BC Caste Renaming|తెలంగాణలో పలు బీసీ కులాల పేర్లు మార్పు.. కొత్త పేర్ల జాబితా ఇదే!

అక్షరటుడే వెబ్‌డెస్క్:BC Caste Renaming|తెలంగాణలోని వెనుకబడిన తరగతుల (BC) సామాజిక గౌరవాన్ని పెంపొందించే దిశగా రాష్ట్ర ప్రభుత్వం ఒక చారిత్రాత్మక అడుగు వేసింది. ఏళ్ల తరబడి కొనసాగుతున్న విన్నపాలను ఆలకించిన సర్కార్, బీసీ జాబితాలో అగౌరవంగా ఉన్న కొన్ని కులాల పేర్లను మారుస్తూ కేబినెట్ ద్వారా కీలక నిర్ణయం తీసుకుంది. కేవలం పేర్ల మార్పు మాత్రమే కాకుండా, పలు కులాలకు గౌరవప్రదమైన పర్యాయపదాలను జోడిస్తూ అధికారిక రికార్డులను సవరించాలని నిర్ణయించింది. ఈ మార్పుల ద్వారా విద్యార్థులు, నిరుద్యోగులు సామాజికంగా మరింత ఆత్మగౌరవంతో ముందుకు సాగే అవకాశం లభించనుంది.

BC Caste Renaming|కొత్త పేర్ల ఖరారు..

బీసీ కమిషన్ సిఫార్సుల మేరకు గ్రూప్-ఏ విభాగంలో ప్రభుత్వం ప్రధానమైన మార్పులు చేసింది. ముఖ్యంగా ఇప్పటివరకు రికార్డుల్లో ఉన్న ‘దొమ్మర’ అనే పదాన్ని తొలగించి, దాని స్థానంలో ‘గడ వంశీయ’ అనే పేరును అధికారికంగా ఖరారు చేశారు. అలాగే ‘పిచ్చకుంట్ల’ అనే పదాన్ని మారుస్తూ, ఆ కులాన్ని ఇకపై ‘వంశ రాజ్’గా వ్యవహరించాలని నిర్ణయించారు. కులాల పేర్లు పిలవడానికి ఇబ్బందికరంగా ఉండకూడదన్న ఉద్దేశంతో తీసుకున్న ఈ నిర్ణయం ఆయా వర్గాల్లో హర్షాన్ని నింపుతోంది.

BC Caste Renaming|పర్యాయపదాలను జతచేస్తూ..

కేవలం పేర్ల మార్పుకే పరిమితం కాకుండా, కొన్ని కులాలకు గౌరవప్రదమైన గుర్తింపునిచ్చేలా పర్యాయపదాలను ప్రభుత్వం చేర్చింది. బుడబుక్కల కులానికి ‘శివ క్షత్రియ’ అనే పదాన్ని జతచేయగా, వన్నార్ అనే పదం స్థానంలో ‘ధోబీ’ని చేర్చి మొత్తంగా ‘రజక, చాకలి, ధోబీ’గా రికార్డుల్లో నమోదు చేయనున్నారు. అలాగే వీరభద్రియ కులానికి వారి అభ్యర్థన మేరకు ‘వీరముష్టి, నెట్టి కోటల’ అనే పేర్లను కూడా అధికారికంగా గుర్తించనున్నారు. దీనివల్ల ప్రభుత్వ ధృవీకరణ పత్రాల్లో స్పష్టత రావడంతో పాటు సామాజిక హోదా పెరుగుతుంది.

BC Caste Renaming|గ్రూప్-డి విభాగంలో మార్పులు ..

బీసీ గ్రూప్-డి విభాగంలో కూడా ప్రభుత్వం కొన్ని కీలక సవరణలు చేసింది. ముఖ్యంగా ‘శూద్ర కులం’ అనే పదాన్ని రికార్డుల నుంచి పూర్తిగా తొలగించి, దాని స్థానంలో ‘తమ్మలి (బ్రాహ్మణేతర)’గా పేరు మార్చారు. మేర కులానికి ‘మేరు’ అనే పదాన్ని కలిపి ‘మేర, మేరు, చిప్పోలు’గా గుర్తించాలని నిర్ణయించారు. అసభ్యకరంగా లేదా కించపరిచే విధంగా ఉన్న పేర్లను తొలగించడం వల్ల ఆయా వర్గాల ప్రజలు ఆత్మగౌరవంతో జీవించే వీలుంటుందని ప్రభుత్వం భావిస్తోంది. ఈ మార్పులు తక్షణమే అమలులోకి వచ్చేలా ఆదేశాలు జారీ అయ్యాయి.

ఇది కూగా చదవండి: Model School Merit List | తెలంగాణ మోడల్ స్కూళ్ల ప్రవేశ పరీక్ష 2026 మెరిట్ జాబితా విడుదల