Vikram 1 Launch | అంతరిక్షంలోకి ప్రధాని మోదీ పోస్టుకార్డ్‌..

భారత అంతరిక్ష చరిత్రలో మరో అద్భుత ఘట్టానికి రంగం సిద్ధమైంది.

Last updated: July 17, 2026, 1:52 pm 1:52 pm

అక్షరటుడే వెబ్‌డెస్క్: Vikram 1 Launch | భారత అంతరిక్ష చరిత్రలో మరో అద్భుత ఘట్టానికి రంగం సిద్ధమైంది. ప్రైవేట్ రంగంలో దేశీయంగా అభివృద్ధి చేసిన మొట్టమొదటి ఆర్బిటాల్ రాకెట్ ‘విక్రమ్-1’ ప్రయోగానికి అంతా సిద్ధమైంది. ‘మిషన్ ఆగమన్’ పేరుతో జులై 18న శ్రీహరికోటలోని సతీశ్ ధావన్ అంతరిక్ష కేంద్రం (షార్) నుంచి ఈ ప్రయోగాన్ని స్కైరూట్ ఏరోస్పేస్ సంస్థ చేపట్టనుంది.

Vikram 1 Launch | ప్రధాని సందేశంతో అంతరిక్షంలోకి..

ఈ మిషన్ ప్రత్యేకత ఏమిటంటే, అంతరిక్షంలోకి ప్రధాని నరేంద్ర మోదీ రాసిన ఒక పోస్టుకార్డును తీసుకెళ్లనున్నారు. ఆయన స్వహస్తాలతో ‘వందేమాతరం’ అని రాసిన ఈ కార్డుతో పాటు, భారత అంతరిక్ష రంగానికి సేవలందించిన మాజీ ఇస్రో చైర్మన్లు, శాస్త్రవేత్తలు , వ్యోమగాములు రాసిన డజన్ల కొద్దీ పోస్టుకార్డులను కూడా ఈ ప్రయోగంలో భాగంగా పంపనున్నారు. దేశ అంతరిక్ష ప్రస్థానంలో కృషి చేసిన ప్రముఖులను గౌరవించేందుకు స్కైరూట్ ఈ నిర్ణయం తీసుకుంది.

Vikram 1 Launch | బియ్యం గింజ కంటే చిన్నవిగా..

ఈ మిషన్‌లో భాగంగా మైక్రో ఆర్టిస్ట్ అజయ్ కుమార్ రూపొందించిన అద్భుతమైన కళాఖండాలను పంపనున్నారు. 18 క్యారెట్ల బంగారంతో రూపొందించిన ఒక చిన్న రాకెట్‌పై సీవీ రామన్, విక్రమ్ సారాభాయ్, ఏపీజే అబ్దుల్ కలామ్‌ల సూక్ష్మ రూపాలను చెక్కారు. ఇవి బియ్యం గింజ పరిమాణం కంటే చిన్నగా ఉండటం గమనార్హం. వీటితో పాటు ‘కాస్మిక్ బ్లూమ్’ అనే ఆర్ట్‌వర్క్‌ను కూడా ఈ ప్రయోగంలో భాగంగా అంతరిక్షంలోకి పంపనున్నారు.

Vikram 1 Launch | ప్రైవేట్ రంగానికి కొత్త దిశ..

ఈ ప్రయోగం విజయవంతమైతే భారతీయ ప్రైవేట్ అంతరిక్ష రంగానికి కొత్త ఊపు రానుంది. ప్రపంచ వాణిజ్య ఉపగ్రహ ప్రయోగ మార్కెట్‌లో భారతదేశానికి మరింత గుర్తింపు లభించడమే కాకుండా, రాబోయే కాలంలో ప్రైవేట్ సంస్థల భాగస్వామ్యంతో మరిన్ని ప్రయోగాలు చేసేందుకు ఇది బాటలు వేయనుంది. స్కైరూట్ బృందం , శాస్త్రవేత్తల శ్రమతో కూడిన ఈ ‘మిషన్ ఆగమన్’ ఇప్పుడు దేశవ్యాప్తంగా ఆసక్తిని రేకెత్తిస్తోంది.