అక్షరటుడే, వెబ్డెస్క్: తమిళనాడు రాజకీయాల్లో సంచలనం సృష్టించిన విజయ్ (TVK Vijay) ఇప్పుడు ముఖ్యమంత్రి పీఠానికి చేరువయ్యారు. అయితే అత్యల్ప మెజారిటీ, మిత్రపక్షాల ఒత్తిడి, అనుభవ లేమి, బలమైన ప్రతిపక్షాల సవాళ్ల మధ్య ఆయన ప్రభుత్వం ఎంతకాలం నిలబడుతుందన్న చర్చ రాజకీయ వర్గాల్లో ఆసక్తికరంగా మారింది.
TVK Vijay | పార్టీ స్థాపించిన కొన్నిరోజులకే..
తమిళనాడు రాజకీయాల్లో కొత్త అధ్యాయానికి తెరలేపిన విజయ్ (TVK Vijay), తన పార్టీ తమిళగ వెట్రి కళగం ద్వారా కోట్లాది మంది అభిమానుల ఆశలను మోస్తూ అధికారానికి చేరువయ్యారు. పార్టీ స్థాపించిన కొద్ది కాలంలోనే భారీ రాజకీయ ప్రభావం చూపిన విజయ్.. ఇప్పుడు ముఖ్యమంత్రిగా ప్రమాణ స్వీకారానికి సిద్ధమవుతున్న వేళ రాష్ట్ర రాజకీయాల్లో ఉత్కంఠ మరింత పెరిగింది. అయితే ఈ విజయ ప్రయాణం అంత సులభం కాదనే విశ్లేషణలు బలంగా వినిపిస్తున్నాయి. దశాబ్దాలుగా ద్రవిడ మున్నేట్ర కళగం, అన్నా ద్రవిడ మున్నేట్ర కళగం వంటి దిగ్గజ పార్టీల ఆధిపత్యం కొనసాగిన తమిళనాడు రాజకీయాల్లో.. విజయ్ ఇప్పుడు అత్యంత క్లిష్టమైన సమీకరణాల మధ్య అధికార బాధ్యతలు చేపట్టబోతున్నారని రాజకీయ విశ్లేషకులు భావిస్తున్నారు.
TVK Vijay | సంఖ్యాబలం.. ప్రతి క్షణం పరీక్షే..!
విజయ్ ప్రభుత్వానికి ఉన్న ప్రధాన సవాలు సంఖ్యాబలం. మ్యాజిక్ ఫిగర్‌ను అతి కష్టం మీద అందుకున్న ఈ కూటమి ప్రభుత్వం, ఒకటి లేదా రెండు స్థానాల మెజారిటీతోనే నిలబడుతున్నట్లు తెలుస్తోంది. దీంతో ప్రతి ఓటు కీలకంగా మారనుంది. ప్రజాస్వామ్యంలో సంఖ్యాబలం ప్రభుత్వానికి ప్రాణవాయువులాంటిదే. ఒకరిద్దరు ఎమ్మెల్యేలు అసంతృప్తి వ్యక్తం చేసినా, లేదా రాజీనామా చేసినా ప్రభుత్వం ప్రమాదంలో పడే అవకాశం ఉంది. ఇలాంటి పరిస్థితుల్లో స్వతంత్ర అభ్యర్థులు, చిన్నపాటి పార్టీలు కూడా “కింగ్ మేకర్” పాత్రలోకి రావచ్చని రాజకీయ వర్గాలు విశ్లేషిస్తున్నాయి. విజయ్ ప్రభుత్వానికి మద్దతు ఇస్తున్న కాంగ్రెస్‌, వామపక్షాలు, వీసీకే వంటి పార్టీలు గతంలో నుంచే డీఎంకే కూటమిలో కీలక భాగస్వాములుగా కొనసాగుతున్నాయి. ఈ నేపథ్యంలో వారి మద్దతు వెనుక కూడా రాజకీయ వ్యూహాలు ఉన్నాయన్న చర్చ జరుగుతోంది.
దీంతో విజయ్ ప్రభుత్వం ప్రతి నిర్ణయంలోనూ మిత్రపక్షాల అభిప్రాయాలను పరిగణనలోకి తీసుకోవాల్సిన పరిస్థితి ఏర్పడే అవకాశం ఉంది. తన సొంత రాజకీయ ఎజెండాను అమలు చేయాలనుకున్నప్పుడు, కూటమి భాగస్వాముల నుంచి వ్యతిరేకత వస్తే అది విజయ్‌కు పెద్ద సవాలుగా మారవచ్చు. సినిమాల్లో హీరోగా కోట్లాది అభిమానులను అలరించిన విజయ్‌కు ప్రజాదరణ అపారంగా ఉన్నా, పరిపాలనా అనుభవం మాత్రం పెద్దగా లేదు. రాజకీయాల్లో గెలవడం ఒక ఎత్తయితే, ప్రభుత్వాన్ని స్థిరంగా నడపడం మరో పెద్ద పరీక్షగా మారనుంది. సంకీర్ణ ప్రభుత్వంలో శాఖల కేటాయింపులు, నిధుల పంపిణీ, అధికార యంత్రాంగంపై పట్టు వంటి అంశాల్లో మిత్రపక్షాల ఒత్తిడి తప్పదని రాజకీయ పరిశీలకులు చెబుతున్నారు. ముఖ్యంగా సీనియర్ రాజకీయ నాయకులు, ఉన్నతాధికారులతో సమన్వయం చేసుకుంటూ ప్రజలకు ఇచ్చిన హామీలను అమలు చేయడం విజయ్‌కు అగ్నిపరీక్షగా మారవచ్చు.
ఇప్పటివరకు ప్రజల్లో “స్టార్ హీరో”గా గుర్తింపు పొందిన విజయ్, ఇకపై తనను తాను “పరిపక్వ రాజకీయ నాయకుడు”గా నిరూపించుకోవాల్సిన సమయం వచ్చింది. మిత్రపక్షాలను సమన్వయం చేసుకుంటూ, ప్రతిపక్షాల వ్యూహాలను ఎదుర్కొంటూ, ప్రజల నమ్మకాన్ని నిలబెట్టుకోవడం ఆయనకు అత్యంత కీలకంగా మారింది. రాజకీయాల్లో గెలవడం మాత్రమే కాదు.. గెలిచిన అధికారాన్ని నిలబెట్టుకోవడం కూడా ఇప్పుడు విజయ్ ముందు నిలిచిన పెద్ద సవాల్గా చెప్పవచ్చు. ఈ రాజకీయ చదరంగంలో ఆయన నిజమైన “రాజు”గా నిలుస్తారా? లేక కేవలం ఒక “పావు”గానే మిగిలిపోతారా? అన్నది రాబోయే రోజుల్లో తేలనుంది.
ఇది కూడా చదవండి..: Vijay Thalapathy Prediction | విజయ్ దళపతిపై వేణుస్వామి సంచలన జోస్యం.. త్రిష లేకపోతే రిజల్ట్ వేరేలా..
