అక్షరటుడే, వెబ్డెస్క్: TB Reward Cash | క్షయ వ్యాధి (TB) నియంత్రణలో విశేష పనితీరు కనబరిచినందుకు నిజామాబాద్ జిల్లాకు వరుసగా మూడు సంవత్సరాలు జాతీయ స్థాయి గుర్తింపు లభించింది. అయితే ఈ అవార్డులతో పాటు జిల్లాకు వచ్చినట్లు పేర్కొంటున్న మొత్తం రూ.10 లక్షల నగదు రివార్డ్ ఇప్పుడు వివాదాస్పదంగా మారింది.
అవార్డు కోసం క్షేత్రస్థాయిలో శ్రమించిన ఉద్యోగులకు ప్రోత్సాహకంగా, TB విభాగానికి అవసరమైన కార్యక్రమాలకు వినియోగించాల్సిన నగదు ప్రస్తుతం ఎక్కడ ఉందన్న ప్రశ్నలు జిల్లా వైద్య ఉద్యోగుల నుంచి వెల్లువెత్తుతున్నాయి.
TB Reward Cash | మూడు ఏళ్లలో మూడు అవార్డులు
కేంద్ర ప్రభుత్వం 2021లో ప్రారంభించిన Sub National Certification (SNC) కార్యక్రమం ద్వారా TB నియంత్రణలో మెరుగైన ఫలితాలు సాధించిన జిల్లాలకు జాతీయ స్థాయిలో గుర్తింపు, ప్రోత్సాహకాలు అందిస్తున్నట్లు అధికారులు పేర్కొంటున్నారు.
ఈ ప్రక్రియలో TB కేసుల తగ్గుదల, పరీక్షలు, మందుల పంపిణీ తదితర అంశాలను కేంద్ర, రాష్ట్ర స్థాయి క్షయ నియంత్రణ విభాగాలు పరిశీలిస్తాయి. క్షేత్రస్థాయిలో ఇంటింటి సర్వేలు నిర్వహించడంతో పాటు అనుమానితుల నుంచి నమూనాలు సేకరించి పరీక్షలు నిర్వహిస్తారు. TB నియంత్రణలో సాధించిన పురోగతిని పరిశీలించిన అనంతరం అవార్డులను ప్రకటిస్తారు.
నిజామాబాద్ జిల్లాకు కూడా ఇదే ప్రక్రియలో వరుసగా మూడు సంవత్సరాలు జాతీయ స్థాయి అవార్డులు వచ్చినట్లు సంబంధిత వర్గాలు చెబుతున్నాయి.
- 2021: 20 శాతం TB తగ్గింపునకు కాంస్య పథకం – రూ.2 లక్షలు
- 2022: 40 శాతం TB తగ్గింపునకు వెండి పథకం – రూ.3 లక్షలు
- 2023: 60 శాతం TB తగ్గింపునకు బంగారు పథకం – రూ.5 లక్షలు
- మొత్తం రివార్డ్ నగదు : రూ.10 లక్షలు
TB Reward Cash | అసలు వివాదం ఇక్కడే..
వరుసగా మూడు సంవత్సరాలు జిల్లాకు జాతీయ స్థాయి అవార్డులు దక్కేలా TB నియంత్రణ విభాగం సిబ్బంది క్షేత్రస్థాయిలో పనిచేశారని వైద్య ఉద్యోగులు చెబుతున్నారు. అయితే, అవార్డులతో పాటు వచ్చినట్లు చెబుతున్న రూ.10 లక్షల నగదు రివార్డ్ ఏ ఖాతాలో జమ అయింది? దాన్ని ఏ అవసరాలకు వినియోగించారు? ఎవరెవరి అనుమతులతో ఖర్చు చేశారు? అనే ప్రశ్నలకు స్పష్టత లేదని ఉద్యోగులు ఆరోపిస్తున్నారు.
TB నియంత్రణ కార్యక్రమాల్లో పనిచేస్తున్న సిబ్బందికి ప్రోత్సాహకంగా లేదా విభాగానికి అవసరమైన సామగ్రి, కార్యక్రమాల నిర్వహణకు ఆ మొత్తాన్ని వినియోగించాల్సి ఉందని ఉద్యోగులు పేర్కొంటున్నారు. కానీ, నగదు రివార్డ్కు సంబంధించిన లెక్కలు, వినియోగ వివరాలు తమకు తెలియడం లేదని వారు అంటున్నారు.
TB Reward Cash | బాధ్యత ఎవరిది.. లెక్కలు ఎక్కడ?
గతంలో అవార్డుల ప్రక్రియ సమయంలో TB విభాగానికి సంబంధించి ఉన్నతాధికారి స్థాయిలో పర్యవేక్షణ కొనసాగిందని, అదే సమయంలో ఒక సీనియర్ అసిస్టెంట్ TB విభాగం బాధ్యతలు నిర్వహించేవారని ఉద్యోగులు చెబుతున్నారు. సంబంధిత అధికారి పదవీ విరమణ అనంతరం కూడా TB విభాగం నిర్వహణ, అవార్డు నగదు వినియోగంపై తగిన స్పష్టత లేదని వారు వాపోతున్నారు.
అయితే ఈ ఆరోపణలకు సంబంధించి సంబంధిత అధికారుల వివరణ, నగదు రివార్డ్ జమ అయిన ఖాతాల వివరాలు, వ్యయ రికార్డులు వంటి అధికారిక ఆధారాలు వెలుగులోకి రావాల్సి ఉంది.
TB Reward Cash | తెలంగాణలో ప్రత్యేక గుర్తింపు
SNC కార్యక్రమంలో వరుసగా మూడు సంవత్సరాలు జాతీయ స్థాయి అవార్డులు సాధించిన తెలంగాణలోని ఏకైక జిల్లాగా నిజామాబాద్ నిలిచిందని ఉద్యోగ సంఘాలు పేర్కొంటున్నాయి. TB నియంత్రణలో జిల్లాకు దక్కిన ఈ గుర్తింపు వెనుక క్షేత్రస్థాయి సిబ్బంది కృషి ఉందని వారు చెబుతున్నారు.
అలాంటి ప్రతిష్ఠాత్మక అవార్డులతో పాటు వచ్చిన నగదు రివార్డ్ వినియోగంపై ఇప్పుడు అనుమానాలు వ్యక్తమవుతున్న నేపథ్యంలో శాఖాపరమైన సమగ్ర విచారణ చేపట్టాలని వైద్య ఉద్యోగులు, ఉద్యోగ సంఘాలు డిమాండ్ చేస్తున్నాయి.
TB Reward Cash | ఎన్నో సందేహాలు..
రూ.10 లక్షల నగదు ఎప్పుడు వచ్చింది? ఏ ఖాతాలో జమైంది? ఎప్పుడు, ఎవరి అనుమతితో ఖర్చు చేశారు? ఖర్చు చేసినట్లయితే దానికి సంబంధించిన బిల్లులు, వౌచర్లు, ఆడిట్ వివరాలు ఏమిటి? అనే అంశాలపై స్పష్టత ఇవ్వాలని వారు కోరుతున్నారు.
అవార్డులు సాధించిన సిబ్బంది కృషికి దక్కాల్సిన నగదు రివార్డ్పై పూర్తి లెక్కలు బయటపెట్టడంతో పాటు, అవసరమైతే ఉన్నతస్థాయి విచారణ జరిపి వాస్తవాలను వెల్లడించాలని ఉద్యోగ సంఘాలు డిమాండ్ చేస్తున్నాయి.
