అక్షరటుడే వెబ్‌డెస్క్: Festival Financial Planning | హైదరాబాద్ ( Hyderabad )నగరం పండుగల కాంతులతో మెరిసిపోతోంది. చార్మినార్, అబిడ్స్ గల్లీల నుంచి హైటెక్ సిటీ షాపింగ్ మాళ్ల వరకు ఎక్కడ చూసినా పండుగ కొనుగోలుదారుల సందడే కనిపిస్తోంది. పండుగ అనగానే కొత్త దుస్తులు, ఎలక్ట్రానిక్ వస్తువులు, పసిడి ఆభరణాలు కొనడం మన సాంప్రదాయం. అయితే, మారుతున్న నేటి కాలంలో మన కుటుంబాలకు ఇవ్వగలిగిన అత్యంత విలువైన కానుక కేవలం రంగురంగుల బహుమతి ప్యాకెట్లలోనే ఉందా? అని ఒకసారి ఆలోచించాల్సిన అవసరం వచ్చింది.
Festival Financial Planning | ఆర్థిక చక్రం భేష్..
పండుగల వేళ చేసే ఖర్చులు మన దేశ ఆర్థిక వ్యవస్థకు ఎంతో మేలు చేస్తాయి. లాడ్ బజార్ వ్యాపారుల నుంచి జూబ్లీహిల్స్ పెద్ద పెద్ద షోరూమ్‌ల వరకు, అలాగే చేతివృత్తుల వారికి ఈ పండుగ సీజనే ప్రధాన ఆధారం. అయితే, ఆర్థిక వ్యవస్థ బాగుండాలనే పేరుతో మన సొంత జేబులకు చిల్లులు పొడుచుకోవడం తెలివైన పని కాదు. క్రెడిట్ కార్డులు, ‘నో-కాస్ట్ EMI’ల ఉచ్చులో పడి అప్పులు చేసి వస్తువులు కొనడం వల్ల సంతోషించాల్సిన పండుగ వేళ ఆర్థిక ఒత్తిడికి గురయ్యే ప్రమాదం ఉంది.
Festival Financial Planning |నిజమైన ఆర్థిక స్వాతంత్య్రం ..
కుటుంబ భవిష్యత్తుకు పూర్తి భద్రత ఉందనే నిశ్చింతే నిజమైన ఆర్థిక స్వాతంత్య్రం . ఖరీదైన గ్యాడ్జెట్లు కాలక్రమేణా తమ విలువను కోల్పోయి ఇ-వేస్ట్‌గా మారతాయి. అదే రూ. 50,000 రూపాయలను ఒక మంచి మ్యూచువల్ ఫండ్‌లో ఇన్వెస్ట్ చేస్తే, పదేళ్లలో అది మూడింతలై కుటుంబానికి బలమైన ఆర్థిక రక్షణగా నిలుస్తుంది.
Festival Financial Planning | మారిన పద్ధతులు..
మన సంస్కృతిలో పండుగలప్పుడు లక్ష్మీదేవి స్వరూపంగా రాగి, వెండి, బంగారాలు కొనడం శుభ పరిణామం. అయితే ఇప్పుడు ఆలోచనా విధానం మారాలి. తరుగు, మజూరీ వంటి అదనపు ఖర్చులు, లాకర్ల భయం ఉండే భౌతిక రకాల బంగారం కంటే గోల్డ్ ETFలు, గోల్డ్ మ్యూచువల్ ఫండ్లలో పెట్టుబడి పెట్టడం శ్రేయస్కరం. ఇవి పూర్తి సురక్షితమైనవి , డిజిటల్ రూపంలో సులభంగా దాచుకోవచ్చు. అలాగే, పిల్లల పేరిట SIPలు లేదా ఈక్విటీ పోర్ట్‌ఫోలియోలు ప్రారంభించడం కూడా ఉత్తమమైన మార్గం.
Festival Financial Planning | అసలైన కానుక..
పండుగల వేళ పొదుపు చేయడం అంటే సంతోషాలను త్యాగం చేయడం కాదు. సంబరాలను జరుపుకుంటూనే, పండుగ బోనస్‌లో కొంత భాగాన్ని భవిష్యత్తు కోసం పెట్టుబడి పెట్టడం. తాత్కాలిక షాపింగ్ ఆనందం కంటే, మీ కుటుంబానికి అప్పులు లేని సురక్షితమైన భవిష్యత్తును బహుమతిగా ఇవ్వడమే నిజమైన ప్రేమ. ఈ పండుగ వెలుగులు మీ కుటుంబంలో దశాబ్దాల పాటు నిలవాలంటే ఆర్థిక స్వాతంత్ర్యానికి బాటలు వేయాల్సిందే.
ఇది కూడా చదవండి: Nizamabad Couple Assault Arrest | దంపతులపై దాడిచేసిన ఇద్దరు నిందితుల అరెస్ట్
