అక్షరటుడే, వెబ్డెస్క్: Nitish Kaushal FBI | అమెరికా దర్యాప్తు సంస్థ ఫెడరల్ బ్యూరో ఆఫ్ ఇన్వెస్టిగేషన్ (FBI) తన మోస్ట్ వాంటెడ్ జాబితాలో భారత సంతతికి చెందిన నితీష్ కౌశల్ను చేర్చింది. అంతర్జాతీయ స్థాయి నేరాలపై కొనసాగుతున్న చర్యల్లో భాగంగా ఈ నిర్ణయం తీసుకున్నట్లు ఎఫ్బీఐ వెల్లడించింది.
Nitish Kaushal FBI | పురియా ఆర్గనైజ్డ్ క్రైమ్ గ్రూప్తో అనుబంధం
ఎఫ్బీఐ వివరాల ప్రకారం, నితీష్ కౌశల్ జగ్గు భగవాన్ పురియా ఆర్గనైజ్డ్ క్రైమ్ గ్రూప్తో అనుబంధం కలిగి ఉన్నట్లు ఆరోపణలు ఉన్నాయి. ఈ నేర ముఠాపై హత్యలు, అపహరణలు, మాదకద్రవ్యాల అక్రమ రవాణా, వసూళ్లు, ఆయుధాల అక్రమ వ్యాపారం, మనీలాండరింగ్, మానవ అక్రమ రవాణా వంటి కార్యకలాపాల్లో పాల్గొన్నట్లు దర్యాప్తు సంస్థ పేర్కొంది.
ఈ నేర సంస్థ పంజాబ్లో ఆవిర్భవించి, అనంతరం అమెరికాలోని కాలిఫోర్నియా సెంట్రల్ డిస్ట్రిక్ట్తో పాటు ఇతర ప్రాంతాల్లో కూడా కార్యకలాపాలు నిర్వహించినట్లు ఎఫ్బీఐ తెలిపింది. ఆ సంస్థ తరఫున నితీష్ కౌశల్ అపహరణలు, దాడులు వంటి హింసాత్మక చర్యల్లో పాల్గొన్నాడని ఆరోపించింది.
Strait of Hormuz | హోర్ముజ్ జలసంధిపై ఆధిపత్యం మాదే.. అమెరికా-ఇరాన్ పరస్పర ప్రకటనలు
ఈ ఏడాది జూన్ 25న అమెరికాలోని కాలిఫోర్నియా సెంట్రల్ డిస్ట్రిక్ట్ కోర్టు నితీష్ కౌశల్పై అరెస్ట్ వారెంట్ జారీ చేసినట్లు ఎఫ్బీఐ వెల్లడించింది. రాకెటీరింగ్ ఇన్ఫ్లూయెన్స్డ్ అండ్ కరప్ట్ ఆర్గనైజేషన్స్ (RICO) కుట్ర కేసులో ఆయనపై అభియోగాలు నమోదు చేసినట్లు తెలిపింది.
అయితే, ఈ ఆరోపణలపై నితీష్ కౌశల్ తరఫున ఇప్పటివరకు ఎలాంటి అధికారిక స్పందన వెలువడలేదు. కేసు దర్యాప్తు కొనసాగుతోంది.
