అక్షరటుడే వెబ్డెస్క్: Pentagon Data Breach | ప్రపంచంలోనే అత్యంత శక్తివంతమైన దేశంగా పేరున్న అమెరికా ( US ) రక్షణ శాఖ పెంటగాన్కు సైబర్ భద్రతా విభాగంలో భారీ ఎదురుదెబ్బ తగిలింది. పెంటగాన్కు చెందిన కీలకమైన డేటాబేస్లోకి హ్యాకర్లు అక్రమంగా చొరబడి, సుమారు 30 లక్షల మందికి పైగా సిబ్బంది వ్యక్తిగత వివరాలను తస్కరించినట్లు వెల్లడైంది. సైనిక బలగాల సమాచారాన్ని భద్రపరిచే డిఫెన్స్ మ్యాన్పవర్ డేటా సెంటర్ (DMDC) సిస్టమ్లోకి సైబర్ నేరగాళ్లు చొరబడి ఏకంగా తొమ్మిది నెలల పాటు ఎవరికీ అనుమానం రాకుండా అందులోనే తిష్టవేశారు.
Pentagon Data Breach | తొమ్మిది నెలల పాటు..
2025 అక్టోబర్ నుంచి 2026 జులై మధ్య కాలంలో ఈ సైబర్ దాడి జరిగినట్లు అధికారులు గుర్తించారు. ఈ డేటా లీక్ వల్ల ఏకంగా 27.6 లక్షల మంది ప్రాణాలతో ఉన్నవారితో పాటు, మరో 2.94 లక్షల మంది మరణించిన వారి వ్యక్తిగత సమాచారం బయటకు పొక్కింది. ఇందులో వ్యక్తుల పేర్లు, సోషల్ సెక్యూరిటీ నంబర్లు, పుట్టిన తేదీలు, కాంటాక్ట్ వివరాలు, వారు పనిచేస్తున్న ఉద్యోగాలకు సంబంధించిన పూర్తి రికార్డులు ఉన్నాయి. అయితే, ఇంతటి కీలకమైన సమాచారాన్ని ఎన్క్రిప్ట్ చేయకుండా, ఎవరైనా సులభంగా చదివేలా ఉంచడం వల్ల ప్రమాద తీవ్రత మరింత పెరిగింది. 2026 జులైలో ఈ లోపాన్ని గుర్తించిన వెంటనే పెంటగాన్ అధికారులు సిస్టమ్ను సరిచేసి, సమాచారం మరింతగా లీక్ కాకుండా చర్యలు తీసుకున్నారు.
Pentagon Data Breach | భద్రతకు పెను ముప్పు..
DMDC అనేది పెంటగాన్కు అత్యంత కీలకమైన పర్సనల్ రికార్డ్స్ నిధి. ప్రస్తుతం విధుల్లో ఉన్న సైనికులు, రిజర్వ్ దళాలు, సివిలియన్ ఉద్యోగులు, కాంట్రాక్టర్లు, రిటైర్డ్ సిబ్బందితో కలిపి దాదాపు 6 కోట్లకు పైగా రికార్డులను ఈ ఏజెన్సీ నిర్వహిస్తుంది. ఈ లీక్లో కేవలం సాధారణ వివరాలే కాకుండా వారు ఏ హోదాలో, ఏ ఉద్యోగం చేస్తున్నారు అనే గోప్యమైన సమాచారం కూడా బయటకు రావడం అమెరికా జాతీయ భద్రతకు పెద్ద సవాల్గా మారింది. ఈ డేటా ఆధారంగా శత్రుదేశాలు లేదా హ్యాకర్లు అమెరికా సైనిక నిర్మాణం, వ్యూహాత్మక వివరాలను సులభంగా అంచనా వేసే ప్రమాదం ఉందని నిపుణులు హెచ్చరిస్తున్నారు.
Pentagon Data Breach | అధికారుల స్పందన..
ఇప్పటివరకు ఈ సమాచారాన్ని ఎవరూ దుర్వినియోగం చేసినట్లు ఎలాంటి ఆధారాలు దొరకలేదని అధికారులు స్పష్టం చేశారు. బాధితులకు మేలు జరిగేలా ఒక ఏడాది పాటు ఉచితంగా క్రెడిట్ మానిటరింగ్, ఐడెంటిటీ ప్రొటెక్షన్ సేవలను అందిస్తున్నారు. అయితే, అత్యంత పటిష్టంగా ఉండాల్సిన అమెరికా రక్షణ వ్యవస్థలోనే ఇలాంటి భద్రతా లోపాలు బయటపడటం వారి సైబర్ సన్నాహాలపై తీవ్రమైన ప్రశ్నలను లేవనెత్తుతోంది. ఈ దాడి వెనుక ఎవరున్నారు, వారి అసలు ఉద్దేశం ఏమిటనే కోణంలో పెంటగాన్ అధికారులు దర్యాప్తు ముమ్మరం చేశారు.
ఇది కూడా చదవండి: VBG Ramji Scheme | ఉపాధి కూలీలకు ఊరట.. జిల్లాలో జోరుగా వీబీ జీ రామ్జీ పనులు
