అక్షరటుడే వెబ్‌డెస్క్: Cyclone Arnab Landfall | బంగాళాఖాతంలో రూపుదిద్దుకున్న అత్యంత తీవ్ర తుఫాన్ ‘అర్నబ్’ (Cyclone Arnab) ఎట్టకేలకు ఆంధ్రప్రదేశ్ తీరాన్ని ( Andhra Pradesh )దాటింది. యానం – నరసాపురం ప్రాంతాల మధ్య ల్యాండ్‌ఫాల్ ప్రక్రియ పూర్తయినట్లు భారత వాతావరణ శాఖ (IMD) , రాష్ట్ర విపత్తు నిర్వహణ సంస్థ అధికారికంగా ధ్రువీకరించాయి. తీరం దాటే సమయంలో గంటకు 125 నుండి 135 కిలోమీటర్ల వేగంతో భీకర గాలులు వీచగా, గరిష్టంగా గాలి వేగం 150 కిలోమీటర్ల వరకు చేరి తీరప్రాంత జిల్లాలను అతలాకుతలం చేసింది.
Cyclone Arnab Landfall | తీరం దాటినా తగ్గని ధాటి..
తీరం దాటిన అనంతరం అర్నబ్ తుఫాన్ తీవ్రత కొంత తగ్గి సాధారణ తీవ్ర తుఫాన్‌గా మారినప్పటికీ, దీని ప్రభావం ఇంకా వీడలేదు. కోస్తాంధ్ర, ఉత్తరాంధ్ర , రాయలసీమలోని పలు జిల్లాల్లో ఎడతెరిపి లేకుండా భారీ నుంచి కుండపోత వర్షాలు కురుస్తున్నాయి. తుఫాను ధాటికి పలుచోట్ల చెట్లు, విద్యుత్ స్తంభాలు నేలకొరిగాయి.
Cyclone Arnab Landfall | ఆకస్మిక వరదల ముప్పు..
తీరం దాటిన తుఫాన్ వ్యవస్థ మరింత ముందుకు కదులుతుండటంతో రాబోయే 24 గంటల పాటు రాష్ట్రంలో అత్యంత భారీ వర్షాలు కురిసే అవకాశముందని వాతావరణ శాఖ తీవ్ర హెచ్చరికలు జారీ చేసింది. వాగులు, వంకలు ఉప్పొంగే ప్రమాదం ఉందని, లోతట్టు ప్రాంతాలు జలమయమయ్యే అవకాశం ఉందని ప్రభుత్వం హెచ్చరించింది. విపత్తు నిర్వహణ యంత్రాంగాన్ని, జిల్లా కలెక్టర్లను పూర్తిస్థాయిలో సిద్ధంగా ఉంచారు.
Cyclone Arnab Landfall | అధికారుల హెచ్చరికలు..
ఇప్పటికే ప్రమాదకర తీర ప్రాంతాలు, లోతట్టు గ్రామాల ప్రజలను అధికారులు సురక్షిత ప్రాంతాల్లోని పునరావాస కేంద్రాలకు తరలించారు. ఎమర్జెన్సీ రెస్క్యూ పనుల కోసం ఎన్‌డీఆర్‌ఎఫ్ (NDRF), ఎస్‌డీఆర్‌ఎఫ్ (SDRF) ప్రత్యేక బృందాలు క్షేత్రస్థాయిలో అందుబాటులో ఉన్నాయి.
Cyclone Arnab Landfall | ప్రజలకు విజ్ఞప్తి..
అనవసరంగా ఇళ్ల నుంచి బయటకు రావద్దని, ఉప్పొంగే వాగులు, కాలువలు దాటే సాహసాలు చేయవద్దని అధికారులు స్పష్టం చేశారు. అలాగే, సహాయం కోసం ప్రభుత్వం ఏర్పాటు చేసిన కంట్రోల్ రూమ్ నంబర్లను సంప్రదించాలని కోరారు.
ఇది కూడా చదవండి: Neeraj Yadav | పారా అథ్లెట్ నీరజ్ యాదవ్ ఆత్మహత్య
