Teeth Grinding Children | మీ పిల్లలు నిద్రలో పళ్లు కొరుకుతున్నారా? నిపుణులు చెబుతున్న కారణాలివే!

అక్షరటుడే వెబ్‌డెస్క్: Teeth Grinding Children | పిల్లల పెరుగుదల, వారి చిన్న చిన్న అలవాట్లపై తల్లిదండ్రులు ఎప్పుడూ శ్రద్ధ వహిస్తుంటారు. రాత్రి వేళల్లో పిల్లలు నిద్రపోతున్నప్పుడు కొందరు పళ్లు కొరకడం  గమనించే ఉంటారు. ఇలాంటి సమయంలో చాలామంది తల్లిదండ్రులు కంగారుపడటంతో పాటు, కడుపులో నులిపురుగులు చేరడం వల్లే పిల్లలు పళ్లు కొరుకుతున్నారని అనుకుంటుంటారు. ఈ అపోహతో డాక్టర్ సలహా లేకుండానే పిల్లలకు నులిపురుగుల మందులు వాడుతుంటారు. కానీ ఇది నిజంగా నిజమేనా? ఈ విషయంపై నిపుణులు కీలక పలు విషయాలు వెల్లడించారు.

Teeth Grinding Children | పళ్ళు ఎందుకు కొరుకుతారు?

పిల్లలు రాత్రిపూట కడుపులో నులిపురుగుల వల్ల పళ్ళు కొరుకుతారనేది ఒక సాధారణ అపోహ మాత్రమేనని తెలిపారు. ఈ అపోహతో చాలా మంది తల్లిదండ్రులు తమ పిల్లలకు నులిపురుగుల నివారణ మందులు ఇస్తుంటారు. అనవసరంగా మందులు తీసుకోవడం పిల్లలకు హానికరం. ఒకవేళ పిల్లల కడుపులో నులిపురుగులు ఉంటే, వారు రక్తహీనత, ఆకలి లేకపోవడం, కడుపునొప్పి లేదా నీరసం వంటి లక్షణాలను అనుభవిస్తారు. అంతేకాకుండా, పళ్ళు కొరకడానికి కడుపులోని నులిపురుగులకు ఎలాంటి సంబంధం లేదని వెల్లడించారు.

Teeth Grinding Children | తేలికపాటి ఒత్తిడి..

రాత్రిపూట పళ్ళు కొరికే అలవాటును వైద్యపరంగా ‘బ్రక్సిజం’ (Bruxism) అని అంటారని శిశువైద్యులు చెబుతున్నారు. ఈ సమస్య ముఖ్యంగా 7 సంవత్సరాల లోపు పిల్లలలో సర్వసాధారణం. కొన్నిసార్లు, తేలికపాటి ఒత్తిడి, కొత్త విషయాల పట్ల ఆందోళన, లేదా రోజంతా పనిచేయడం వల్ల కలిగే అలసట కారణంగా పిల్లలు నిద్రలో పళ్ళు కొరకవచ్చు. అంతేకాకుండా, చిన్న పిల్లలకు పళ్ళు వచ్చేటప్పుడు ఈ అలవాటు తాత్కాలికంగా కనిపించవచ్చు. చాలా సందర్భాలలో, దీనికి నిర్దిష్ట కారణం ఏమీ ఉండదు, అంటే పిల్లలు ఎటువంటి స్పష్టమైన కారణం లేకుండా ఇలా చేయవచ్చు.

Teeth Grinding Children | తల్లిదండ్రులు ఏం చేయాలి?

మీ పిల్లలు రాత్రిపూట అప్పుడప్పుడు పళ్ళు కొరుకుతుంటే, కంగారు పడాల్సిన అవసరం లేదు. వారితో ప్రేమగా మాట్లాడండి, వారి ఒత్తిడిని అర్థం చేసుకోవడానికి ప్రయత్నించండి. వారు నిద్రపోయేందుకు ప్రశాంతమైన వాతావరణాన్ని కల్పించండి. ఈ అలవాటు సాధారణంగా కాలక్రమేణా దానంతట అదే తగ్గిపోతుంది. అయితే, ఈ అలవాటు చాలా కాలం పాటు కొనసాగితే, నొప్పిని కలిగిస్తే, లేదా పళ్ళు అరిగిపోతే, శిశువైద్యుడిని లేదా దంత వైద్యుడిని సంప్రదించడం మంచిది.

ఇది కూడా చదవండి:  Kamareddy Police | వంతెనపై నుంచి దూకేందుకు వ్యక్తి యత్నం.. కాపాడిన కానిస్టేబుల్