అక్షరటుడే, వెబ్డెస్క్: Deputy Collector Sharmila | ప్రభుత్వ ఆదేశాలను బేఖాతరు చేస్తూ, బదిలీ అయిన స్థానంలో విధుల్లో చేరని హైదరాబాద్ మహానగర అభివృద్ధి సంస్థ (HMDA) డిప్యూటీ కలెక్టర్ ఎం. షర్మిలపై ప్రభుత్వం కఠిన చర్యలు తీసుకుంది. ఆమెను సస్పెండ్ చేస్తూ తెలంగాణ ప్రభుత్వ రెవెన్యూ శాఖ ఉత్తర్వులు జారీ చేసింది.
Deputy Collector Sharmila | పూర్తి వివరాల్లోకి వెళ్తే…
అవినీతి ఆరోపణల నేపథ్యంలో డిప్యూటీ కలెక్టర్ ఎం. షర్మిలను HMDA నుంచి ఆదిలాబాద్ జిల్లా ఉట్నూరు రెవెన్యూ డివిజనల్ ఆఫీసర్ (RDO)గా బదిలీ చేస్తూ ఈ నెల 4వ తేదీన (G.O.Rt.No.240) ప్రభుత్వం ఉత్తర్వులు జారీ చేసింది.
ఉట్నూరు ఆర్డీఓ పదవిని ‘ఎలక్టోరల్ రిజిస్ట్రేషన్ ఆఫీసర్’గా కూడా ప్రభుత్వం గుర్తించింది. ప్రస్తుతం జిల్లాలో ‘ప్రత్యేక ముమ్మర సవరణ’ (Special Intensive Revision – SIR) మ్యాపింగ్ ప్రక్రియ కొనసాగుతుండటంతో ఈ పోస్టింగ్ అత్యంత కీలకమైనదిగా మారింది.
Deputy Collector Sharmila | ఆదేశాల ఉల్లంఘన
అయితే, బదిలీ ఆదేశాలు వచ్చి రెండు వారాలు అవుతున్నా.. షర్మిల ఉట్నూరులో విధులకు హాజరుకాలేదు. అత్యంత కీలకమైన ఎన్నికల – రెవెన్యూ విధులను నిర్లక్ష్యం చేయడం, ప్రభుత్వ ఆదేశాలను ఉల్లంఘించడాన్ని తీవ్రంగా పరిగణించిన సర్కారు… TCS (CC&A) రూల్స్, 1991 లోని రూల్ 8 ప్రకారం ఆమెను తక్షణమే సస్పెండ్ చేస్తున్నట్లు ప్రకటించింది.
తదుపరి ఉత్తర్వులు వచ్చే వరకు ఎం. షర్మిలను సస్పెన్షన్లో ఉంచుతున్నట్లు సర్కారు పేర్కొంది.
సస్పెన్షన్ కాలంలో ముందస్తు అనుమతి లేకుండా ఆమెను హెడ్క్వార్టర్స్ వదిలి వెళ్లరాదని స్పష్టం చేసింది.
నిబంధనల ప్రకారం సస్పెన్షన్ కాలంలో ఆమెకు జీవనభృతి (Subsistence Allowance) చెల్లించబడుతుందని ఉత్తర్వుల్లో పేర్కొంది.
ఈ మేరకు ప్రభుత్వ కార్యదర్శి లోకేష్ కుమార్ డి.ఎస్. గవర్నర్ పేరిట అధికారిక ఉత్తర్వులు (G.O.Rt.No.266) జారీ చేశారు.
ఈ ఉత్తర్వుల ప్రతులను భూపరిపాలన ప్రధాన కమిషనర్ (CCLA), రాష్ట్ర ముఖ్య ఎన్నికల అధికారి (CEO), ఆదిలాబాద్ జిల్లా కలెక్టర్కు తదుపరి చర్యల నిమిత్తం పంపించారు.
Euphoria | ‘యుఫోరియా’: సుఖ భ్రమల్లో యువత.. కన్నీటిలో మునిగిన సమాజం!
