అక్షరటుడే, వెబ్డెస్క్: US Flight Ground Stop | అగ్రరాజ్యం అమెరికాలో విమానయాన వ్యవస్థ ఒక్కసారిగా స్తంభించిపోయింది. ఎయిర్ ట్రాఫిక్ కంట్రోల్ (ATC) కేంద్రాల్లో తలెత్తిన తీవ్రమైన కమ్యూనికేషన్ లోపం కారణంగా దేశవ్యాప్తంగా విమాన రాకపోకలు పూర్తిగా అస్తవ్యస్తంగా మారాయి. ప్రయాణికుల భద్రతను అత్యంత ప్రాధాన్యంగా భావించిన ఫెడరల్ ఏవియేషన్ అడ్మినిస్ట్రేషన్ (FAA) వెంటనే అప్రమత్తమై దేశవ్యాప్తంగా ‘గ్రౌండ్ స్టాప్’ ఆదేశాలు జారీ చేసింది.
US Flight Ground Stop | 11 వేలకు పైగా విమానాలు అస్తవ్యస్తం
అమెరికా తూర్పు కాలమానం ప్రకారం శుక్రవారం మధ్యాహ్నం 3.54 గంటలకు ఈ ఆకస్మిక నిర్ణయం అమల్లోకి వచ్చింది. రన్‌వేలపై సిద్ధంగా ఉన్న ఏ విమానాన్ని కూడా టేకాఫ్ కాకుండా నిలిపివేశారు. అయితే, అప్పటికే గాలిలో ప్రయాణిస్తున్న విమానాలను మాత్రం సురక్షితంగా ల్యాండ్ అయ్యేందుకు అనుమతించారు.
ప్రముఖ ఫ్లైట్ ట్రాకింగ్ సంస్థ ‘ఫ్లైట్‌అవేర్’ అందించిన సమాచారం ప్రకారం.. ఈ సాంకేతిక వైఫల్యం వల్ల ఏకంగా 11 వేలకు పైగా విమాన సర్వీసులు దెబ్బతిన్నాయి. సుమారు 10 వేల విమానాలు గంటల కొద్దీ ఆలస్యం కాగా, వెయ్యికి పైగా విమానాలు రద్దయ్యాయి. వందలాది విమానాలను వేగంగా ప్రత్యామ్నాయ ఎయిర్‌పోర్టులకు మళ్లించారు.
US Flight Ground Stop | అంతర్జాతీయ సర్వీసులపై తీవ్ర ప్రభావం
ఈ అంతరాయం కేవలం డొమెస్టిక్ సర్వీసులకే పరిమితం కాలేదు. కెనడా, యూరప్ తదితర దేశాల నుంచి అమెరికాకు రావలసిన అంతర్జాతీయ విమానాలు సైతం తీవ్రంగా ప్రభావితమయ్యాయి. ఎయిర్‌లైన్స్ సంస్థలు తమ షెడ్యూళ్లను తక్షణమే మార్చుకోవాల్సి వచ్చింది. ఎయిర్‌పోర్టుల్లో ప్రయాణికులు బారులు తీరడంతో గేట్లు, లాంజ్‌లు కిటకిటలాడాయి.
ఈ భారీ అంతరాయం వెనుక సైబర్ దాడి ఏమైనా ఉందా అనే అనుమానాలు వ్యక్తమైనప్పటికీ.. అధికారులు వాటిని పూర్తిగా తోసిపుచ్చారు. సిస్టమ్‌లో ఎలాంటి భద్రతా ముప్పు లేదని, ఇది పూర్తిగా టెలికమ్యూనికేషన్ వ్యవస్థలో తలెత్తిన సాంకేతిక లోపమేనని స్పష్టం చేశారు.
పాతబడిన రౌటర్లు, స్విచ్‌లు ఓవర్‌లోడ్ కావడం వల్లే ఈ కమ్యూనికేషన్ వైఫల్యం ఏర్పడినట్లు రవాణా శాఖ వర్గాలు వెల్లడించాయి. ఎలాంటి అత్యవసర వైద్య, భద్రతా విమానాలకు మాత్రం ఆంక్షల నుంచి మినహాయింపునిచ్చారు.
US Flight Ground Stop | మౌలిక సదుపాయాలపై మళ్లీ చర్చ
చరిత్రలో ఇలాంటి దేశవ్యాప్త విమాన నిలిపివేతలు అత్యంత అరుదుగా జరిగాయి. 2001 సెప్టెంబర్ 11 ఉగ్రదాడుల సమయం, అలాగే 2023 జనవరిలో NOTAM సిస్టమ్ ఫెయిల్ అయినప్పుడు మాత్రమే ఇలాంటి పరిస్థితి తలెత్తింది.
తాజా ఘటనతో అమెరికా విమానయాన రంగంలోని పాతబడిన టెక్నాలజీ, మౌలిక సదుపాయాల ఆధునికీకరణపై మరోసారి పెద్దఎత్తున చర్చ మొదలైంది. సర్వీసులు పూర్తిగా ఎప్పుడు సాధారణ స్థితికి వస్తాయో తెలియక ప్రయాణికులు, ముఖ్యంగా అమెరికాలో ఉన్న ప్రవాస భారతీయులు, విద్యార్థులు తీవ్ర ఆందోళన చెందుతున్నారు.
Akshara Today | ప్రజల గొంతుకగా అక్షరటుడే.. డిజిటల్ దిశగా మరో అడుగు..
