అక్షరటుడే, వెబ్డెస్క్: India Italy Cooperation | భారతదేశం – ఇటలీ దేశాల మధ్య వ్యూహాత్మక, ఆర్థిక భాగస్వామ్యాన్ని మరింత పటిష్టం చేసే లక్ష్యంతో ప్రధాని నరేంద్ర మోడీతోపాటు ఉన్నత స్థాయి భారత ప్రతినిధి బృందం ఇటలీ రాజధాని రోమ్ నగరానికి చేరుకుంది.
ఈ పర్యటనలో భాగంగా ఇటలీ అధ్యక్షుడు సెర్గియో మట్టరెల్లా, ప్రధానమంత్రి జార్జియా మెలోనిలతో ప్రతినిధి బృందం కీలక సమావేశాలు నిర్వహించనుంది.
India Italy Cooperation | ‘ఇండియా-మిడిల్ ఈస్ట్-యూరప్ ఎకనామిక్ కారిడార్’
ఈ పర్యటనలో అత్యంత కీలకమైన అంశం ‘ఇండియా-మిడిల్ ఈస్ట్-యూరప్ ఎకనామిక్ కారిడార్’ (IMEC). ఈ ప్రతిష్ఠాత్మక ప్రాజెక్టును వేగవంతం చేయడం, ఇరు దేశాల మధ్య వాణిజ్య మార్గాలను మరింత సులభతరం చేయడంపై ఇరు దేశాల అధినేతలు సుదీర్ఘంగా చర్చించనున్నారు.
India Italy Cooperation | జాయింట్ స్ట్రాటజిక్ యాక్షన్ ప్లాన్ సమీక్ష:
భారత్-ఇటలీ మధ్య కుదిరిన ‘జాయింట్ స్ట్రాటజిక్ యాక్షన్ ప్లాన్ 2025-29’ అమలు తీరును, భవిష్యత్తు కార్యాచరణను ఈ సందర్భంగా ఇరుపక్షాలు సమీక్షించనున్నాయి.
FAO ప్రధాన కార్యాలయం సందర్శన:
రోమ్లోని అంతర్జాతీయ ఐక్యరాజ్యసమితి విభాగమైన ‘ఆహార – వ్యవసాయ సంస్థ’ (FAO) ప్రధాన కార్యాలయాన్ని ప్రతినిధి బృందం సందర్శించనుంది.
ప్రపంచ ఆహార భద్రతను పెంపొందించడంలో, ఆకలి నిర్మూలనలో భారతదేశం వహిస్తున్న క్రియాశీలక పాత్రను, బహుపాక్షిక విధానాల పట్ల భారత్కు ఉన్న నిబద్ధతను ఈ సందర్భంగా చాటిచెప్పనున్నారు.
ఈ పర్యటన ద్వారా ఇటు యూరప్ దేశాలతో, అటు అంతర్జాతీయ వేదికలపై భారతదేశ ముద్ర మరింత బలోపేతం కానుందని విశ్లేషకులు భావిస్తున్నారు.
