అక్షరటుడే, వెబ్డెస్క్: Mexico Earthquake | మెక్సికో దక్షిణ పసిఫిక్ తీరంలో, గ్వాటెమాలా సరిహద్దుకు సమీపంలో శుక్రవారం శక్తివంతమైన భూకంపం సంభవించింది. భూకంప ప్రభావం మెక్సికో రాజధాని మెక్సికో సిటీతో పాటు గ్వాటెమాలా, ఎల్ సాల్వడార్లోని పలు ప్రాంతాల్లో కూడా కనిపించింది.
ఆ తర్వాత సరిగ్గా అరగంటకు మరో భూకంపం ఏర్పడటంతో ప్రజలు తీవ్ర భయాందోళనకు గురయ్యారు. కాగా, ప్రాథమిక సమాచారం ప్రకారం ఎలాంటి భారీ ప్రాణనష్టం, ఆస్తి నష్టం నమోదైనట్లు అధికారులు వెల్లడించలేదు.
భారత కాలమాన ప్రకారం శుక్రవారం రాత్రి 8.18 గంటలకు 7.4 తీవ్రతతో నమోదైన మొదటి భూకంప కేంద్రం మెక్సికోలోని చియాపాస్ తీరానికి సమీపంలో ఉండగా, 8.50 గంటలకు 6.0 తీవ్రతతో మళ్లీ ప్రకంపనలు (ఆఫ్టర్షాక్స్) నమోదైనట్లు భూకంప పరిశీలనా సంస్థలు తెలిపాయి. కాగా, శుక్రవారం ఉదయం కూడా 5.0 తీవ్రతతో ఒక భూకంపం ఏర్పడింది. ఇక రాత్రి 8 తర్వాత అర్ధరాత్రి 12 గంటల వరకు 10 భూకంపాలు ఏర్పడటం ఆందోళనకరం.
Mexico Earthquake | వీధుల్లోకి పరుగులు
చియాపాస్ రాష్ట్రంలోని టపాచులా నగరంలో మొదట స్వల్పంగా ప్రారంభమైన ప్రకంపనలు క్రమంగా తీవ్రత పెరగడంతో ప్రజలు భవనాల నుంచి బయటకు వచ్చి సురక్షిత ప్రాంతాలకు వెళ్లారు. గ్వాటెమాలా రాజధానిలో కూడా భూకంపం ఎక్కువసేపు కొనసాగడంతో ప్రజలు భయాందోళనకు గురై రద్దీ సమయాల్లోనే వీధుల్లోకి పరుగులు తీశారు. పలు భవనాలను అధికారులు ఖాళీ చేయించారు.
గ్వాటెమాలా విపత్తు నిర్వహణ సంస్థ ప్రాథమికంగా పెద్దగా నష్టం జరగలేదని తెలిపింది. అయితే పశ్చిమ ప్రాంతాలకు వెళ్లే కొన్ని రహదారులపై కొండచరియలు విరిగిపడినట్లు స్థానిక సమాచారం వెలువడింది. అప్రమత్తత చర్యగా భూకంప కేంద్రానికి సమీపంలోని కొన్ని జిల్లాల్లో విద్యాసంస్థలకు ప్రత్యక్ష తరగతులను తాత్కాలికంగా నిలిపివేశారు.
మెక్సికో సిటీలోని కొన్ని ప్రాంతాల్లో భవనాలు ఊగిపోవడంతో ప్రజలు బయటకు వచ్చినప్పటికీ, అక్కడ భూకంప హెచ్చరిక వ్యవస్థ సక్రియం కాలేదని అధికారులు తెలిపారు. భూకంపం ప్రారంభ దశలో నమోదైన శక్తి హెచ్చరిక వ్యవస్థ నిర్దేశించిన స్థాయిని దాటలేదని ప్రభుత్వం వివరణ ఇచ్చింది.
Mexico Earthquake | బీచ్లకు దూరంగా ఉండాలని..
మెక్సికో అధ్యక్షురాలు క్లాడియా షీన్బామ్ మాట్లాడుతూ, ఇప్పటివరకు అందిన ప్రాథమిక నివేదికల ప్రకారం గణనీయమైన నష్టం నమోదుకాలేదని చెప్పారు. అయితే సముద్రంలో భూకంపం సంభవించిన నేపథ్యంలో తీర ప్రాంత ప్రజలు అప్రమత్తంగా ఉండాలని, కొంతసేపు బీచ్లకు దూరంగా ఉండాలని అధికారులు సూచించారు.
చియాపాస్ వాతావరణ అధికారులు మెక్సికో, గ్వాటెమాలా తీరాల్లో ఒక మీటరు వరకు ఎత్తులో సునామీ అలలు వచ్చే అవకాశం ఉందని హెచ్చరించారు. తీర ప్రాంతాల్లో పరిస్థితిని స్థానిక యంత్రాంగం నిరంతరం పర్యవేక్షిస్తోంది.
ఇదిలా ఉండగా, భూకంపం సంభవించిన సమయంలో భవనాలు ఊగిపోవడం, అత్యవసర సైరన్లు మోగడం, ప్రజలు భయంతో వీధుల్లోకి పరుగులు తీయడం వంటి దృశ్యాలకు సంబంధించిన పలు వీడియోలు సామాజిక మాధ్యమాల్లో వైరల్గా మారాయి.
భూకంపాలకు అత్యంత సున్నితమైన ప్రాంతాల్లో మెక్సికో దక్షిణ ప్రాంతం ఒకటిగా గుర్తించబడింది. గతంలో కూడా ఈ ప్రాంతంలో సంభవించిన పలు భారీ భూకంపాలు గణనీయమైన ప్రాణ, ఆస్తి నష్టాన్ని కలిగించాయి.
