అక్షరటుడే వెబ్డెస్క్: Human Vs Robot | సాంకేతిక ప్రపంచంలో ఎప్పుడూ ఆసక్తి రేకెత్తించే ‘మనిషి వర్సెస్ మెషిన్’ పోరులో ఈసారి మనిషి అద్భుత విజయం సాధించాడు. ప్రముఖ రోబోటిక్స్ సంస్థ ‘ఫిగర్ ఏఐ’ నిర్వహించిన ఒక ప్యాకేజీల సార్టింగ్ పోటీలో, అత్యాధునిక హ్యూమనాయిడ్ రోబోను వెనక్కి నెట్టి ఒక సాదాసీదా ఇంటర్న్ విజేతగా నిలిచాడు. అయితే, రోబోటిక్స్ రంగం శరవేగంగా దూసుకుపోతున్న తరుణంలో.. రోబోపై మనిషి సాధించిన ఆఖరి విజయం బహుశా ఇదే కావొచ్చని సదరు కంపెనీ సీఈఓ ప్రకటించడం గమనార్హం.
Human Vs Robot | 10 గంటల పాటు సాగిన సుదీర్ఘ పోరాటం..
ఒక వేర్హౌస్ వేదికగా 10 గంటల పాటు సాగిన ఈ పోటీని కంపెనీ లైవ్స్ట్రీమ్ ద్వారా ప్రపంచానికి చూపించింది. ‘హెలిక్స్-02 ఏఐ’ సాంకేతికతతో పనిచేసే కంపెనీ టాప్ రోబో ‘F.03’తో, అదే సంస్థలో ఇంటర్న్గా చేస్తున్న ‘ఎయిమ్’ అనే యువకుడు తలపడ్డాడు. ప్యాకేజీలపై ఉన్న బార్కోడ్ను గుర్తించి, వాటిని కన్వేయర్ బెల్ట్పై సరైన పద్ధతిలో అమర్చడమే వీరిద్దరి లక్ష్యం. కార్మిక చట్టాల ప్రకారం పోటీ మధ్యలో మనిషికి భోజన, విశ్రాంతి విరామాలు ఇచ్చారు. ఆ సమయంలో రోబో అలుపు లేకుండా నిరంతరాయంగా పనిచేస్తూ కుందేలు-తాబేలు కథను తలపించింది. అయితే, విరామం తర్వాత తిరిగొచ్చిన ఎయిమ్ తన అద్భుతమైన శరవేగంతో ప్యాకేజీలను సార్ట్ చేసి రోబోను ఓడించాడు.
Human Vs Robot | మనిషి శ్రమకు దక్కిన గెలుపు..
ఈ సుదీర్ఘ పోటీ ముగిసేసరికి మనిషి (ఎయిమ్) 12,924 ప్యాకేజీలను సార్ట్ చేయగా, రోబో (F.03) 12,732 ప్యాకేజీలను మాత్రమే సార్ట్ చేయగలిగింది. ఎయిమ్ ఒక్కో ప్యాకేజీకి 2.79 సెకన్ల సమయం తీసుకోగా, రోబో 2.83 సెకన్ల సమయం తీసుకుంది. గెలుపు అనంతరం తీవ్ర శారీరక శ్రమకు గురైన ఎయిమ్, “ఈ పోటీ వల్ల నా ఎడమ చెయ్యి విరిగిపోయినంత పనైంది” అని నవ్వుతూ వ్యాఖ్యానించాడు. మనిషికి అలసట ఉంటుంది కానీ యంత్రానికి ఉండదనే విషయాన్ని ఈ పోటీ మరోసారి నిరూపించింది. ఎందుకంటే, ఇదే రోబో గతంలో 24 గంటల పాటు ఏకధాటిగా పనిచేసి లక్షకు పైగా ప్యాకేజీలను సార్ట్ చేసి రికార్డు సృష్టించింది.
Human Vs Robot | భవిష్యత్తులో యంత్రాలదే పైచేయి..
ఈ నేపథ్యంలో ఫిగర్ ఏఐ సీఈఓ బ్రెట్ అడ్కాక్ సోషల్ మీడియా వేదికగా స్పందిస్తూ.. భవిష్యత్తులో రోబోలు మరింత వేగంగా మారుతాయని, ఒక మనిషి రోబోను ఓడించడం బహుశా ఇదే చివరిసారి కావొచ్చని పేర్కొన్నారు. ఒకప్పుడు స్టీమ్ ఇంజిన్తో పోటీపడి గెలిచిన ‘జాన్ హెన్రీ’ చారిత్రాత్మక కథను ఈ ఘటన గుర్తుచేస్తోందని నెటిజన్లు అభిప్రాయపడుతున్నారు. టెక్నాలజీ యుగంలో మానవ సామర్థ్యానికి ప్రతీకగా నిలిచిన ఈ విజయం ఇప్పుడు అందరినీ ఎంతగానో ఆకట్టుకుంటోంది.
ఇది కూడా చదవండి: Telangana Sports Week | క్రీడా వారోత్సవాలను ప్రారంభించిన మంత్రులు
