అక్షరటుడే వెబ్‌డెస్క్: Shivkrupanand Swamiji | హిమాలయన్ సమర్పన్ మెడిటేషన్ వ్యవస్థాపకులు, ఆధ్యాత్మిక గురువు శ్రీ శ్రీ శ్రీ శివకృపానంద స్వామీజీకి అరుదైన గౌరవం దక్కింది. ప్రపంచ ధ్యాన దినోత్సవ పాలక కమిటీ అంతర్జాతీయ వైస్ చైర్మన్‌గా, అలాగే దక్షిణాసియా ప్రాంత చైర్‌పర్సన్‌గా ఆయన నియమితులయ్యారు. ప్రపంచ ధ్యాన దినోత్సవ సంఘం, ప్రపంచ ధ్యాన ఫౌండేషన్‌లు సంయుక్తంగా ఒప్పందం కుదుర్చుకుని ఈ నియామకాన్ని అధికారికంగా ప్రకటించాయి.
Shivkrupanand Swamiji | ధ్యానానికి ప్రాముఖ్యత..
నేటి డిజిటల్ యుగంలో ఆర్టిఫిషియల్ ఇంటెలిజెన్స్ (AI), నిరంతర ఇంటర్నెట్ అనుసంధానం ఆధిపత్యం చెలాయిస్తున్న తరుణంలో మానసిక ప్రశాంతతకు ధ్యానాన్ని ఒక ముఖ్యమైన సాధనంగా మార్చాలని ప్రపంచ ధ్యాన దినోత్సవ నిర్వాహకులు భావిస్తున్నారు. స్వామీజీ నాయకత్వం వల్ల మానవ చైతన్యానికి, సాంకేతికతకు మధ్య సమన్వయం ఏర్పడుతుందని విశ్వసిస్తున్నారు. ప్రతి సంవత్సరం డిసెంబరు 21న జరిగే ప్రపంచ ధ్యాన దినోత్సవం ద్వారా ప్రజల నిత్య జీవితంలో అంతర్గత సమతుల్యతను, సామూహిక చైతన్యాన్ని భాగం చేయడమే ఈ సంస్థ ప్రధాన లక్ష్యం.
Shivkrupanand Swamiji | ఆధ్యాత్మిక భారత్ ముద్ర..
యోగ, ధ్యానం, అంతర్గత పరిపూర్ణతకు భారతదేశం మొదటి నుంచి ప్రపంచంలోనే ప్రధాన కేంద్రంగా భాసిల్లుతోంది. అంతర్జాతీయ యోగా దినోత్సవానికి ప్రపంచవ్యాప్తంగా లభిస్తున్న విశేష ఆదరణకు తోడు, ఇప్పుడు శివకృపానంద స్వామీజీకి ఈ అంతర్జాతీయ పదవి లభించడం వల్ల సమగ్ర ఆరోగ్యం, ప్రపంచ శాంతి సాధనలో భారత్ ప్రాముఖ్యత మరింత బలపడనుంది.
Shivkrupanand Swamiji | అంతర్గత శాంతితోనే ..
తమ నియామకంపై స్వామీజీ స్పందిస్తూ.. “పుస్తకాల ద్వారా గానీ, ఆయుధాల ద్వారా గానీ ప్రపంచ శాంతిని సాధించడం అసాధ్యం. ప్రతి ఒక్కరిలో అంతర్గత శాంతి ఏర్పడినప్పుడే ప్రపంచ శాంతికి పునాది పడుతుంది” అని వ్యాఖ్యానించారు. మానవుడిని కేవలం భౌతిక శరీరంగా చూడటం వల్లే మతం, కులం, జాతీయత పేరిట సమాజంలో విభేదాలు వస్తున్నాయని ఆయన అభిప్రాయపడ్డారు. ధ్యానం అంటే ఆత్మసాక్షాత్కారం వైపు సాగే ప్రయాణమని, ప్రతి వ్యక్తిలో వచ్చే ఆధ్యాత్మిక మార్పు ద్వారానే విశ్వ సోదరభావం సాధ్యమవుతుందని వివరించారు.
Shivkrupanand Swamiji | 18 ఏళ్ల హిమాలయ సాధన..
స్వామీజీ సుమారు 18 సంవత్సరాల పాటు హిమాలయాల్లో నివసించి కఠోర సాధన చేశారు. అనేకమంది సిద్ధులు, యోగుల నుంచి నేరుగా ఆధ్యాత్మిక జ్ఞానాన్ని పొందిన ఆయన, 1994లో ‘హిమాలయన్ సమర్పన్ మెడిటేషన్’ను నెలకొల్పారు. గత ముప్పై ఏళ్లుగా ప్రపంచవ్యాప్తంగా 72కు పైగా దేశాల్లో సుమారు 30 లక్షల మందికి పైగా ప్రజలకు ధ్యానాన్ని ఉచితంగా బోధిస్తూ వారి జీవితాల్లో వెలుగులు నింపుతున్నారు.
ఇది కూడా చదవండి: Avocado Benefits | షుగర్ కంట్రోల్ నుంచి కంటిచూపు వరకు.. అవకాడో అద్భుత ప్రయోజనాలు ఇవే..!
