతం నష్టంతో) వద్ద ట్రేడైంది.
భారీ ఆర్డర్ బుక్, వ్యూహాత్మక విస్తరణ..
కేవలం సోలార్ ఎనర్జీకే పరిమితం కాకుండా.. అసోసియేటెడ్ పవర్ స్ట్రక్చర్స్ ప్రైవేట్ లిమిటెడ్ (APSPL)లో 55 శాతం వాటాను దక్కించుకోవడం ద్వారా కంపెనీ ట్రాన్స్మిషన్, డిస్ట్రిబ్యూషన్ (T&D), బ్యాటరీ ఎనర్జీ స్టోరేజ్ సిస్టమ్స్ (BESS) రంగాల్లోకి విస్తరించింది. ప్రస్తుతం కంపెనీ చేతిలో రూ. 5,300 కోట్లకు పైగా విలువైన ఆర్డర్ బుక్ ఉంది. భవిష్యత్తులో 37 GWp సోలార్ ప్రాజెక్టులు, 10 GWh BESS వెంచర్లు, రూ. 20,000 కోట్లకు పైగా విలువైన ట్రాన్స్మిషన్ టెండర్లతో భారీ బిడ్డింగ్ పైప్లైన్ ఉన్నట్లు కంపెనీ వెల్లడించింది. స్వల్పకాలికంగా షేర్ ధర పడిపోయినప్పటికీ, ఈ బలమైన ఫండమెంటల్స్ భవిష్యత్తులో కంపెనీకి మంచి వృద్ధిని ఇస్తాయని అంచనా వేస్తున్నారు.
