అక్షరటుడే, వెబ్డెస్క్: EPFO WhatsApp | ప్రస్తుతం ఉమాంగ్ యాప్, ఈపీఎఫ్వో వెబ్ సైట్ (EPFO Website) ద్వారా పీఎఫ్ ఆన్లైన్ సేవలు అందుబాటులో ఉన్నాయి. అయితే ఆన్లైన్ పోర్టల్ సరిగా పనిచేయకపోవడం, క్లెయిమ్లు రిజెక్ట్ అవుతుండడంతో ఖాతాదారులు విసిగిపోతున్నారు.
ఈపీఎఫ్వో ఆఫీసుల చుట్టూ తిరగలేక అవస్థలు పడుతున్నారు. దీనిపై భారీగా ఫిర్యాదులు అందుతున్నాయి. ఏడాది కాలంలో ప్రభుత్వ శాఖలన్నింటిలో అత్యధికంగా ఫిర్యాదులు వచ్చింది కార్మిక ఉపాధి మంత్రిత్వ శాఖ పైనే కావడం గమనార్హం.
EPFO WhatsApp | సమస్య పరిష్కారానికి చర్యలు..
ఫిర్యాదులు పెరిగిపోతున్న నేపథ్యంలో సమస్యలను వేగంగా పరిష్కరించేందుకు ఎంప్లాయీస్ ప్రావిడెంట్ ఫండ్ ఆర్గనైజేషన్ చర్యలు చేపట్టింది. వాట్సాప్ వేదికగా ఇకపై పీఎఫ్ సేవలు (PF Services) అందించేందుకు ఏఐ ఆధారిత చాట్బాట్ సేవలను అందుబాటులోకి తేవడానికి సన్నాహాలు చేస్తోంది. ఇది అందుబాటులోకి వస్తే ఇకపై ఉద్యోగులు వాట్సాప్ ద్వారానే పీఎఫ్ బ్యాలెన్స్ చెక్ చేసుకోవడం, క్లెయిమ్ స్టేటస్ తెలుసుకోవడం వంటి సేవలను పొందవచ్చు. ఈ చాట్ బాట్ 24 గంటలు అందుబాటులో ఉంటుందని సంస్థ ప్రకటించింది. ప్రభుత్వ సేవల డిజిటలైజేషన్లో ఇదొక విప్లవాత్మక మార్పుగా నిలుస్తుందని భావిస్తున్నారు.
EPFO WhatsApp | ఎలా వినియోగించాలంటే..
యూఏఎన్తో లింక్ అయిన రిజిస్టర్డ్ మొబైల్ నంబర్ నుంచి ఈపీఎఫ్వో తీసుకొస్తున్న ఏఐ చాట్బాట్ నంబర్కు హాయ్ అని మెస్సేజ్ చేయాలి.ఆ తర్వాత ఈపీఎఫ్వో మీ మొబైల్ నెంబర్ను ధ్రువీకరించిన అనంతరం మెనూ ఆప్షన్ వస్తుంది.
అందులో భాషను ఎంపిక చేసుకోవాలి. ఇంగ్లిష్, హిందీలోనే కాకుండా ప్రాంతీయ భాషలలో కూడా సేవలు అందనున్నాయి.
తర్వాత బ్యాలెన్స్ చెకింగ్, గత 5 కాంట్రిబ్యూషన్స్, ఈపీఎఫ్వో క్లెయిమ్స్ స్టేటస్, కంప్లైంట్ వంటి ఆప్షన్లుంటాయి. వాటిలో కావాల్సిన ఆప్షన్ ఎంచుకుని సేవలు పొందవచ్చు. ఆధార్ అథెంటికేషన్ పూర్తికాని వారికి లేదా డైరెక్ట్ బెనిఫిట్ ట్రాన్స్ఫర్ లింక్ కాని బ్యాంక్ ఖాతాలు ఉన్నవారికి కూడా ఈ చాట్బాట్ ద్వారా నేరుగా గైడెన్స్, అలర్ట్స్ అందుతాయి.
ఇది కూడా చదవండి..: Ladakh Tour Package | లడాఖ్ అందాలను చూసొద్దామా..
