అక్షరటుడే, వెబ్డెస్క్: Russia Space Operation | రష్యా అంతరిక్షంలో చేపట్టిన అత్యంత రహస్య ప్రయోగాలు ఇప్పుడు అంతర్జాతీయ స్థాయిలో సంచలనం సృష్టిస్తున్నాయి. గత ఏప్రిల్ 28న భూమికి సుమారు 585 కిలోమీటర్ల ఎత్తులో (లో ఎర్త్ ఆర్బిట్), రష్యాకు చెందిన రెండు కీలక ఉపగ్రహాలు ఒకదానికొకటి అత్యంత చేరువగా వచ్చి చేసిన విన్యాసాలు శాస్త్రవేత్తలను ఆశ్చర్యపరిచాయి.
Russia Space Operation | అత్యంత సమీపంలో ‘కాస్మోస్’ జంట..
రష్యా (Russia)కు చెందిన కాస్మోస్ 2581, కాస్మోస్ 2583 ఉపగ్రహాలు అంతరిక్షంలో ప్రయాణిస్తూ.. ఒకానొక దశలో వాటి మధ్య దూరాన్ని కేవలం 10 అడుగులకు (3 మీటర్లు) తగ్గించుకున్నాయి. సాధారణంగా అంతరిక్షంలో ఇంత తక్కువ దూరంలో ఉపగ్రహాలు ఉంటే అవి ఒకదానికొకటి ఢీకొనే ప్రమాదం (Collision Risk) ఉంటుంది. కానీ, ఈ రెండు ఉపగ్రహాలు దాదాపు సున్నా సాపేక్ష వేగంతో (Zero Relative Velocity) ఉంటూ, ఎంతో నియంత్రిత పద్ధతిలో పక్కపక్కనే ప్రయాణించాయి.
Russia Space Operation | పక్కా స్కెచ్తో చేసిన ప్రయోగం..
అమెరికాకు చెందిన స్పేస్ ట్రాకింగ్ సంస్థలు (COMSPOC, LeoLabs) మొదట దీనిని ఒక ప్రమాదంగా భావించి అప్రమత్తమయ్యాయి. అయితే, రష్యా ఉపగ్రహాలు ఉద్దేశపూర్వకంగానే అనేక సూక్ష్మ మాన్యువర్లను (Micro-maneuvers) నిర్వహించి, ఒకదానికొకటి అతి దగ్గరగా ఉండేలా స్థితిని మార్చుకున్నాయని తర్వాత గుర్తించారు. ఇది అనుకోకుండా జరిగింది కాదని, రష్యా పక్కా స్కెచ్తో చేసిన ప్రయోగమని నాసా నిపుణులు నిర్ధారించారు.
Russia Space Operation | ఈ రహస్య పరీక్షల వెనుక అసలు వ్యూహం ఏమిటి?
ఈ విన్యాసాల ద్వారా రష్యా తన అంతరిక్ష యుద్ధ తంత్రాన్ని (Space Warfare) బలోపేతం చేసుకుంటున్నట్లు నిపుణులు విశ్లేషిస్తున్నారు.
అంతరిక్షంలో రష్యా చేపట్టిన ఈ రహస్య ప్రయోగాలు ప్రధానంగా మూడు వ్యూహాత్మక లక్ష్యాలతో సాగుతున్నట్లు కనిపిస్తోంది. మొదటిది, ఇన్-ఆర్బిట్ ఇన్స్పెక్షన్ ద్వారా కక్ష్యలో ఉన్న ఇతర ఉపగ్రహాలను అత్యంత చేరువగా వెళ్లి నిశితంగా పరిశీలించే సామర్థ్యాన్ని రష్యా పెంపొందించుకుంటోంది. ఇది కేవలం పరిశీలనకే పరిమితం కాకుండా, ప్రమాదకరమైన యాంటీ-సాటిలైట్ (ASAT) సత్తాను కూడా చాటుతోంది. ఈ సాంకేతికతతో శత్రు దేశాల ఉపగ్రహాలను పట్టుకోవడం (Capture), వాటిని నిర్వీర్యం చేయడం లేదా వాటిలోని రహస్య సమాచారాన్ని దొంగిలించడం వంటి ‘ప్రాక్సిమిటీ ఆపరేషన్స్’ చేసే అవకాశం ఉంది. మరోవైపు, డాకింగ్ & రెండెజ్వస్ ప్రక్రియల ద్వారా అంతరిక్షంలోనే ఉపగ్రహాలకు ఇంధనం నింపడం లేదా అవసరమైన మరమ్మతులు చేసే అధునాతన సాంకేతికతను రష్యా క్షుణ్ణంగా పరీక్షిస్తోంది. ఈ పరిణామాలు అంతరిక్షంలో రష్యా పెరుగుతున్న ఆధిపత్యానికి సంకేతంగా నిలుస్తున్నాయి.
ప్రపంచ దేశాల ఆందోళన..
అమెరికా, చైనా వంటి అగ్రరాజ్యాలకు పోటీగా రష్యా అంతరిక్షంలో తన పట్టును నిరూపించుకోవడానికి ఇటువంటి సాహసోపేత ప్రయోగాలు చేస్తోంది. ఈ ప్రయోగాలు ఇతర దేశాల నిఘా, సమాచార ఉపగ్రహాలకు భవిష్యత్తులో ముప్పుగా మారవచ్చని అంతర్జాతీయ రక్షణ నిపుణులు తీవ్ర చర్చ జరుపుతున్నారు.
రష్యా తన అధునాతన సాంకేతిక వ్యూహాలతో అంతరిక్షంలో సాగిస్తున్న ఈ రహస్య ప్రయోగాలు, ప్రపంచ దేశాల మధ్య కొత్త రకమైన అంతరిక్ష పోటీకి దారితీస్తున్నాయి.
ఇది కూడా చదవండి..: Humanoid Robot Monk | ఆధ్యాత్మిక రంగంలోకి ఏఐ.. దక్షిణ కొరియాలో ‘రోబో సన్యాసి’ అరంగేట్రం!
