అక్షరటుడే, వెబ్డెస్క్: Neeraj Yadav | ప్రముఖ పారా అథ్లెట్ నీరజ్ యాదవ్ ఆత్మహత్య చేసుకున్నారు. మూడుసార్లు ఆసియా పారా గేమ్స్ (Asian Para Games) గోల్డ్ మెడలిస్ట్ అయిన ఆయన ఢిల్లీలోని తన నివాసంలో విషం తాగి బలవన్మరణానికి పాల్పడ్డారు.
ఆసియా పారా క్రీడల్లో మూడుసార్లు స్వర్ణ పతకాలు సాధించిన నీరజ్ యాదవ్ మంగళవారం రాత్రి తన నివాసంలో ఆత్మహత్య చేసుకున్నాడు. పారా-అథ్లెటిక్స్ ప్రధాన కోచ్ ఎస్. సత్యనారాయణ ఈ విషయాన్ని ధ్రువీకరించారు. డోపింగ్ ఆరోపణలతో సస్పెన్షన్‌కు గురై, ఆసియా పారా క్రీడల్లో పాల్గొనే అవకాశం కోల్పోవడం వల్ల నీరజ్ తీవ్ర మానసిక వేదనకు లోనై ఉండవచ్చని కోచ్ అభిప్రాయపడ్డారు.
Neeraj Yadav | మూడు స్వర్ణాలు..
ఉత్తరప్రదేశ్‌కు చెందిన నీరజ్ యాదవ్ ఏడేళ్ల వయసులో పోలియో అనంతర పక్షవాతానికి గురయ్యారు. అయితే ఆయన క్రీడలపై తనకున్న ఇష్టాన్ని వదులుకోలేదు. 2005 నుండి 2012 వరకు వీల్‌చైర్ టెన్నిస్ ఆడిన ఆయన, ఆ తర్వాత పారా-అథ్లెటిక్స్‌లోకి మారారు. 2015లో జరిగిన ఢిల్లీ స్టేట్ అథ్లెటిక్స్ మీట్‌లో షాట్ పుట్, జావెలిన్ త్రో మరియు డిస్కస్ త్రో ఈవెంట్లలో స్వర్ణ పతకాలు సాధించడం ఆయన కెరీర్‌లో ఒక కీలక మలుపుగా నిలిచింది. 2018లో జకార్తాలో జరిగిన ఆసియా పారా గేమ్స్లో, జావెలిన్ త్రోలో 29.84 మీటర్ల ఆసియా రికార్డు ప్రదర్శనతో స్వర్ణం గెలిచాడు. 2023 ఆసియా పారా గేమ్స్లో జావెలిన్, డిస్కస్ ఈవెంట్లలో రెండు స్వర్ణ పతకాలు సాధించాడు.
Neeraj Yadav | డోపింగ్ ఆరోపణలతో..
ఆయనపై డోపింగ్ కేసు నమోదు కావడంతో కెరీర్ అనుహ్యంగా మలుపు తిరిగింది. 2023 అక్టోబర్‌లో బెంగళూరులో పోటీయేతర సమయంలో సేకరించిన ఒక నమూనాలో స్టానోజోలోల్ అనే అనాబాలిక్ స్టెరాయిడ్ ఉన్నట్లు తేలడంతో, జాతీయ డోపింగ్ నిరోధక సంస్థ (NADA) అతడిని తాత్కాలికంగా సస్పెండ్ చేసింది. దీంతో నీరజ్ 2026 పారా ఆసియా గేమ్స్కు ఎంపిక కాలేదు. ఈ క్రమంలో మనోవేదనకు గురై ఆత్మహత్య చేసుకున్నట్లు భావిస్తున్నారు. పోలీసులు కేసు నమోదు చేసుకొని దర్యాప్తు చేస్తున్నారు.
ఇది కూడా చదవండి..: Para Asian Games | ఆసియా పారా గేమ్స్లో భారత్ రికార్డులు
