అక్షరటుడే, కామారెడ్డి: Kamareddy Ganesh Mandaps | ఈ ఏడాది వినాయక మండపాల్లో భక్తితో పాటు క్రియేటివిటీ కూడా కొలువుదీరింది. కామారెడ్డి (Kamareddy)లో ఏర్పాటు చేసిన వివిధ గణపతి విగ్రహాలు భక్తులను విశేషంగా ఆకట్టుకుంటున్నాయి.
Kamareddy Ganesh Mandaps | పట్టణంలో హల్క్ అవతారంలో..
పట్టణంలోని పొట్టి శ్రీరాములు విగ్రహం వద్ద ఏర్పాటు చేసిన సెట్టింగ్లో హల్క్ అవతారంలో గణపతి కనిపిస్తే, పక్కనే స్పైడర్ మ్యాన్, సూపర్ మ్యాన్, కెప్టెన్ అమెరికా వంటి అవెంజర్స్ హీరోలు ఉన్నారు. మరో మండపంలో పిల్లనగ్రోవి పట్టుకుని జగన్నాథుడి రూపంలో, నల్లని ఛాయతో కృష్ణ తత్వాన్ని చాటుతూ గణనాథుడు దర్శనమిస్తున్నాడు. హరిజనవాడలో వానర సేనతో, చెట్టు కొమ్మలపై కోతుల మధ్య కొంటెగా నవ్వుతూ కూర్చున్న బాల గణపతి సెట్టింగ్ చిన్నారులను అలరిస్తోంది. ప్రతి సంవత్సరం ప్రత్యేకంగా నిలిచే గణేషుల్లో గొల్లవాడ గణేష్ ఒకటి. ఈసారి శివతత్వాన్ని చాటేలా ద్వాదశ జ్యోతిర్లింగాల మధ్య, నీటిపై లింగాలతో, డమరుకాలు గాల్లో వేలాడుతూ ఏర్పాటు చేసిన మండపం, రుద్రాక్షలతో అభిషేకం చేస్తున్న రుద్ర గణపతి, ఆదియోగి రూపంలో పార్వతీ సమేతంగా తపస్సులో ఉన్న గణపతి విగ్రహాలు ఆధ్యాత్మికతను పంచుతున్నాయి.
Kamareddy Ganesh Mandaps | స్వర్ణగిరి వేంకటేశ్వరస్వామి సెట్టింగ్..
అన్నింటిలోకి ప్రత్యేక ఆకర్షణగా నిలిచింది స్వర్ణగిరి ఆలయం సెట్టింగ్. ఎన్జీవోస్ కాలనీలోని ఓ మండపం లోపల అచ్చం భువనగిరి స్వర్ణగిరి వేంకటేశ్వర ఆలయాన్ని ప్రతిరూపంగా నిర్మించారు. ఇందులో ముందు భాగంలో పెద్ద వేంకటేశ్వర స్వామి విగ్రహంతో పాటు, మధ్యలో నీలిరంగు నీటిపై ఆదిశేషునిపై శయనించిన విష్ణుమూర్తి విగ్రహాన్ని కూడా ఏర్పాటు చేశారు. అనంత పద్మనాభ స్వామి రూపంలో సేదతీరుతున్న విష్ణుమూర్తి, వెనుక నిలుచున్న నల్లరాతి వేంకటేశ్వర స్వామి, గర్భగుడిలో బంగారు కిరీటంతో కొలువైన భారీ గణపతి – ఒకే మండపంలో ముగ్గురు దేవుళ్ల దర్శనం లభించడంతో భక్తులు క్యూ కట్టి మరీ తిలకిస్తూ ఫొటోలు దిగుతున్నారు.
ఇది కూడా చదవండి..: TB Reward Cash | TB రివార్డ్ నగదు ఎక్కడ?..వరుసగా మూడు జాతీయ అవార్డులు.. రూ.10 లక్షల రివార్డు..ఎక్కడికి వెళ్లిందంటూ ఉద్యోగుల ప్రశ్నలు
