అక్షరటుడే వెబ్డెస్క్: Muscat Abuse Case| బ్రతుకుదెరువు కోసం వెళ్లిన చోట బానిస బ్రతుకు ఎదురైతే ఆ వేదన వర్ణనాతీతం. అన్నమయ్య జిల్లాకు చెందిన ఓ మహిళ ప్రస్తుతం మస్కట్లో అటువంటి దారుణ పరిస్థితులనే ఎదుర్కొంటోంది. తనను రక్షించాలంటూ ఆమె కన్నీళ్లతో సోషల్ మీడియా వేదికగా పంపిన వీడియో ఇప్పుడు అందరినీ కలచివేస్తోంది.
Muscat Abuse Case|అసలేం జరిగింది?..
అన్నమయ్య జిల్లా వాల్మీకిపురానికి చెందిన షానల్ అనే మహిళది పేద కుటుంబం. తన ముగ్గురు పిల్లలకు మంచి భవిష్యత్తు ఇవ్వాలనే ఆశతో, అప్పులు చేసి మరీ ఓ ఏజెంట్ ద్వారా ఉపాధి కోసం మస్కట్ వెళ్ళింది. తీరా అక్కడికి వెళ్ళాక ఆమె కలలన్నీ కల్లలయ్యాయి.
Muscat Abuse Case|షానల్ తన వీడియోలో వెల్లడించిన వివరాల ప్రకారం..
యజమాని తనను శారీరకంగా, మానసికంగా తీవ్రంగా వేధిస్తున్నాడని ఆమె వాపోయింది. గదిలో బంధించి కనీసం ఆహారం, నీరు కూడా ఇవ్వకుండా చిత్రహింసలకు గురిచేస్తున్నారని తెలిపింది. ఈ ఒత్తిడి కారణంగా తనకు ఫిట్స్ వస్తున్నాయని, ప్రాణభయంతో బాత్రూమ్లోకి వెళ్లి ఎవరికీ తెలియకుండా ఈ వీడియో రికార్డ్ చేశానని కన్నీరుమున్నీరైంది. “నేను చనిపోతే నా పిల్లలు అనాథలవుతారు.. పవనన్నా, ప్లీజ్ నన్ను కాపాడండి” అంటూ ఆమె చేసిన ఆర్తనాదాలు సోషల్ మీడియాలో వైరల్ అవుతున్నాయి.
Muscat Abuse Case|పవన్ కళ్యాణ్కు విజ్ఞప్తి..
ఆమె ప్రత్యేకంగా ఆంధ్రప్రదేశ్ ఉప ముఖ్యమంత్రి పవన్ కళ్యాణ్ తనను ఆదుకోవాలని వేడుకుంది. తన పిల్లల కోసం తాను బ్రతకాలని, వెంటనే ప్రభుత్వం స్పందించి తనను స్వదేశానికి రప్పించాలని కోరుతోంది.
ఇలాంటి ఘటనలు పునరావృతం కాకుండా ఉండాలంటే, విదేశాలకు వెళ్లే వారు కొన్ని జాగ్రత్తలు తీసుకోవాలని నిపుణులు సూచిస్తున్నారు.
ప్రభుత్వం గుర్తించిన రిక్రూట్మెంట్ ఏజెన్సీల ద్వారానే వెళ్లాలి.
వెళ్లే దేశంలోని భారత రాయబార కార్యాలయం (Embassy) ఫోన్ నంబర్లు దగ్గర ఉంచుకోవాలి.
పనికి సంబంధించిన అగ్రిమెంట్ పేపర్లను క్షుణ్ణంగా చదవాలి.
ప్రస్తుతం ఈ వీడియో అధికారుల దృష్టికి వెళ్లడంతో, ఆమెను సురక్షితంగా వెనక్కి తీసుకురావడానికి ప్రయత్నాలు జరగాలని నెటిజన్లు కోరుతున్నారు.
ఇది కూడా చదవండి: CV Anand DGP| అమ్మ కోరిక తీర్చిన కొడుకు..సీవీ ఆనంద్ ఎమోషనల్ పోస్ట్!
