భారతదేశంలో ఎలక్ట్రిక్ మొబిలిటీ వ్యవస్థ వేగంగా మారుతున్న తరుణంలో, వినియోగదారులు విద్యుత్ వాహనాలను ఉపయోగించడానికి సిద్ధంగా ఉన్నారా లేదా అన్నది కాకుండా, ఫైనాన్షియల్ వ్యవస్థ ఈ మార్పును చౌకగా, విశ్వసనీయమైనదిగా, సుస్థిరమైనదిగా మార్చగలదా లేదా అనేది అసలైన ప్రశ్న అని ఉజ్జీవన్ స్మాల్ ఫైనాన్స్ బ్యాంక్ వెహికల్ ఫైనాన్స్ బిజినెస్ హెడ్ ప్రేమ్‌కుమార్ జి. పేర్కొన్నారు. పెట్రోల్ ధరల అస్థిరత వల్ల రోజువారీ ప్రయాణికులు, చిన్న వ్యాపారులు ఎలక్ట్రిక్ వాహనాల వైపు మొగ్గు చూపుతున్నారని తెలిపారు.
వాహన్ (VAHAN) డేటా ప్రకారం, 2025 క్యాలెండర్ సంవత్సరంలో దాదాపు 12.8 లక్షల ఎలక్ట్రిక్ ద్విచక్ర వాహనాలు నమోదయ్యాయని, ఇది 2024తో పోలిస్తే 11.4 శాతం పెరుగుదలను సూచిస్తుందని ఆయన వెల్లడించారు. తదుపరి దశ వృద్ధి అనేది ధరల విషయంలో ఆచరణాత్మకంగా ఆలోచించే కస్టమర్లను ఆకట్టుకోవడంపైనే ఆధారపడి ఉంటుందని, అందుకోసం వాహన రుణాల (వెహికల్ ఫైనాన్సింగ్) పాత్ర కీలకమని అభిప్రాయపడ్డారు. ‘పీఎం ఈ-డ్రైవ్’ (PM E-DRIVE) వంటి ప్రభుత్వ పథకాలు సబ్సిడీలను అందిస్తుండగా, బ్యాంకులు మరియు ఆర్థిక సంస్థలు పారదర్శక నిబంధనలు, సులభమైన డాక్యుమెంటేషన్, సరైన రీపేమెంట్ షెడ్యూళ్లతో బాధ్యతాయుతమైన రుణ వితరణను అందించాలని ఆయన సూచించారు.
