అక్షరటుడే, వెబ్డెస్క్: Gamescraft Rummy Culture | మనీ లాండరింగ్ కేసులో గేమ్స్క్రాఫ్ట్ టెక్నాలజీస్, రమ్మీ కల్చర్కు సంబంధించి ఎన్ఫోర్స్మెంట్ డైరెక్టరేట్ (ED) కీలక చర్యలు చేపట్టింది. తాజాగా సుమారు రూ.442.35 కోట్ల విలువైన చర, స్థిరాస్తులను జప్తు చేసినట్లు అధికారులు వెల్లడించారు. తాజా చర్యతో ఈ కేసులో ఇప్పటివరకు ఫ్రీజ్ లేదా జప్తు చేసిన ఆస్తుల మొత్తం విలువ రూ.2,843 కోట్లకు చేరినట్లు సమాచారం.
Gamescraft Rummy Culture | ఫిక్స్డ్ డిపాజిట్లు, విల్లా, కమర్షియల్ ఆస్తులు
తాజా జప్తు చేసిన ఆస్తుల్లో గేమ్స్క్రాఫ్ట్ టెక్నాలజీస్ ప్రైవేట్ లిమిటెడ్ వాటాదారుల కుటుంబ సభ్యులు, ప్రైవేట్ ఫ్యామిలీ ట్రస్టులు, అనుబంధ సంస్థలకు సంబంధించిన ఆస్తులు ఉన్నట్లు తెలుస్తోంది. వీటిలో ఫిక్స్డ్ డిపాజిట్లు, కమర్షియల్ షాపులు, ఒక విల్లా, పలు నివాస ఆస్తులు ఉన్నట్లు ED దర్యాప్తు వివరాలను బట్టి తెలుస్తోంది.
Gamescraft Rummy Culture | FIRల ఆధారంగా మనీలాండరింగ్ దర్యాప్తు
తెలంగాణలోని పలు సంస్థలు నమోదు చేసిన FIRల ఆధారంగా ED మనీలాండరింగ్ దర్యాప్తును ప్రారంభించింది. ఈ విచారణలో ప్రధానంగా గేమ్స్క్రాఫ్ట్ టెక్నాలజీస్, రమ్మీ టైమ్ టెక్నాలజీస్ సంస్థల కార్యకలాపాలను పరిశీలించినట్లు అధికారులు తెలిపారు.
ఈ సంస్థలకు సంబంధించిన రమ్మీ కల్చర్, రమ్మీ ప్రైమ్, రమ్మీ టైమ్ వంటి మొబైల్ అప్లికేషన్ల ద్వారా ఆన్లైన్ క్యాష్ గేమ్స్ నిర్వహించినట్లు దర్యాప్తులో గుర్తించినట్లు ED పేర్కొంది.
Gamescraft Rummy Culture | కోట్లాది మంది వినియోగదారులు
దర్యాప్తు ప్రకారం, ఈ గేమింగ్ ప్లాట్ఫారమ్లకు దేశవ్యాప్తంగా సుమారు 3 కోట్ల మంది వినియోగదారులు ఉన్నట్లు అధికారులు అంచనా వేశారు. తెలంగాణ, ఆంధ్రప్రదేశ్, తమిళనాడు తదితర రాష్ట్రాల నుంచి గణనీయమైన సంఖ్యలో వినియోగదారులు ఉన్నట్లు విచారణలో వెల్లడైనట్లు ED తెలిపింది.
వినియోగదారులు గేమ్స్లో జమ చేసిన మొత్తాలపై సుమారు 10–15 శాతం వరకు ప్లాట్ఫారమ్ కమిషన్గా వసూలు చేసినట్లు దర్యాప్తులో గుర్తించినట్లు అధికారులు పేర్కొన్నారు.
Gamescraft Rummy Culture | బాట్ల వినియోగంపై ఆరోపణలు
గేమింగ్ ప్లాట్ఫారమ్లు పారదర్శకంగా, నిష్పక్షపాతంగా పనిచేస్తాయని, గేమ్స్లో ఆటోమేటెడ్ ప్లేయర్లు లేదా బాట్లు ఉండవని వినియోగదారులకు హామీ ఇచ్చినట్లు దర్యాప్తు వివరాలు చెబుతున్నాయి.
అయితే, వినియోగదారులకు తెలియకుండా లేదా వారి అనుమతి లేకుండా ఆటోమేటెడ్ ప్రోగ్రామ్లు, అల్గారిథమ్ ఆధారిత బాట్లను ఉపయోగించినట్లు దర్యాప్తు అధికారులు గుర్తించినట్లు ED చెప్పుకొస్తోంది.
Paddy Lorry Extortion | వడ్ల లారీని అడ్డగించి రూ.1.20 లక్షలు డిమాండ్.. నలుగురు విలేకరులపై కేసు
ఈ విధమైన బాట్ల వినియోగం వల్ల కొంతమంది వినియోగదారులు ఆర్థికంగా నష్టపోయారని, అదే సమయంలో సంబంధిత సంస్థలకు భారీ మొత్తంలో ఆదాయం సమకూరిందని దర్యాప్తు సంస్థ పేర్కొంది.
