అక్షరటుడే, వెబ్డెస్క్ : Singareni Achievement | సింగరేణి సంస్థ పర్యావరణ పరిరక్షణలో అరుదైన ఘనత సాధించింది. బెల్లంపల్లి (Bellampalli) ఏరియాలోని డోర్లీ-2 గని మూసివేతలో పర్యావరణ నిబంధనలను పక్కాగా అమలు చేసింది. గని మూసివేసిన ప్రాంతంలో అడవిని అభివృద్ధి చేసింది.
పర్యావరణ ప్రమాణాలను పాటించినందుకు SCCLను కేంద్రం అభినందించింది. కేంద్ర ఏజెన్సీ రూ.40 కోట్ల ఎస్క్రో డిపాజిట్ను వడ్డీతో సహా వాపసు చేసింది. సింగరేణి 2013-14లో బెల్లంపల్లి ప్రాంతంలోని డోర్లీ-2 ఓపెన్కాస్ట్ గని కోసం అనుమతులు పొందింది. నిబంధనల ప్రకారం, పర్యావరణ, గని మూసివేత కార్యకలాపాల అమలు కోసం కంపెనీ కోల్ కంట్రోలర్ ఆర్గనైజేషన్ పేరు మీద స్టేట్ బ్యాంక్ ఆఫ్ ఇండియాలో సుమారు రూ. 26.79 కోట్లు డిపాజిట్ చేసింది.
Singareni Achievement | ఏడేళ్లు ఉత్పత్తి
ఈ బొగ్గు గనిలో ఏడు సంవత్సరాలు ఉత్పత్తి చేపట్టారు. 2023-24లో గనిని మూసివేశారు. బొగ్గు తవ్వే సమయంలో, మూసివేత అనంతరం పర్యావరణ నిబంధనలను సింగరేణి పక్కాగా అమలు చేసింది. గనులు తవ్విన ప్రాంతంలో సంస్థ 162.517 హెక్టార్ల విస్తీర్ణంలో దట్టమైన అటవీ ప్రాంతాన్ని అభివృద్ధి చేసింది. గనుల తవ్వకం ముందు ఉన్న దట్టమైన అడవితో పోల్చదగిన పచ్చదనాన్ని సమర్థవంతంగా పునరుద్ధరించింది.
Singareni Achievement | మట్టి పునర్వినియోగం
గని తవ్వక ముందు సుమారు 19.76 లక్షల క్యూబిక్ మీటర్ల సారవంతమైన పైమట్టిని సింగరేణి జాగ్రత్తగా తొలగించింది. వేరే ప్రాంతంలో దానిని నిల్వ చేసింది. ఈ పైమట్టిని తరువాత ఓవర్బర్డెన్ డంప్లపై పరచి, మొక్కలు నాటారు. దీంతో ఆ మొక్కలు నేడు చెట్లుగా పెరిగి పచ్చదనం పరుచుకుంది. మైనింగ్ సమయంలో వాయు, జల కాలుష్యం నివారణకు సంస్థ చర్యలు చేపట్టింది.
Singareni Achievement | త్వరలో మరో రూ.60 కోట్లు రిటర్న్
అనేక ఇతర గనులలో కూడా మూసివేతకు సంబంధించిన పనులు పూర్తయ్యాయని సింగరేణి పేర్కొంది. ఆ గనులకు సంబంధించిన ఎస్క్రో డిపాజిట్ వాపసులను త్వరలో అందుకుంటామని ఆశిస్తోంది. డోర్లీ-1 గనికి సంబంధించిన తనిఖీలు కూడా తుది దశలో ఉన్నాయని వెల్లడించింది. ఆ గనికి సంబంధించి కూడా రూ. 60 కోట్లకు పైగా ఎస్క్రో డిపాజిట్ల వాపసును త్వరలో అందుకునే అవకాశం ఉందని అధికారులు భావిస్తున్నారు.
దీనిని కూడా చదవండి : NBK 111 Glimpse | మాస్ లుక్లో అదరగొట్టిన బాలకృష్ణ.. ఎన్బీకే 111 గ్లింప్స్ రిలీజ్
