అక్షరటుడే వెబ్డెస్క్:Qatar Missile Attack|పర్షియన్ గల్ఫ్లో ఉద్రిక్తతలు మరోసారి శిఖరాగ్రానికి చేరుకున్నాయి. ఖతార్ తీరానికి సమీపంలో ప్రయాణిస్తున్న ఒక బల్క్ క్యారియర్ నౌకపై ఆదివారం గుర్తుతెలియని క్షిపణి దాడి జరిగింది. ఈ ఘటనలో నౌకలో మంటలు చెలరేగగా, అదృష్టవశాత్తు ఎటువంటి ప్రాణనష్టం జరగలేదని బ్రిటిష్ సైన్యం ధృవీకరించింది.
Qatar Missile Attack | నౌకలో మంటలు..
యునైటెడ్ కింగ్డమ్ మారిటైమ్ ట్రేడ్ ఆపరేషన్స్ (UKMTO) నివేదిక ప్రకారం.. ఖతార్ రాజధాని దోహాకు ఈశాన్యంగా సుమారు 43 కిలోమీటర్ల దూరంలో ఈ దాడి చోటుచేసుకుంది. క్షిపణి తాకడంతో నౌకలో స్వల్పంగా అగ్నిప్రమాదం సంభవించింది. అయితే, సిబ్బంది అప్రమత్తంగా వ్యవహరించి మంటలను వెంటనే అదుపులోకి తెచ్చారు. నౌకలోని వారందరూ సురక్షితంగా ఉన్నట్లు అధికారులు వెల్లడించారు.
Qatar Missile Attack | అమెరికా – ఇరాన్ మధ్య ముదిరిన పోరు..
గత వారం రోజులుగా ఈ ప్రాంతంలో వాణిజ్య నౌకలే లక్ష్యంగా దాడులు పెరుగుతున్నాయి. ఇరాన్ చమురు ట్యాంకర్లపై అమెరికా జరిపిన దాడుల నేపథ్యంలో, ఇరాన్ రివల్యూషనరీ గార్డ్ తీవ్ర హెచ్చరికలు జారీ చేసింది. తమ నౌకలపై దాడులు కొనసాగితే అమెరికా స్థావరాలపై భారీ ఎదురుదాడి చేస్తామని ఇరాన్ హెచ్చరించింది. మరోవైపు, అణు ఒప్పందానికి ఇరాన్ అంగీకరించకపోతే బాంబు దాడులు పునఃప్రారంభిస్తామని అమెరికా అధ్యక్షుడు డొనాల్డ్ ట్రంప్ ప్రకటించడంతో పరిస్థితులు యుద్ధానికి దారితీసేలా కనిపిస్తున్నాయి.
Qatar Missile Attack | ప్రపంచ మార్కెట్లపై ప్రభావం..
ఫిబ్రవరిలో యుద్ధం ప్రారంభమైనప్పటి నుండి ఇరాన్ కీలకమైన జలమార్గాలను దిగ్బంధించడంతో ప్రపంచవ్యాప్తంగా ఇంధన ధరలు ఆకాశాన్ని తాకాయి. తాజా క్షిపణి దాడితో అంతర్జాతీయ మార్కెట్లలో ముడిచమురు ధరలు మరింత పెరిగే అవకాశం ఉందని ఆర్థిక విశ్లేషకులు ఆందోళన వ్యక్తం చేస్తున్నారు.
ఇది కూడా చదవండి: Chandrababu Delhi Tour | రేపు దిల్లీకి సీఎం చంద్రబాబు.. కేంద్ర మంత్రులతో కీలక భేటీ
